ជាតិ
សង្គមជាតិ
×![]()
ដោយ: ឡាយ សុភាវតី
ភ្នំពេញ៖ សម្ដេច ស ខេង រដ្ឋមន្រី្តក្រសួងមហាផ្ទៃ បានគូសបញ្ជាក់ថារដ្ឋាភិបាល មិនដកថយចំពោះការរឹតបន្តឹងច្បាប់ចរាចរណ៍ ដែលសំដៅការពារអាយុជីវិតរបស់ពលរដ្ឋនោះឡើយ។ សម្ដេច ស ខេង ថ្លែង៖«ខ្ញុំជាមួយសម្ដេចតេជោ ហ៊ុន សែន ឯកភាពគ្នាខ្ពស់ណាស់ ថាយើងទៅមុខអត់ថយក្រោយទេ ព្រោះបើយើងថយក្រោយមិនដឹងថា មានឱកាសពេលណា ឬពេលណាយើងធ្វើទៀត»។ នៅក្នុងពិធីប្រកាសតែងតាំងអភិបាលថ្មីខេត្តកែប កាលពីថ្ងៃទី២៩ឧសភា សម្ដេច ស ខេង ក៏បានលើកឡើងពីការថយចុះចំនួនអ្នកស្លាប់ និងរបួស ក៏ដូចជាករណីគ្រោះថ្នាក់ចរាចរណ៍ នៅក្នុងរយៈពេលជិតមួយខែនៃការរឹតបន្តឹងការអនុវត្តច្បាប់ចរាចរណ៍ផងដែរ។
រដ្ឋមន្ត្រីក្រសួងមហាផ្ទៃ បានឲ្យដឹងថា គិតត្រឹមរយៈពេល២៩ថ្ងៃ នៃខែឧសភា ធៀបនឹងរយៈពេលដូចគ្នានៃខែមេសា ជនរងគ្រោះដែលបណ្តាលមកពីគ្រោះថ្នាក់ចរាចរណ៍បានថយចុះ ក្នុងនោះ អ្នកស្លាប់ថយចុះ១៥នាក់ ខណៈអ្នករបួស ជាង៨០នាក់។ ការថយចុះនេះ ត្រូវបានសម្តេច ស ខេង ចាត់ទុកថា គឺជាជោគជ័យមួយ ហើយដែលជំរុញឲ្យរដ្ឋាភិបាល នៅតែបន្តឥតដកថយនោះឡើយ ចំពោះការរឹតបន្តឹងការអនុវត្តច្បាប់ចរាចរណ៍នេះ។
ជាមួយគ្នានេះដែរ រយៈពេល៣០ថ្ងៃនៃការរឹតបន្តឹងច្បាប់ចរាចរណ៍ នគរបាលចរាចរណ៍បានត្រួតពិនិត្យ និងពិន័យយានយន្តល្មើសចំនួន ៤៣ ៥៣០គ្រឿង ក្នុងនោះមានរថយន្តចំនួន ១១ ៧៧៥គ្រឿង និងម៉ូតូ ៣១ ៧៥៥គ្រឿង។ នេះបើតាមលោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ ប្រាប់សារព័ត៌មានថ្មីៗតាមទូរស័ព្ទរនៅថ្ងៃទី៣១ ឧសភា ឆ្នាំ២០២០។
សូមបញ្ជាក់ថា ការរឹតបន្តឹងច្បាប់ចរាចរណ៍ផ្លូវគោកនេះ កន្លងមកនគរបាលបានកំណត់យកបទល្មើសអាទិភាពតែ១៦ប៉ុណ្ណោះ ដើម្បីមកអនុវត្ត ក្នុងនោះមានបទល្មើសម៉ូតូចំនួន៧ និងបទល្មើសបើកបររថយន្តចំនួន៩។ បទល្មើសម៉ូតូចំនួន៧ ដែលនឹងអនុវត្តលើទោចក្រយានយន្តនោះរួមមាន៖ មិនពាក់មួកសុវត្ថិភាព, ស្រវឹង, មិនគោរពភ្លើង និងស្លាកសញ្ញា, ល្មើសការបត់ និងវ៉ាជែង, ដឹកលើចំណុះ, គ្មានស្លាកលេខ និង ប្រើប្រាស់ទូរស័ព្ទដោយគ្មានកាស។
ចំណែកបទល្មើសរថយន្តទាំង៩ រួមមាន៖ ល្បឿន, ស្រវឹង, គ្មានបណ្ណបើកបរ, មិនគោរពភ្លើងសញ្ញា, ល្មើសក្នុងការបទ និងវ៉ាជែង, មិនពាក់ខ្សែក្រវ៉ាត់, ដឹកលើសចំណុះ, គ្មានស្លាកលេខ និង និយាយទូរស័ព្ទដោយគ្មានឧករណ៍ភ្ជាប់សំឡេង។ កូវីដ-១៩ និងការរឹតបន្តចរាចរណ៍ សម្ដេច មើលឃើញថា បញ្ហាទាំង២នេះ គឺមិនពាក់ព័ន្ធនោះទេ បើសិនពលរដ្ឋគោរពច្បាប់ គឺគ្មានការខាតបង់ឡើយ រួមទាំងរក្សាសុវត្ថិភាពទៀតផង៕
Tag:
ចរាចរណ៍
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
