COVID-19
អន្តរជាតិ
កូរ៉េខាងជើងដែលអះអាងថា គ្មានករណីឆ្លង COVID-19 បើកសាលារៀនឡើងវិញ ក្មេងៗជនជាតិកូរ៉េខាងជើង ដើរនៅក្នុងទីក្រុងព្យុងយ៉ាង ដោយមានពាក់ម៉ាស់យ៉ាងត្រឹមត្រូវ។ រូបភាព៖ AFP
× កូរ៉េខាងជើង អនុញ្ញាតឲ្យសាលារៀនបើកទ្វារឡើងវិញ នៅដើមខែមិថុនានេះ បន្ទាប់ពីសាលារៀនមួយចំនួន ត្រូវផ្អាកបណ្តោះអាសន្នតាំងពីខែមេសាមកម្ល៉េះ។ ការបើកនេះ ទាមទារឲ្យអ្នកគ្រប់គ្រងសាលា ត្រូវមានវិធានការមួយចំនួន ដើម្បីការពារសិស្សពី COVID-19។ នេះបើតាមការផ្សាយ របស់ទីភ្នាក់ងារព័ត៌មាន Yonhap នៅថ្ងៃទី១ ខែមិថុនា។
កូរ៉េខាងជើង គឺជាប្រទេសមួយ ដែលមានព្រំដែនជាប់ប្រទេសចិន កន្លែងផ្ទុះកូរ៉ូណាវីរុសដំបូងគេបំផុត។ គិតមកទល់ពេលនេះ ពិភពលោកមានករណីឆ្លង COVID-19 ជាង ៦,២លានករណីហើយ ប៉ុន្តែកូរ៉េខាងជើង មិនបានរាយការណ៍ពីករណីអ្នកផ្ទុក COVID-19 ណាមួយឡើយនៅក្នុងប្រទេស។ បើទោះបីជាមិនមានករណីកូរ៉ូណាវីរុសនៅក្នុងប្រទេសក៏ដោយ កូរ៉េខាងជើង បានបិទព្រំដែនរបស់ខ្លួន និងវិធានការទប់ស្កាត់ការរីកសាយភាយ កូរ៉ូណាវីរុសមួយចំនួនទៀត។
តាមពិតទៅ សាលារៀននៅកូរ៉េខាងជើង ត្រូវចូលរៀនក្នុងឆមាសថ្មីតាំងពីខែមេសាម្ល៉េះ ប៉ុន្តែដោយសារបារម្ភពីការរាតត្បាតនៃ COVID-19 កូរ៉េខាងជើង បានលើកពេលចូលរៀនរបស់សិស្សបណ្តោះអាសន្ន។ យ៉ាងណាក៏ដោយ ក៏មានសកលវិទ្យាល័យ និងវិទ្យាល័យមួយចំនួន ត្រូវបានគេអនុញ្ញាតឲ្យបើកទ្វារចូលរៀនតាំងពីពាក់កណ្តាលខែមេសាដែរ។
ចំនួនអ្នកឆ្លងនៅតែមិនទាន់មាន ខណៈប្រទេសជិតខាងដូចជាចិន និងកូរ៉េខាងត្បូង ក៏បានចាប់ផ្តើមបើកសាលាឡើយវិញ អាចជាហេតុផលជំរុញឲ្យកូរ៉េខាងជើងបើកសាលាទាំងអស់នៅទូទាំងប្រទេស។ បើតាមរបាយការណ៍របស់ទីភ្នាក់ងារព័ត៌មាន Yonhap ដែលដកស្រង់តាមវិទ្យុរដ្ឋកូរ៉េខាងជើង ឆមាសថ្មីសម្រាប់ថ្នាក់បឋមសិក្សា ថ្នាក់អនុវិទ្យាល័យ និងសកលវិទ្យាល័យនៅទូទាំងប្រទេស នឹងចាប់ផ្តើមនៅដើមខែមិថុនានេះ ហើយវិធានការសុវត្ថិភាព ត្រូវតែអនុវត្តសម្រាប់ថ្នាក់មតេ្តយ្យ។
តាមរយៈព័ត៌មាននេះដដែល អាជ្ញាធរអប់រំកូរ៉េខាងជើង បានអះអាង សាលារៀនទាំងអស់ត្រូវតែមានកន្លែងវាស់កម្តៅ និងទឹកលាងដៃនៅតាមច្រកទ្វារចូលសាលា។ ចំណែកកម្មករនៅក្នុងសាលារៀន ត្រូវតែគោរពទៅតាមគោលការណ៍ប្រឆាំងនឹងកូរ៉ូណាវីរុស ដែលគេស្នើឲ្យគោរព៕
Tag:
COVID-19
កូរ៉េខាងជើង
© រក្សាសិទ្ធិដោយ thmeythmey.com