កីឡាជាតិ
ជាតិ
កីឡាករ ឡុង ជិន រងពិន័យមិនឲ្យឡើងសង្វៀនចំនួន៣ខែ ដោយសារមិនគោរពវិន័យ
× កីឡាករ ឡុង ជិន រងពិន័យមិនឲ្យឡើងសង្វៀនប្រកួតចំនួន៣ខែ ក្រោមហេតុផលមិនគោរពវិន័យ។ លោក រីកគី(Ricky) គ្រូបង្វឹកក្លិបខ្លារខិនមានរិទ្ធិបានអះអាងថា ឡុង ជិន អាចឡើងសង្វៀនប្រដាល់មុនពេលវេលាកំណត់ បើរូបគេកែប្រែអត្តចរិត និងព្រមទទួលស្គាល់កំហុស។ កីឡាកររូបនេះ បានអវត្តមានហ្វឹកហាត់ជាមួយក្លិបចំនួន៣សប្តាហ៍ហើយ។
លោកស្រី ឡុង រ៉ាវី ម្ចាស់ក្លិបខ្លារខិនមានរិទ្ធិបានសម្រេចដាក់ពិន័យកីឡាករ ឡុង ជិន មិនឲ្យឡើងសង្វៀនប្រកួតគ្រប់ស្ថានីយទូរទស្សន៍ចំនួន៣ខែ ក្រោមហេតុផលមិនគោរពវិន័យក្លិប។ មុនឈានដល់ការដាក់ពិន័យនេះ លោកស្រី អះអាងថា កីឡាកររូបនេះបានប្រព្រឹត្តកំហុសបែបនេះជាច្រើនលើកច្រើនសារួចមកហើយ។
លោក រីកគី គ្រូបង្វឹកក្លិបខ្លារខិនមានរិទ្ធិបាននិយាយថា មូលហេតុដែលប្រធានក្លិបដាក់ពិន័យលើកីឡាករ ឡុង ជិន ដោយសាររូបគេមិនគោរពពេលវេលាហ្វឹកហាត់ ហើយពេលទៅណាមកណាមិនដែលផ្តល់ដំណឹងជូនក្លិប។ លោកអះអាងថា កីឡាកររូបនេះមិនមែនទើបតែបង្កើតកំហុសម្តងនោះទេ ពោលគឺរូបគេបានបង្កកំហុងបែបនេះជាច្រើនលើករួចមកហើយ។
សម្រាប់លោក រីកគី ការដាក់ពិន័យនេះ មិនមែនជាការធ្វើទារុណ្ឌកម្មនោះទេ តែជាការដាស់តឿនដល់រូបគេឲ្យមានការភ្ញាក់រលឹកនិងចេះកែប្រែកំហុសទៅវីញទេ។ លោកអះអាងថា បើ ឡុង ជិន ចេះកែប្រែកំហុស ហើយព្យាយាមហ្វឹកហាត់ក្នុងអំឡុងពេលនៃការដាក់ពិន័យនេះ រូបគេ ទំនងអាចឡើងសង្វៀនប្រកួតមុនពេលវេលាកំណត់។ ផ្ទុយទៅវិញ បើរូបគេទន់ទោទៅតាមការពិន័យនេះ ហើយមិនព្យាយាមហ្វឹកហាត់ រូបគេ អាចចំណាយពេលច្រើនជាង៣ខែ ទើបក្លិបអនុញ្ញាតឲ្យឡើងប្រកួត។
លោក រីកគី បានបញ្ជាក់ថា កីឡាករ ឡុង ជិន បានខកខានហ្វឹកហាត់អស់រយៈពេល៣សប្តាហ៍ហើយ។ លោកសង្ឃឹមថា រូបគេនឹងចូលមកហ្វឹកហាត់ ហើយកែប្រែកំហុស ដើម្បីទទួលបានឱកាសឡើងសង្វៀនប្រកួតសាជាថ្មី។ គ្រូបង្វឹករូបនេះ ទទួលស្គាល់ថា កំហុសរបស់កីឡាករ ឡុង ជិន ក៏មានការរួមចំណែកពីលោកផងដែរ ដែលអប់រំមិនបានល្អ៕
Tag:
ប្រដាល់គុនខ្មែរ
ឡុង ជិន
© រក្សាសិទ្ធិដោយ thmeythmey.com