ផ្លូវ៣៤ខ្សែនៅខេត្តព្រះសីហនុ ដែលចំណាយថវិកាជិត៣០០លានដុល្លារ ស្ថាបនាបាន៩០ភាគរយហើយ

ជាតិ

សង្គមជាតិ

ផ្លូវ៣៤ខ្សែនៅខេត្តព្រះសីហនុ ដែលចំណាយថវិកាជិត៣០០លានដុល្លារ ស្ថាបនាបាន៩០ភាគរយហើយ

01, Jun 2020 , 10:59 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ផ្លូវ៣៤ខ្សែនៅខេត្តព្រះសីហនុ ដែលចំណាយថវិកាជិត៣០០លានដុល្លារ ស្ថាបនាបាន៩០ភាគរយហើយ។ នេះបើតាមសម្ដេចនាយករដ្ឋមន្ត្រី ហ៊ុន សែន។

រដ្ឋាភិបាលកម្ពុជា បានសម្រេចបញ្ចេញកញ្ចប់ថវិកាជាតិជិត៣០០លានដុល្លារអាមេរិក ដើម្បីកសាងផ្លូវចំនួន ៣៤ខ្សែ នៅក្នុងខេត្តព្រះសីហនុ ដែលជាផ្លូវប្រណិតភាពដំបូងបំផុតនៅកម្ពុជា។ គិតត្រឹមថ្ងៃទី១ មិថុនា ផ្លូវទាំង ៣៤ខ្សែនេះ សម្រេចបានជាង៩០ភាគរយហើយ ។ ផ្លូវនេះ បានចាប់ផ្ដើមសាងសង់កាលពីថ្ងៃទី១៦ ខែ វិច្ឆិកា ឆ្នាំ២០១៩ មក ។

គណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា បានបញ្ជាក់ថា ការស្ថាបនាផ្លូវទាំង៣៤ខ្សែនេះ គឺមានការចូលរួមពីកម្លាំងជំនាញ ដើម្បីដោះស្រាយឱ្យទាន់សភាពការណ៍ ក្នុងនោះមានកងវិស្វកម្ម សម្តេច ហ៊ុន សែន សៀមរាប ស្ថាបនាផ្លូវមហាវិថីជំទាវម៉ៅ ប្រវែង ៩.៣៦៥ម ចំនួន ០១ ខ្សែ។ កងវិស្វកម្ម លេខ ១៧៨ ស្ពានថ្នល់ ស្ថាបនាវិថីឯករាជ្យ ប្រវែង ៥.៣៦៥ម ចំនួន ០១ខ្សែ។ ក្រុមហ៊ុន ហេង សម្បត្តិ ស្ថាបនាមហាវិថីឆ្នេររាម, វិថីអូរត្រេះ, វិថីពូទ្បូវៃ, វិថី២ធ្នូ, វិថី២៨ មិថុនា ប្រវែងសរុប ២៣.៣៦០ម ចំនួន ០៥ខ្សែ។ ក្រុមហ៊ុន រ៉ូយ៉ាល់មេគង្គ ស្ថាបនា មហាវិថីរាមលេខ ៤៥ និងវិថីមិត្តភាពកម្ពុជា-រុស្សី លេខ ៧០៥ ប្រវែងសរុប ១១.៦០៣ម ចំនួន ០២ខ្សែ។

ដោយឡែកក្រុមហ៊ុន សារជីវកម្ម ពិស្ណុការ ស្ថាបនាខ្សែផ្លូវលេខ ៤, ៦, ១២, ៧.១៧, ១៨. ១៩, ២០, ១១ ប្រវែងសរុប ១២.៥៧២ម. ចំនួន ០៩ខ្សែ ។ ក្រុមហ៊ុន SCE ស្ថាបនាវិថីចំណោតអូរត្រាវ លេខ ៤៩ ប្រវែងសរុប ៦.៥០៦ម ចំនួន ១ខ្សែ និង ក្រុមហ៊ុន VT ស្ថាបនាផ្លូវលេខ ១១៥, ១៣៥, ១០២, ១២៦, ៥០២ ប្រវែងសរុប ៥.៥៦២ម ចំនួន ០៥ ខ្សែ។

តាមផែនការគ្រោងទុក «មហាវិថីជំទាវម៉ៅ» គឺជាខ្សែផ្លូវយុទ្ឋសាស្ត្រថ្មីមួយសម្រាប់ដោះស្រាយបញ្ហាចរាចរណ៍ក្នុងការធ្វើដំណើររបស់ប្រជាពលរដ្ឋពីផ្លូវបំបែករាម មកកាន់ក្រុងព្រះសីហនុ ដោយចំណាយរយៈពេលក្រោម ៣០នាទី។ នេះជាការបញ្ជាក់របស់គណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជា។

ថ្លែងក្នុងពិធីជួបសំណេះសំណាលជាមួយមន្ត្រីរាជការ និងក្រុមការងារបច្ចេកទេសស្ថាបនាហេដ្ឋារចនាសម្ព័ន្ធក្នុងក្រុងព្រះសីហនុ នៅថ្ងៃទី១ មិថុនា សម្ដេច ហ៊ុន សែន បានបញ្ជាក់ថា រដ្ឋាភិបាល ក៏ធ្វើឱ្យខេត្តជាប់ឆ្នេរសមុទ្រមួយនេះ មានភាពស៊ីវិល័យទាក់ទាញការវិនិយោគបន្ថែមទៀត ស្របទៅនឹងគោលនយោបាយអភិវឌ្ឍន៍ឧស្សាហកម្ម ក្នុងការប្រែក្លាយឱ្យទៅជាខេត្តឧស្សាហកម្មគំរូពហុបំណង និងជាខេត្តសេដ្ឋកិច្ចរបស់កម្ពុជា៕