អន្តរជាតិ
នយោបាយអន្តរជាតិ
ក្រុមសភាបក្សប្រឆាំងមីយ៉ាន់ម៉ា ស្នើដកប្រធានសភា ពាក់ព័ន្ធការប៉ុនប៉ងកែរដ្ឋធម្មនុញ្ញយោធាខុសនីតិវិធី រូពភាព៖ AFP
×
ក្រុមសភាសំឡេងភាគតិចមីយ៉ាន់ម៉ា ដែលរួមមានទាំងក្រុមសភាកូតាយោធា និងក្រុមបក្សប្រឆាំង បានប្រមែប្រមូលញ្ញត្តិដើម្បីធ្វើសំណើដកប្រធានសភា ដោយចោទប្រកាន់ថាប្រធានអង្គភាពនីតិបញ្ញត្តិរូបនេះ បំពានអំណាច ក្នុងចេតនាកែរដ្ឋធម្មនុញ្ញខុសនីតិវិធី។ នេះ គឺជាចម្រូងចម្រាសថ្មីបន្ថែមទៀត ខណៈសភាមីយ៉ាន់ម៉ា កំពុងតែស្ថិតនៅក្នុងនីតិវិធីនៃការចរចាគ្នាក្នុងការធ្វើវិសោធនកម្មរដ្ឋធម្មនុញ្ញស្រាប់។
តំណាងរាស្ត្របក្សសហភាពរួបរួម និងអភិវឌ្ឍន៍មីយ៉ាន់ម៉ាលោក Sai Tun Sein បានអះអាងថាតំណាងរាស្ត្រដែលមានសមាភាពមកពីបក្ស សហភាពរួបរួម និងអភិវឌ្ឍន៍មីយ៉ាន់ម៉ា, តំណាងរាស្ត្រកូតាយោធាក្នុងសភា និងតំណាងរាស្ត្រជនជាតិភាគតិចផ្សេងទៀតសរុប ១១០រូប បានដាក់បណ្តឹងមួយទៅសភាដើម្បីស្នើដកតំណែងប្រធានសភាពាក់ព័ន្ធនឹងការបំពានអំណាច។ នេះបើយោងតាមការចុះផ្សាយរបស់ Myanmar Times។
តាមប្រភពព័ត៌មានដដែល ក្រុមតំណាងរាស្ត្រទាំងជាង១០០រូប បានចោទប្រកាន់ប្រធានសភាមីយ៉ាន់ម៉ា លោក T Khun Myat ថា បានអនុញ្ញាតឲ្យសមាជិកសភាមួយរូប ដាក់សំណើបន្ទាន់មួយដើម្បីធ្វើវិសោធនកម្មរដ្ឋធម្មនុញ្ញ ដោយពុំបានឆ្លងកាត់នីតិវិធីត្រឹមត្រូវ ក៏ដូចជាបំពាននឹងបទបញ្ជារបស់សភាក្នុងការអនុម័តការបង្កើតគណៈកម្មការធ្វើវិសោធនកម្មរដ្ឋធម្មនុញ្ញទៀតផង។ ក្រុមសភាភាគតិច បានអះអាងថា ប្រធានសភា ព្យាយាមកែរដ្ឋធម្មនុញ្ញដោយមិនអនុវត្តគោលការណ៍របស់រដ្ឋធម្មនុញ្ញ។
អ្វីដែលគួរឲ្យសម្គាល់នោះ ដើម្បីឲ្យសំណើ ឬបណ្តឹងនេះអាចទទួលបានជោគជ័យ តាមនីតិវិធីរបស់មីយ៉ាន់ម៉ាទាមទារឲ្យមានគាំទ្រពីសភាទាំងមូលយ៉ាងហោចណាស់ ពីរភាគបី នៃសំឡេងទាំងអស់របស់សភា តាមរយៈការបោះឆ្នោតដោយសម្ងាត់។
ជុំវិញបញ្ហានេះដែរ ក្រុមតំណាងរាស្ត្រនៃបក្សអំណាចរបស់ លោកស្រី អ៊ុង សានស៊ូជី ដែលជាអ្នកបោះឆ្នោតតែងតាំងប្រធានសភារូបនេះ ក៏មិនបាននៅស្ងៀមដែរ។ លោក Aung Kyi Nyunt សមាជិកគណៈកម្មាធិការកណ្តាលរបស់បក្សកាន់អំណាចសម្ព័ន្ធជាតិដើម្បីប្រជាធិបតេយ្យ បានអះអាងថា ក្រុមតំណាងសំឡេងភាគច្រើនក្នុងសភារបស់លោក នឹងឈរនៅខាងប្រធានសភា T Khun Myat ។
លោក បានគូសបញ្ជាក់ថា លោក T Khun Myat បានបំពេញតួនាទីយ៉ាងល្អក្នុងនាមជាប្រធានសភាមីយ៉ាន់ម៉ារួចទៅហើយ។ សម្រាប់មន្ត្រីជាន់ខ្ពស់បក្សកាន់អំណាចរូបនេះ ការណ៍ដែលក្រុមតំណាងរាស្ត្រសំឡេងភាគតិចក្នុងសភាធ្វើបែបនេះ គឺមានចេតនាបំផ្លាញកេរ្តិ៍ឈ្មោះរបស់ប្រធានសភា ជាជាងការចង់ដកតំណែងរបស់លោក។ លោក យល់ថា នេះ ជារឿងនយោបាយច្រើនជាង។
គួរជម្រាបផងដែរថា ក្តីបំណងធំមួយរបស់បក្សលោកស្រី អ៊ុងសាន ស៊ូជី ក្នុងពេលកាន់តែអំណាច គឺកែប្រែរដ្ឋធម្មនុញ្ញ ដែលធ្វើដោយក្រុមយោធាកន្លងមក ឲ្យស្របតាមលក្ខខណ្ឌប្រជាធិបតេយ្យវិញ។ ក៏ប៉ុន្តែមកពេលនេះ រដ្ឋាភិបាលរបស់លោកស្រី ក៏ដូចជាក្រុមសភាសំឡេងភាគច្រើនរបស់លោកស្រី នៅតែមិនទាន់អាចធានាបាននូវការធ្វើវិសោធនកម្មបន្ថយអំណាចយោធាក្នុងនយោបាយបានឡើយ ដ្បិតក្រុមទាំងនេះ នៅតែបន្តជំទាស់ ក្នុងនីតិវិធីផ្សេងៗក្នុងការសម្រេចកែប្រែ៕
Tag:
មីយ៉ាន់ម៉ា
នយោបាយ
© រក្សាសិទ្ធិដោយ thmeythmey.com