អន្តរជាតិ
×![]()
ដោយ: តន ចាន់រិទ្ធារ៉ា
ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានសម្រេចចិត្តផ្អាកការលុបចោលកិច្ចព្រមព្រៀងយោធាជាមួយអាមេរិក ដោយលើកហេតុផលពីការវិវត្តស្ថានការណ៍នយោបាយ និងបញ្ហាផ្សេងទៀតក្នុងតំបន់។ អាមេរិក ក៏ស្វាគមន៍ការសម្រេចចិត្តនេះ។ 
រដ្ឋមន្ត្រីការបរទេសហ្វីលីពីន Teodoro Locsin ជាអ្នកប្រកាសការសម្រេចចិត្តរបស់ប្រធានាធិបតី រ៉ូឌ្រីហ្គោ ឌូទើតេ ក្នុងការបន្តសុពលភាពកិច្ចព្រមព្រៀងយោធា Visiting Forces Agreement (VFA) ជាមួយអាមេរិក។ នេះជាការសម្រេចចិត្តបកក្រោយ៨០ដឺក្រេរបស់លោក ឌូទើតេ ដែលតែងនិយាយរិះគន់លោកខាងលិច ពិសេសអាមេរកមិនសំចៃមាត់។
កាលពីខែកុម្ភៈ លោក ឌូទើតេ ប្រាប់អាមេរិកពីបំណងបញ្ចប់កិច្ចព្រមព្រៀង VFA បន្ទាប់ពីរដ្ឋបាលប្រធានាធិបតី ដូណាល់ ត្រាំ មិនផ្ដល់ទិដ្ឋាការឲ្យសមាជិកព្រឹទ្ធសភាម្នាក់ដែលជាអតីតមេប៉ូលិសដឹកមុខក្នុងយុទ្ធនាការបង្ក្រាបគ្រឿងញៀន និងជាសម្ព័ន្ធមិត្តម្នាក់របស់លោក ឌូទើតេ ផ្ទាល់។ សង្គ្រាមគ្រឿងញៀននេះហើយដែលនាំឲ្យទំនាក់ទំនងហ្វីលីពីន និងអាមេរិកល្អក់កកររហូតមានការប្រមាថមេដឹកនាំអាមេរិកដោយលោក ឌូទើតេ ផងដែរ។
ក្រោយការប្រកាសនេះ ដំណើរការបញ្ចប់កិច្ចព្រមព្រៀងដែលមានរយៈពេល៦ខែ ក៏ចាប់ផ្ដើម ហើយត្រូវបញ្ចប់នៅខែសីហាខាងមុខ។ ពីរខែមុនកិច្ចព្រមព្រៀងចប់ ហ្វីលីពីន ក៏ដូរចិត្តវិញ។ រដ្ឋមន្ត្រីការបរទេសហ្វីលីពីន Teodoro Locsin និយាយថា ផែនការបញ្ចប់កិច្ចព្រមព្រៀងយោធាដែលអនុញ្ញាតឲ្យកងទ័ពអាមេរិកចូលទឹកដីហ្វីលីពីនដើម្បីធ្វើសមយុទ្ធ ឬបេសកកម្មខ្លះ នឹងត្រូវផ្អាកសិនយ៉ាងហោចណាស់៦ខែទៀតក្រោមការណែនាំរបស់លោក ឌូទើតេ ។
«ជាមួយនឹងការវិវត្តផ្នែកនយោបាយ និងការវិវត្តផ្សេងទៀតក្នុងតំបន់ ការផ្ដាច់កិច្ចព្រមព្រៀង ត្រូវលើកលែងសិន។» លោក Teodoro Locsin សរសេរបែបនេះលើ Twitter របស់លោក ដោយមានភ្ជាប់កំណត់ទូតផ្ញើឲ្យអាមេរិកផងដែរ។ ប្រមុខការទូតហ្វីលីពីន មិនបញ្ជាក់ឲ្យច្បាស់អ្វីទៅជាការវិវត្តនៅក្នុងតំបន់ឡើយ។
អាមេរិក បានស្វាគមន៍ការសម្រេចចិត្តរបស់ហ្វីលីពីនដែលខ្លួនទទួលបាននៅថ្ងៃទី១ ខែមិថុនា។ ស្ថានទូតអាមេរិកប្រចាំរដ្ឋធានីម៉ានីល បញ្ជាក់ថា សម្ព័ន្ធភាពយូរអង្វែងទ្វេភាគីនេះ ផ្ដល់ប្រយោជន៍ឲ្យគ្នាទៅមក ហើយអាមេរិករំពឹងធ្វើការឲ្យជិតស្និទ្ធលើកិច្ចសហប្រតិបត្តិការសន្តិសុខ និងការពាររជាតិជាមួយហ្វីលីពីន។
តាំងពីចូលកាន់តំណែងមក លោក ឌូទើតេ មានជំហរមិនត្រូវគ្នាជាមួយរដ្ឋាភិបាលអាមេរិកឡើយតាំងពីសម័យប្រធានាធិបតី បារ៉ាក់ អូបាម៉ា មក។ លោក ឌូទើតេ បែរជាងាករកចិនខ្លាំង ដោយទុកជម្លោះសមុទ្រចិនខាងត្បូងដោយឡែក។ យ៉ាងណាមិញ ចិននៅតែពង្រីកឥទ្ធិពលខ្លាំង ដែលបង្កក្ដីបារម្ភសម្រាប់ហ្វីលីពីនវិញ ទោះទំនាក់ទំនងល្អប្រសើរក្ដី៕
Tag:
ហ្វីលីពីន
អាមេរិក
រ៉ូឌ្រីហ្គោ ឌូទើតេ
© រក្សាសិទ្ធិដោយ thmeythmey.com
