សង្គមអន្តរជាតិ
អន្តរជាតិ
ក្រុង Yamato នៅជប៉ុន គ្រោងហាមប្រើទូរសព្ទនៅពេលដើរតាមផ្លូវ
× ដំណើរថ្មើរជើងជាមួយទូរសព្ទនៅជាប់នឹងដៃ បានក្លាយជាទម្លាប់របស់មនុស្សជាច្រើន ហើយវាក៏បានបង្កឲ្យមានគ្រោះថ្នាក់ផ្សេងៗផងដែរ។ ដើម្បីទប់ស្កាត់បញ្ហានេះ សមាជិករដ្ឋបាលក្រុង Yamato ប្រទេសជប៉ុន ត្រៀមពិភាក្សាដើម្បីឈានទៅសម្រេចហាមប្រាម ការប្រើប្រាស់ទូរសព្ទដៃនៅពេលដើរតាមផ្លូវ។
សំណើ បានបញ្ជូនទៅកាន់ក្រុមប្រឹក្សាក្រុង Yamato កាលពីថ្ងៃចន្ទ ទី១ ខែមិថុនា ហើយគេរំពឹងថា វាទទួលបានការអនុម័តនៅចុងខែ។ លោក Masaaki Yasumi សមាជិករដ្ឋបាលក្រុងម្នាក់ បានលើកឡើងប្រាប់ AFP ថា៖ «ប្រសិនបើវិធានការ ត្រូវបានអនុម័ត នោះ Yamato នឹងក្លាយជាក្រុងដំបូងនៅជប៉ុន ដែលហាមប្រាមប្រើទូរសព្ទនៅពេលដើរ»។
Yamato ដែលស្ថិតនៅមិនឆ្ងាយពីក្រុងតូក្យូនោះ ជាទីប្រជុំជនដ៏ធំមួយផងដែរ។ បើតាមលោក Yasumi មនុស្សជាច្រើនកាន់តែនិយាយប្រើប្រាស់ស្មាតហ្វូន នៅពេលដើរតាមផ្លូវ ហើយចំនួននៃគ្រោះថ្នាក់ក៏មានច្រើនដូចគ្នាផងដែរ។ លោកបានលើកឡើងយ៉ាងដូច្នេះថា៖ «យើងចង់លុបបំបាត់ទម្លាប់នេះ នៅក្នុងទីក្រុង»។
តាមពិតទៅវិធានការនេះ នឹងមិនមានការដាក់ពិន័យនោះឡើយ ពីព្រោះអាជ្ញាធរទទួលស្គាល់ពីភាពលំបាក ក្នុងការទាញមនុស្សឲ្យផ្តាច់ពីទូរសព្ទដៃ ប៉ុន្តែអាជ្ញាធរនឹងពង្រីកយុទ្ធនាការអប់រំ ដើម្បីឲ្យពលរដ្ឋយល់ដឹងពីគ្រោះថ្នាក់នៃទង្វើនេះ។ លោក Yasumi បានលើកឡើងថា៖ «យើងសង្ឃឹមថា ការហាមប្រាមនេះ នឹងជំរុញមនុស្សឲ្យភ័យខ្លាច នៅពេលដែលពួកគេប្រើប្រាស់ទូរសព្ទដៃពេលដើរតាមផ្លូវ»។
ការសិក្សាមួយ បង្ហាញថា អ្នកដើរចុចទូរសព្ទជាង៨០ភាគរយ មិនបានផ្ចង់អារម្មណ៍មើលទៅមុខនោះឡើយ។ ករណីទាំងនេះ បណ្តាលឲ្យបុកគ្នា ជាន់វត្ថុផ្សេងៗ រួមទាំងខូចខាតទូរសព្ទផងដែរ។ កាន់តែគ្រោះថ្នាក់បន្ថែមទៀតនោះ មានមនុស្សចំនួនបានប្រើប្រាស់ស្មាតហ្វូន ខណៈខ្លួនកំពុងជិះកង់។
ទោះបីជាមិនមានច្បាប់ក៏ដោយ ប៉ុន្តែអ្នកដែលបង្កគ្រោះថ្នាក់មួយចំនួន ដោយសារតែការប្រើប្រាស់ស្មាតហ្វូន ក៏ធ្លាប់រងពិន័យ និងបង់ជំងឺចិត្តទៅដល់ជនរងគ្រោះផងដែរ៕
© រក្សាសិទ្ធិដោយ thmeythmey.com