ជាតិ
សង្គមជាតិ
អតីតបុគ្គលិក The Great Duke ១២០នាក់បានប្រាក់សំណងហើយ សកម្មភាពអតីតបុគ្គលិករបស់សណ្ឋាគារ The Great Duke (រូបពីទំព័រហ្វេសប៊ុករបស់ សង់ត្រាល់ - CENTRAL)
×
ភ្នំពេញ៖ អតីតបុគ្គលិកសណ្ឋាគារ The Great Duke ចំនួន១២០នាក់ ក្នុងចំណោម១៥២នាក់ បានទៅបើកប្រាក់សំណង ពីក្រសួងការងារ និងបណ្ដុះបណ្ដាលវិជ្ជាជីវៈរួចហើយ គិតត្រឹមថ្ងៃទី ៣១ ខែឧសភា។ នេះបើតាមលោក ទូច កុសល តំណាងសហជីពរបស់អតីតបុគ្គលិក The Great Duke ប្រាប់សារព័ត៌មានថ្មីៗតាមទូរស័ព្ទ នៅថ្ងៃទី៣១ ឧសភានេះ។
ចំណែកអតីតបុគ្គលិក ៣២នាក់ទៀតដែលមិនទាន់ទៅបើកប្រាក់សំណងនោះ គឺដោយសារតែមានអ្នកខ្លះបានបាត់បណ្ណបុគ្គលិក ខ្លះមានធុរៈ និងខ្លះទៀតកំពុងនៅក្រៅប្រទេស។ នេះបើតាមលោក ទូច កុសលដដែល ដោយបានបញ្ជាក់ប្រាប់ថ្មីៗទៀតថា អ្នកដែលបាត់បណ្ណការងារ ក្រសួងនឹងដោះស្រាយក្នុងអំឡុងសប្ដាហ៍ក្រោយ។ បើតាម លោក ទូច កុសល អតីតបុគ្គលិកទាំង១៥២ នឹងទទួលប្រាក់សំណងសរុបប្រមាណ៣២ម៉ឺនដុល្លារ។
ទោះជាយ៉ាងនេះក្តី តំណាងសហជីពរបស់អតីតបុគ្គលិក The Great Duke រូបនេះមិនបានដឹងពីប្រភពថវិកាដែលក្រសួងការងារយកមកទូទាត់នោះទេ។
ក្រសួងការងារ ក៏មិនបញ្ជាក់ពីប្រភពថវិកាដែលផ្ដល់អតីតបុគ្គលិកនេះដែរ។ លោក ហេង សួរ អ្នកនាំពាក្យក្រសួងការងារ ប្រាប់សារព័ត៌មានថ្មីៗតាមបណ្តាញតេឡេក្រាម នៅថ្ងៃទី៣១ ឧសភានេះថា៖«ឥឡូវ យើងដឹងតែការងារបើកលុយឲ្យចប់សិនប៉ុណ្ណោះ។ ឯរឿងនីតិវិធីច្បាប់រវាងក្រសួង និងម្ចាស់សណ្ឋាគារ គឺជារឿងដោយឡែក»។
សូមជម្រាបថា អតីតបុគ្គលិកសណ្ឋាគារ The Great Duke បានប្រមូលគ្នាធ្វើបាតុកម្ម ចំនួន៨លើក គឺតាំងពីចុងខែធ្នូ ឆ្នាំ២០១៩មក ដើម្បីទាមទារឲ្យម្ចាស់សណ្ឋាគារទូទាត់សំណងដល់ពួកគាត់ ក្រោមសណ្ឋាគារនេះ បានប្រកាសបិទទ្វារ។ ការទាមទារទាំងនោះ រួមមានអតីតភាពការងារមុនឆ្នាំ២០១៩ ប្រាក់ជួសឲ្យការឈប់សម្រាកប្រចាំឆ្នាំ និងប្រាក់សំណងជួសឲ្យការជូនដំណឹង៕
© រក្សាសិទ្ធិដោយ thmeythmey.com