ជាតិ
ព្រំដែន
កម្ពុជា ប្រាប់វៀតណាម ឲ្យរុះរើតង់៣១កន្លែងលើតំបន់ព្រំដែនមិនទាន់ឯកភាពគ្នាឲ្យបានឆាប់ កម្លាំងនគរបាលខេត្តកណ្តាល ចុះពិនិត្យតាមបណ្តោយព្រំដែន កាលពីថ្ងៃទី២៦ ខែមេសា ឆ្នាំ២០២០ កន្លងទៅ ហើយឃើញតង់យោធាវៀតណាម(រូបពីស្នងការដ្ឋាននគរបាលខេត្តកណ្តាល)
× កម្ពុជា បានប្រាប់ឲ្យវៀតណាម រុះរើតង់ចំនួន៣១កន្លែង ដែលខ្លួនបានបោះនៅលើតំបន់ព្រំដែនមិនទាន់ឯកភាពគ្នា ក្នុងខេត្តកណ្តាលប្រទេសកម្ពុជា ជាប់នឹងខេត្តអានយ៉ាងប្រទេសវៀតណាម ចេញឲ្យបានឆាប់។ ការបញ្ជាក់ដូច្នេះរបស់កម្ពុជា ធ្វើឡើងនៅក្នុងជំនួបពិភាក្សាមួយនៃថ្ងៃទី១ មិថុនា រវាងលោកស្រី អ៊ាត សោភា រដ្ឋលេខាធិការក្រសួងការបរទេសកម្ពុជា និងឯកអគ្គរដ្ឋទូតវៀតណាមប្រចាំកម្ពុជា លោក Vu Quang Minh ។
តាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចេញផ្សាយនៅថ្ងៃទី២ មិថុនា ក្នុងជំនួបនោ ភាគីកម្ពុជា ក៏បញ្ជាក់ពីការបន្តរក្សាស្ថានភាពដើមមិនកែប្រែលើតំបន់នោះផងដែរ។ ក្រសួងការបរទេសកម្ពុជា បញ្ជាក់ក្នុងសេចក្តីប្រកាសព័ត៌មានយ៉ាងដូច្នេះ៖« ស្នើឲ្យភាគីវៀតណាមរុះរើតង់ទាំងអស់ចេញឲ្យបានឆាប់ ហើយបន្តរក្សាស្ថានភាពដើមមិនកែប្រែលើតំបន់នោះ រហូតដល់គណៈកម្មការព្រំដែននៃប្រទេសទាំង២ ដោះស្រាយកំណត់ខ្សែព្រំដែនជាក់លាក់ជាស្ថាពរនៅតំបន់នោះ ដើម្បីប្រែក្លាយតំបន់ព្រំដែនប្រកបដោយសន្តិភាព មិត្តភាព សហប្រតិបត្តិការ និងការអភិវឌ្ឍន៍ ជាប្រយោជន៍រួមសម្រាប់ប្រជាជាតិនៃប្រទេសទាំង២»។
សូមបញ្ជាក់ថា កាលពីថ្ងៃទី១៣ ឧសភា កម្ពុជា បានធ្វើកំណត់ទូតតវ៉ាពីការបោះតង់របស់វៀតណាមចំនួន៣១កន្លែង លើតំបន់ព្រំដែនដែលមិនទាន់ឯកភាពគ្នា ក្នុងខេត្តកណ្តាលនៃប្រទេសកម្ពុជា ជាប់នឹងខេត្តអានយ៉ាងនៃប្រទេសវៀតណាម ដោយស្នើឲ្យភាគីវៀតណាម រុះរើតង់នោះចេញ និងបញ្ឈប់សកម្មភាពនានា ដើម្បីរក្សាស្ថានភាពដើមមិនកែប្រែនៅក្នុងតំបន់នេះ ស្របតាមសេចក្តីប្រកាសរួមចុះថ្ងៃទី១៧ ខែមករា ១៩៩៥ សន្ធិសញ្ញាបំពេញបន្ថែម ឆ្នាំ២០០៥ និងកិច្ចព្រមព្រៀងពាក់ព័ន្ធព្រំដែនប្រទេសទាំង២។
តាមក្រសួងការបរទេសកម្ពុជាដដែល នៅថ្ងៃទី២៨ ខែឧសភា ឆ្នាំ២០២០ ក្រសួងការបរទេសវៀតណាម បានឆ្លើយតបថា ការបោះតង់នៅតាមព្រំដែនខេត្តអានយ៉ាងនេះ គឺជាវិធានការបណ្តោះអាសន្នចាំបាច់ ដើម្បីទប់ស្កាត់ឲ្យទាន់ពេលវេលា នៃការធ្វើដំណើរឆ្លងកាត់ព្រំដែន ក្នុងអំឡុងពេលនៃការរាលដាលជំងឺកូវីដ-១៩។ ក្រសួងការបរទេសវៀតណាមបន្តថា ការបោះតង់នោះមិនប៉ះពាល់ដល់ការខណ្ឌសីមា និងបោះបង្គោលព្រំដែន លើតំបន់ព្រំដែនរវាងប្រទេសទាំង២នោះទេ ហើយក៏សន្យារុះរើតង់ដែលបានបោះបណ្តោះអាសន្នទាំងអស់ ចេញផងដែរ។
នៅថ្ងៃទី១ ខែមិថុនានេះ ក្រសួងការបរទេសកម្ពុជា បានអញ្ជើញឯកអគ្គរដ្ឋទូតវៀតណាមប្រចាំកម្ពុជា លោក Vu Quang Minh មកជួបពិភាក្សា និងស្នើជំរុញការសន្យានេះ៕
© រក្សាសិទ្ធិដោយ thmeythmey.com