សង្គមអន្តរជាតិ
អន្តរជាតិ
រដ្ឋាភិបាលហុងកុងព្រមានអាមេរិកថា ការដក«ឋានៈពិសេស»ជាកាំបិតមុខពីរ អ្នកស្រីនាយកប្រតិបត្តិហុងកុង ការី ឡាំ (AFP)
× រដ្ឋាភិបាលទីក្រុង ហុងកុង បានព្រមានក្រុងវ៉ាស៊ីនតោនថាការដកហូតឋានៈពិសេសដែលផ្ដល់ឲ្យដោយច្បាប់អាមេរិកពីទីក្រុងនេះ អាចជាកាំបិតមុខពីរ ហើយទទូចឲ្យសហរដ្ឋអាមេរិកឈប់ជ្រៀតជ្រៀងកិច្ចការផ្ទៃក្នុងខ្លួនតទៀត។
«រាល់ទណ្ឌកម្មទាំងឡាយ គឺជាកាំបិតមុខពីរ ដែលនឹងពុំគ្រាន់តែប៉ះពាល់ផលប្រយោជន៍ទីក្រុង ហុងកុង ប៉ុណ្ណោះ តែក៏ប៉ះពាល់ច្រើនដល់អាមេរិកផងដែរ»។ រដ្ឋាភិបាលទីក្រុង ហុងកុង ប្រកាសក្នុងសេចក្តីថ្លែងការណ៍បែបនេះ នៅថ្ងៃទី២៨ ខែឧសភា។
រដ្ឋាភិបាលហុងកុង បញ្ជាក់ទៀតថា ចាប់ពីឆ្នាំ២០០៩ដល់ឆ្នាំ២០១៨ អតិរេកពាណិជ្ជក្ម (trade surplus) អាមេរិកជាមួយទីក្រុងហុងកុង គឺធំជាងគេបំផុតក្នុងចំណោមដៃគូពាណិជ្ជកម្មដទៃទាំងអស់របស់ខ្លួន។ ទំនិញគិតជាទឹកប្រាក់សរុប ២៩៧ពាន់លានដុល្លារ និងក្រុមហ៊ុនអាមេរិកចំនួន ១៣០០ក្រុមហ៊ុន ស្ថិតនៅទីក្រុងហុងកុង។
សេចក្តីថ្លែងការណ៍រដ្ឋាភិបាលហុងកុង ធ្វើឡើយក្រោយពីរដ្ឋបាលប្រធានាធិបតី ដូណាល់ ត្រាំ នៅថ្ងៃទី២៧ ខែឧសភា បានសម្រេចដកហូតឋានៈពិសេសរបស់ទីក្រុងរដ្ឋបាលពិសេសហុងកុងក្រោមច្បាប់អាមេរិក ដោយចោទថា ក្រុងនេះលែងមានស្វយ័តភាពដែលធានាដោយប៉េកាំងទៀតហើយ។ អតីតទីក្រុងក្រោមអាណានិគមចក្រភពអង់គ្លេសនេះ ទទួលបានស្វយ័តភាពកម្រិតខ្ពស់ក្រោមគោលការណ៍«ប្រទេសមួយ ប្រព័ន្ធពីរ» ចាប់តាំងពីប្រគល់ឲ្យចិនគ្រប់គ្រងវិញក្នុងឆ្នាំ១៩៩៧។
សភាប្រជាជនចិន កាលពីថ្ងៃទី២៨ ខែឧសភា បានអនុម័តលើដំណោះស្រាយច្បាប់សន្តិសុខជាតិហុងកុងហើយ។ ការអនុម័តនេះ នឹងបើកផ្លូវឲ្យគណៈកម្មការអចិន្ត្រៃយ៍នៃសភាប្រជាជនចិន តាក់តែងច្បាប់សន្តិសុខជាតិហុងកុងឡើង។ ទីក្រុង ប៉េកាំង បញ្ជាក់ថា សេចក្តីព្រាងច្បាប់ថ្មីនេះ នឹងបង្ការការធ្វើវិទ្ធង្សនា ចលនាផ្ដាច់ខ្លួន អំពើភេរវកម្ម និងការជ្រៀតជ្រៀកពីបរទេសក្នុងទីក្រុង៕
Tag:
ហុងកុង
សហដ្ឋអាមេរិក
ឋានៈពិសេស
© រក្សាសិទ្ធិដោយ thmeythmey.com