សង្គមអន្តរជាតិ
អន្តរជាតិ
ចលនាតវ៉ាហិង្សាលើករណីស្លាប់របស់ George Floyd រាលដាលដល់ក្បែរសេតវិមាន ប៉ូលិសអាមេរិក បាញ់ឧស្ម័នបង្ហូរទឹកភ្នែកទៅលើក្រុមបាតុករ។ រូបភាព៖ AFP
× បាតុកម្មតវ៉ាប្រឆាំងការរើសអើង កាន់តែរីកធំឡើង និងបានរីកសាយដល់សេតវិមានប្រធានាធិបតីអាមេរិក បន្ទាប់ពីករណីស្លាប់ជនជាតិស្បែកខ្មៅម្នាក់ឈ្មោះ លោក George Floyd នៅក្នុងទីក្រុង Minneapolis។ ដោយសារបញ្ហានេះ ក្រុងជាច្រើន បានសម្រេចដាក់បម្រាមគោចរ និងពង្រាយកម្លាំងសមត្ថកិច្ចជាច្រើននាក់ ដើម្បីទប់ស្កាត់បាតុកម្មហិង្សាមួយនេះគិតត្រឹមយប់ថ្ងៃទី៣១ ខែឧសភា ។
បន្ទាប់ពីការស្លាប់របស់លោកGeorge Floyd ជនជាតិអាមេរិកជាច្រើនដែលមានប្រជាជនជនស្បែកខ្មៅរាប់សិបពាន់នាក់នៅក្នុងទីក្រុង Minneapolis បានចេញមកធ្វើបាតុកម្មទាមទារឲ្យអាជ្ញាធរអាមេរិកស្វែងរកយុត្តិធម៌សម្រាប់លោកGeorge Floyd ក៏ដូចជាទាមទារឲ្យមានការបញ្ឈប់សកម្មភាពការរើសអើងពូជសាសន៍នៅក្នុងទឹកដីអាមេរិក។
ថ្លែងប្រាប់អ្នកសារព័ត៌មាន លោកស្រីMuna Abdi ដែលបានចូលរួមបាតុកម្មដែរនោះ បានបញ្ជាក់យ៉ាងដូច្នេះថា៖ « យើងមានកូនប្រុសជាជនជាតិស្បែកខ្មៅ, បងប្រុសជាជនជាតិស្បែកខ្មៅ, មិត្តភក្តិជាជនជាតិស្បែកខ្មៅ យើងមិនចង់ឲ្យពួកគេស្លាប់ទេ។ យើងធុញទ្រាន់នឹងរឿងកើតឡើងដដែលៗបែបនេះណាស់។ ក្នុងជំនាន់នេះ មិនមានសមភាពឡើយ យើងធុញទ្រាន់នឹងការបង្ក្រាបទាំងឡាយ»។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP។
មកទល់ថ្ងៃទី៣១ ខែឧសភា បាតុកម្មបានអូសបន្លាយរយៈពេល ៦ថ្ងៃហើយ ក្រុមបាតុករ បានដុតរថយន្ត បំផ្លាញហាងលក់ទំនិញជាដើម។ តួយ៉ាងហាង Gucci និងហាងនាឡិកាលក់នាឡិកា Rolex នៅក្នុងទីក្រុងញូវយ៉ក ត្រូវរងការខូចខាតយ៉ាងខ្លាំង ដោយសារការវាយបំផ្លាញរបស់ក្រុមបាតុករ។ រដ្ឋបាលរបស់លោកប្រធានាធិបតីអាមេរិក ដូណាស់ ត្រាំ បានហៅក្រុមបាតុករជនជាតិស្បែកខ្មៅថា «ក្រុមភេរវកម្មក្នុងស្រុក» ដែលបង្កឲ្យមានចលាចលនៅក្នុងទឹកដីអាមេរិក។
នៅក្នុងថ្ងៃដដែលនេះ ប៉ូលិសអាមេរិក បានសម្រេចបាញ់ឧស្ម័នបង្ហូរទឹកភ្នែក និងគ្រាប់បែកផ្សែង ដើម្បីបំបែកក្រុមបាតុករ ដែលធ្វើបាតុកម្មនៅជិតសេតវិមានអស់រយៈពេលប៉ុន្មានថ្ងៃ និងដើម្បីបញ្ឈប់ការដុត និងលួចទ្រព្យសម្បត្តិសាធារណៈ និងឯកជនជាដើម។ ក្រៅពីប្រើធម៌ក្តៅ ក្នុងការបង្ក្រាបក្រុមបាតុករ ថ្នាក់ដឹកនាំអាមេរិក នៅតាមតំបន់មួយចំនួន ក៏បានអំពាវនាវឲ្យក្រុមបាតុករសម្រួលអារម្មណ៍ និងបញ្ឈប់ធ្វើបាតុកម្មផងដែរ។
ជាមួយគ្នានេះ បម្រាមគោចរនៅក្នុងប្រទេស ក៏ត្រូវបានអាជ្ញាធរអាមេរិកដាក់ឡើងផងដែរ ក្នុងគោលបំណងទប់ស្កាត់ការធ្វើបាតុកម្ម។ ជាក់ស្តែងទីក្រុងវ៉ាស៊ីនតោន ដាប់បម្រាមគោចរចាប់ពីម៉ោង ១១យប់ ដល់ម៉ោង ៦ព្រឹក ចំណែកទីក្រុង Los Angles បានដាក់បម្រាមគោចរចាប់ពីម៉ោង ៤ល្ងាច ដល់ពេលថ្ងៃរះ។
សូមបញ្ជាក់ថា តាមការចុះផ្សាយរបស់សារព័ត៌មាន New York Times ប្រធានាធិបតីអាមេរិក លោកត្រាំ ត្រូវបានក្រុមទីភ្នាក់ងារសេវាសម្ងាត់ នាថ្ងៃទី២៩ ខែឧសភា ជម្លៀសទៅក្នុងរូងក្រោមដីនៃសេតវិមានយ៉ាងបន្ទាន់ បន្ទាប់ពីបាតុកម្មរបស់ក្រុមជនជាតិស្បែកខ្មៅនៅជិតនោះ៕
Tag:
អាមេរិក
George Floyd
© រក្សាសិទ្ធិដោយ thmeythmey.com