COVID-19៖ ទោះអ្នកស្លាប់និងឆ្លងនៅតែច្រើន បង់ក្លាដែសសម្រេចបើកប្រទេសឡើងវិញ

COVID-19

អន្តរជាតិ

COVID-19៖ ទោះអ្នកស្លាប់និងឆ្លងនៅតែច្រើន បង់ក្លាដែសសម្រេចបើកប្រទេសឡើងវិញ

01, Jun 2020 , 11:48 am

រូបភាព

ក្រោយការប្រកាសដកហូតបញ្ជាបិទប្រទេស ក្នុងរដ្ឋធានី ដាហ្កា មនុស្សម្នាបានសម្រុកជិះរថភ្លើង ហើយចរាចរណ៍តាមដងផ្លូវផ្ដើមកកស្ទះឡើងវិញ (AFP)

ដោយ:

បង់ក្លាដែស បានសម្រេចដកហូតបទបញ្ជាបិទប្រទេសទប់ស្កាត់ COVID-19 កាលពីថ្ងៃទី ៣១ ខែឧសភា ដោយអនុញ្ញាតឲ្យពលរដ្ឋរាប់លាននាក់ត្រលប់ទៅធ្វើការវិញក្នុងបណ្ដាទីក្រុងណែនណាន់តាន់តាប់។ ការសម្រេចចិត្តនេះ ធ្វើឡើងទោះជាបង់ក្លាដែសបន្តរកឃើញករណីឆ្លងនិងស្លាប់ខ្ពស់ដោយសារជំងឺនេះក្ដី។

«បទបញ្ជាបិទប្រទេស ត្រូវបានសម្រេចដកហូត ហើយយើងកំពុងឆ្ពោះទៅរកជីវិតប្រក្រតីរបស់យើងវិញ»។ អ្នកនាំពាក្យនាយកដ្ឋានសុខាភិបាលបង់ក្លាដែស អ្នកស្រី Nasima Sultana បញ្ជាក់បែបនេះ ដោយទទូចឲ្យពលរដ្ឋដែលត្រលប់ទៅធ្វើការវិញ ពាក់ម៉ាស់ និងរក្សាគម្លាតសុវត្ថិភាពរវាងបុគ្គលនិងបុគ្គល។

ការប្រកាសដកហូតនេះ កើតឡើងខណៈប្រទេសបង់ក្លាដែស បានរាយការណ៍ករណីឆ្លងខ្ពស់បំផុតប្រចាំថ្ងៃ កាលពីថ្ងៃទី៣១ ខែឧសភា ជាមួយករណីឆ្លង COVID-19 ថ្មីចំនួន២៥៤៥នាក់ និងអ្នកស្លាប់ ៤០នាក់។ ប្រទេសក្នុងតំបន់អាស៊ីខាងត្បូងនេះ កាលពីថ្ងៃសុក្រសប្តាហ៍មុន បានទទួលកម្ចីអាសន្នជំងឺរាតត្បាតសកលពីមូលនិធិរូបិយបណ្ណអន្តរជាតិ (IMF) ។

ក្រោយការប្រកាសដកហូតបញ្ជាបិទប្រទេស ក្នុងរដ្ឋធានី ដាហ្កា មនុស្សម្នាបានសម្រុកជិះរថភ្លើង ហើយចរាចរណ៍តាមដងផ្លូវផ្ដើមកកស្ទះឡើងវិញ។ នោះក៏ព្រោះតែពលរដ្ឋបង់ក្លាដែសរាប់លានត្រលប់ទៅប្រកបការងារប្រចាំថ្ងៃពួកគេវិញ។ នេះគឺជាអនុញ្ញាតឲ្យពលរដ្ឋរាប់លាននាក់ទៅធ្វើការវិញ ក្រោយការរឹតត្បិតរាប់ខែ ដែលប៉ះពាល់ធ្ងន់ធ្ងរដល់សេដ្ឋកិច្ច។

ពលរដ្ឋបង់ក្លាដែសខ្លះបានពាក់ម៉ាស់ស្រោមដៃ និងម៉ាស់ ខណៈពួកគេធ្វើដំណើរទៅការិយាល័យពួកគេ ខណៈអ្នកដទៃទៀត បានអនុវត្តគម្លាតសុវត្ថិភាពនៅពេលតម្រុងជួរក្រៅសាខាធនាគារ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ។

ចំណែកនៅស្ថានីយ៍នាវាចម្លងក្នុងទីក្រុង Barishal ភាគខាងត្បូងនៃទីក្រុងដាក្កា អ្នកដំណើរយ៉ាងកុះករបានសម្រុកជិះឆ្លងទន្លេចូលរដ្ឋធានី។ អ្នកដំណើរម្នាក់ប្រាប់ AFP ថា៖«ខ្ញុំបានព្យាយាមចៀសវាងកន្លែងមានមនុស្សច្រើន នៅពេលខ្ញុំដើរទៅការិយាល័យខ្ញុំ។ ក៏ប៉ុន្តែការរក្សាគម្លាតសុវត្ថិភាព គឺពុំអាចទៅរួចដែលក្នុងទីក្រុងដាក្កា ដ៏ណែនណាន់តាន់តាប់»។

សូមបញ្ជាក់ថា ការរឹតត្បិតនៃការចល័តទប់ស្កាត់ COVID-19 ដែលបានដាក់កាលពីថ្ងៃទី២៦ ខែមីនា ត្រូវបានផ្ដើមបន្ធូរបន្ថយជាបណ្ដើរៗក្នុងពេលប៉ុន្មានសប្តាហ៍ចុងក្រោយ ខណៈគ្រឹះស្ថានអប់រំប៉ុណ្ណោះ នៅបន្តបិទទ្វារ។ មកទល់ពេលនេះ ប្រទេសដែលមានប្រជាជនសរុប១៦៨លាននាក់នេះ បានរាយការណ៍ករណីឆ្លង ៤៧១៥១ករណី និងស្លាប់ ៦៥០នាក់៕