ជាតិ
នាយករដ្ឋមន្ត្រីកម្ពុជា ស្នើឲ្យជប៉ុន ពន្លឿនសាងសង់ផែទឹកជ្រៅ នៅព្រះសីហនុ រូបពីក្រសួងសាធារណការនិងដឹកជញ្ជូន
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ស្នើឲ្យជប៉ុនពន្លឿនគម្រោងសាងសង់កំពុងផែទឹកជ្រៅនៅព្រះសីហនុ ដើម្បីងាយស្រួលដឹកជញ្ជូនទំនិញពីប្រទេសផ្សេងចូលកម្ពុជដោយផ្ទាល់។
ថ្លែងក្នុងពិធីសំណេះសំណាលជាមួយមន្រី្តរាជការ និងក្រុមការងារស្ថាបនាផ្លូវខេត្តព្រះសីហនុ កាលពីថ្ងៃទី១ មិថុនា សម្តេចនាយករដ្ឋមន្ត្រី បញ្ជាក់ដូច្នេះថា៖«ជប៉ុន បានផ្ដល់ហិរញ្ញប្បទាននិងជួយយើងឲ្យពង្រីកកំពង់ផែទឹកជ្រៅ ដែលខ្ញុំបាននិយាយជាមួយនាយករដ្ឋមន្រី្តលោក ស៊ីនហ្សូ អាបេ ឲ្យបន្តការខិតខំ ដើម្បីជំរុញយ៉ាងម៉េចឲ្យកំពង់ផែរបស់យើងនេះ ក្លាយទៅជាកំពុងផែទឹកជ្រៅ ដែលមានជម្រៅ ដូចជាជម្រៅ១៤ម៉ែត្រកន្លះ ឲ្យបានឆាប់បំផុត ដើម្បីជៀសវាងការដឹកជញ្ជូន ដែលត្រូវផ្ទេរនៅសិង្ហបុរី ឬផ្ទេរនៅវៀតណាមរួចហើយ ត្រូវដឹកចូលមកកម្ពុជា»។
មូលហេតុដែលប្រមុខរដ្ឋាភិបាលកម្ពុជា ជំរុញឲ្យជប៉ុនពន្លឿនគម្រោងសាងសង់ផែទឹកជ្រៅនេះ ព្រោះវាជាផ្នែកអភិវឌ្ឍន៍ពហុវិស័យ ទាំងសេដ្ឋកិច្ច និងទេសចរណ៍។ បើតាមសម្ដេច មានប្រសាសន៍ថា ខេត្តព្រះសីហនុមានតំបន់សេដ្ឋកិច្ចពិសេសធំៗពីរ ដែលវិនិយោគដោយចិននិងជប៉ុន។
កាលពីឆ្នា២០១៥ ជប៉ុនផ្ដល់ប្រាក់កម្ចីជាង ៧៤លានដុល្លារ សម្រាប់គម្រោងអភិវឌ្ឍន៍ចំណតផែពហុបំណង នៅកំពង់ផែក្រុងព្រះសីហនុ ដើម្បីប្រតិបត្តិការលើកដាក់ទំនិញរាយ និងទំនិញទូទៅ និងការសាងសង់មូលដ្ឋានផ្គត់ផ្គង់ការរុករករ៉ែក្នុងដែនសមុទ្រ។
ចាប់តាំងពីឆ្នាំ១៩៩៩មក ជប៉ុនបានផ្ដល់ប្រាក់កម្ចីដល់កំពង់ផែស្វយ័តក្រុងព្រះសីហនុនេះ ជាង១៧៨លានដុល្លារ សម្រាប់ការអភិវឌ្ឍន៍គម្រោងនានាក្នុងកំពង់ផែនេះ។ ការសាងសងកំពង់ផែនេះ គឺដើម្បីប្រតិបត្តិការលើកដាក់ទំនិញរាយ និងទំនិញទូទៅ និងការសាងសង់មូលដ្ឋានផ្គត់ផ្គង់ការរុករករ៉ែក្នុងដែនសមុទ្រ៕
© រក្សាសិទ្ធិដោយ thmeythmey.com