ជាតិ
សង្គមជាតិ
២៥ខេត្ត/រាជធានី
អភិបាលខេត្តកំពង់ធំ៖ ប្រព័ន្ធធារាសាស្ត្រ និងទីផ្សារ បានរារាំងដល់ការលូតលាស់វិស័យកសិកម្ម
× ភ្នំពេញ៖ ប្រព័ន្ធធារាសាស្ត្រ ជាប្រភពដ៏សំខាន់សម្រាប់ការធ្វើកសិកម្ម ការដាំដុះ និងចិញ្ចឹមសត្វរបស់ប្រជាកសិករ។ អភិបាលខេត្តកំពង់ធំ លោក សុខ លូ អះអាងថា កំពង់ធំជាខេត្ត ដែលមានសក្ដានុពល ខាងវិស័យកសិកម្ម ប៉ុន្តែកង្វះប្រព័ន្ធធារាសាស្ត្រ និងទីផ្សារ គឺជាការរាំងស្ទះដល់ល្បឿនអភិវឌ្ឍវិស័យ កសិកម្មខេត្តកំពង់ធំ។
សូមអញ្ជើញស្ដាប់ការរៀបរាប់របស់លោក សុខ លូ អភិបាលខេត្តកំពង់ធំដូចតទៅ៖
«ការរាំងស្ទះនៃល្បឿនកសិកម្ម គឺគ្មានអ្វីក្រៅពីធារាសាស្ត្រទេ។ បើអត់ធារាសាស្ត្រហើយ កសិកម្មទៅ មិនរួចទេ»។ នេះជាការបញ្ជាក់របស់ លោក សុខ លូ កាលពីថ្ងៃទី២៧ មិថុនា ក្នុងសន្និសីទសារព័ត៌មាន ស្ដីពី«វឌ្ឍនភាព និងទិសដៅការងារបន្តរបស់រដ្ឋបាលខេត្តកំពង់ធំ» ដោយបន្តថា ខេត្តកំពង់ធំ មានទស្សនវិស័យបន្ថែមទំនប់ ប្រឡាយ និងជីកស្រះ ជូនប្រជាកសិករបន្ថែម ដើម្បីមានទឹក ស្រោកដំណាំងបានគ្រប់គ្រាន់។
លោក សុខ លូ ក៏បញ្ជាក់ដែរថា បញ្ហាទីផ្សារ ក៏ជាកត្តារាំងស្ទះចំណែកដល់វិស័យកសិកម្ម ខេត្តកំពង់ធំដែរ។ លោកបន្ថែមថា៖ «បើយើងផលិតហើយ បានផលច្រើនមិនដឹងយកទៅណា នោះមិនដឹងធ្វើដើម្បីអ្វីទេ។ ចំណុចនេះក្រសួងពាណិជ្ជកម្ម បានខិតខំរកទីផ្សារកសិកម្ម ជូនកសិករ»។
ទោះបីខេត្តកំពង់ធំ មានសក្ដានុពលលើវិស័យកសិកម្មក៏ពិតមែន ប៉ុន្ដែអភិបាលខេត្តរូបនេះ បានបញ្ជាក់ថា ខេត្តមិនទាន់មានរោងចក្រកែច្នៃផលិតផលសម្រេចនៅឡើយ ពោលនៅពេលប្រមូលផលបានម្ដងៗ បន្ទាប់ពីលក់ដូរក្នុងតំបន់ហើយនោះ ប្រជាកសិករ បានលក់ឲ្យឈ្មួញដើម្បីនាំចេញទៅប្រទេសជិតខាង ដែលមានប្រទេសថៃ និងប្រទេសវៀតណាមជាដើម៕
Tag:
VDO
កសិកម្ម
កំពង់ធំ
ប្រព័ន្ធធារាសាស្ត្រ
© រក្សាសិទ្ធិដោយ thmeythmey.com