រដ្ឋាភិបាលសាធារណរដ្ឋកូរ៉េ បានបរិច្ចាគឧបករណ៍ធ្វើតេស្តរកជំងឺកូវីដ១៩ (Real Time PCR) ដល់ក្រសួងសុខាភិបាលកម្ពុជា ក្នុងគោលដៅជួយគាំទ្រកិច្ចប្រឹងប្រែងរដ្ឋាភិបាលប្រយុទ្ធប្រឆាំងជំងឺរាតត្បាតសកលនេះ។ ឧបករណ៍តេស្តដែលផលិតផលក្នុងស្រុកកូរ៉េផ្ទាល់ អាចធ្វើតេស្តរក COVID-19បានជាង៨ពាន់ដង និងប្រើពេលត្រឹម៩០នាទីដើម្បីចេញលទ្ធផល ដែលមានភាពជាក់លាក់ខ្ពស់។
ពិធីប្រគល់បរិក្ខារពេទ្យដ៏ចាំបាច់សម្រាប់ប្រយុទ្ធប្រឆាំងជំងឺកូវីដ១៩នេះ បានធ្វើឡើងនៅទីស្តីការក្រសួងសុខាភិបាលកម្ពុជាកាលពីចុងសប្តាហ៍មុន ដោយមានអគ្គរដ្ឋទូតកូរ៉េខាងត្បូងប្រចាំប្រទេសកម្ពុជា លោក Park Heung-Kyeong ជាអ្នកប្រគល់ដោយផ្ទាល់ជូនដល់លោករដ្ឋមន្ត្រីសុខាភិបាល ម៉ម ប៊ុនហេង។ នេះតាមសេចក្តីប្រកាសព័ត៌មានរបស់ស្ថានទូតកូរ៉េខាងត្បូងប្រចាំកម្ពុជា។
ឧបករណ៍នេះ អាចរៀបចំការធ្វើតេស្តរកកូវីដ១៩ បានសរុប៨៦៤០លើក ហើយមានកម្រិតជាក់លាក់ខ្ពស់ (high accuracy) ក្នុងការរកកូវីដ១៩ ។ សេចក្តីប្រកាសព័ត៌មានដដែល សរសេរថា ឧបករណ៍តេស្តនេះ អាចផ្ដល់លទ្ធផលត្រឹម៩០នាទី ហើយរំពឹងថា ជួយសម្របសម្រួលដល់ការធ្វើតេស្តលឿនជាងមុន និងការឆ្លើយតបរបស់រដ្ឋាភិបាលកម្ពុជាប្រឆាំងកូវីដ១៩។
សេចក្តីប្រកាសព័ត៌មាន សង្កត់ធ្ងន់ថា៖«ការបរិច្ចាគពីសំណាក់រដ្ឋាភិបាលសាធារណរដ្ឋកូរ៉េ មានគោលដៅជួយគាំទ្រផ្នែកធ្វើតេស្តរក កូវីដ១៩ដើម្បីធានាសុវត្ថិភាពប្រទេសកម្ពុជា ក៏ដូចជារួមចំណែកបង្ការការរីករាលដាលជំងឺរាតត្បាតកូវីដ១៩»។
បច្ចុប្បន្ន កូវីដ១៩សម្លាប់មនុស្ស ៣៧៦ ៨៩៤ នាក់ និងចម្លងជាង៦,៣លាននាក់នៅទូទាំងពិភពលោក។ បន្ថែមពីការបរិច្ចាគឧបករណ៍តេស្តនេះ រដ្ឋាភិបាលលោកប្រធានាធិបតី មូន ចេអ៊ីន កាលពីដើមខែឧសភា ក៏បានផ្ដល់ជំនួយហិរញ្ញវត្ថុ២០ម៉ឺនដុល្លារឲ្យក្រសួងសុខាភិបាលកម្ពុជា ដើម្បីជួយគាំទ្រដល់កិច្ចប្រឹងប្រែងដោះស្រាយបញ្ហា កូវីដ១៩ផងដែរ។
សូមបញ្ជាក់ ចាប់តាំងពីឆ្នាំ ២០១៧ មក ទីភ្នាក់ងារកិច្ចសហប្រតិបត្តិការអន្តរជាតិកូរ៉េ (KOICA) បានជួយគាំទ្រកិច្ចការដ៏សកម្មរបស់ក្រសួងសុខាភិបាលកម្ពុជាដើម្បីបង្ការ ស្វែងរក និងឆ្លើយតបប្រឆាំង ជំងឺឆ្លងនានា តាមរយៈភាពជាដៃគូជាមួយមជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិក (US CDC) ។ គម្រោងដំណាក់កាលទី២ ដែលមានឈ្មោះថា«ពង្រឹងប្រព័ន្ធសុខាភិបាលដើម្បីបង្ការ ស្វែងរក និងឆ្លើយតបប្រឆាំងជំងឺឆ្លង» នឹងត្រូវចាប់ផ្ដើមក្នុងឆ្នាំនេះ ហើយកិច្ចគាំទ្រនេះ នឹងត្រូវបន្តជាមួយថវិកាមូលនិធិសរុប ៨,៥លានដុល្លារសម្រាប់រយៈពេល៦ឆ្នាំ។
បច្ចុប្បន្ន ប្រទេស កម្ពុជា មានករណីឆ្លងកូវីដ១៩ សរុប ១២៥ករណី ក្នុងនោះអ្នកជំងឺ១២៣នាក់ជាសះស្បើយ។ អ្នកជំងឺ២នាក់ប៉ុណ្ណោះ កំពុងសម្រាកព្យាបាលនៅមន្ទីរពេទ្យ។ កម្ពុជាគ្មានករណីស្លាប់ដោយសារជំងឺនេះឡើយ។
ជំនួយបរិក្ខារពេទ្យរបស់រដ្ឋាភិបាលកូរ៉េខាងត្បូង បានផ្ដល់ឲ្យស្របពេលដែលប្រមុខរដ្ឋាភិបាលកម្ពុជា បានក្រើនរំឭកឱ្យពលរដ្ឋប្រុងប្រយ័ត្នរលកទី២ នៃជំងឺកូវីដ១៩ហើយសង្កត់ធ្ងន់ថា រដ្ឋាភិបាលត្រៀមលក្ខណៈជានិច្ចដើម្បីទប់ស្កាត់។
ត្រង់ចំណុចនេះ សម្តេចនាយករដ្ឋមន្ត្រី ហ៊ុន សែន បានបញ្ជាក់កាលពីសប្តាហ៍មុនថា៖«សូមកុំឱ្យមានវិប្បដិសារីកើតឡើង ព្រោះតែការធ្វេសប្រហែសមើលស្រាលចំពោះស្ថានការណ៍បច្ចុប្ប្នន្ន។ ទោះបីចំនួនអ្នកឆ្លងក្នុងប្រទេសយើងមានតិចមែន តែយើងត្រូវបង្កើនការយកចិត្តទុកដាក់ខ្ពស់ នឹងត្រៀមទប់ស្កាត់គ្រប់ពេល ជាពិសេសនៅក្នុងរលកទី២នៃការងើបឡើងវិញនៃជំងឺឆ្លងរលាកផ្លូវដង្ហើមកូវីដ១៩ ដ៏កាចសាហាវបំផុតនេះ»៕