អង់គ្លេស បើកផ្លូវ​ឲ្យ​ពលរដ្ឋ​ហុងកុង​លាន​នាក់​ទទួល​សញ្ជាតិ បើ​ចិន​ដាក់ឲ្យ​ប្រើ​ច្បាប់​សន្តិសុខ​
សង្គមអន្តរជាតិ​
អន្តរជាតិ
អង់គ្លេស បើកផ្លូវ​ឲ្យ​ពលរដ្ឋ​ហុងកុង​លាន​នាក់​ទទួល​សញ្ជាតិ បើ​ចិន​ដាក់ឲ្យ​ប្រើ​ច្បាប់​សន្តិសុខ​
03, Jun 2020 , 3:05 pm        
រូបភាព
លោកនាយករដ្ឋមន្ត្រីចក្រភពអង់គ្លេស បូរីស ចនសុន ថ្លែងនាពេលកន្លងទៅ (AFP)
លោកនាយករដ្ឋមន្ត្រីចក្រភពអង់គ្លេស បូរីស ចនសុន ថ្លែងនាពេលកន្លងទៅ (AFP)
​ប្រមុខ​រដ្ឋាភិបាល​ចក្រ​ភព​អង់គ្លេស លោក បូរី​ស ច​ន​សុន បញ្ជាក់ថា លោក​នឹង​ផ្ដល់​ទិដ្ឋាការ​ឲ្យ​ប្រជាជន​ហុងកុង​រាប់លាន​នាក់ និង​ឱកាស​ទទួល​សញ្ជាតិ​អង់គ្លេស ប្រសិនបើ​ចិន​បន្ត​នីតិវិធី​ជាមួយ​សេចក្តីស្នើច្បាប់​សន្តិសុខ​ជាតិ​ហុងកុង​របស់ខ្លួន​។ ដូចគ្នា​នឹង​អង់គ្លេស សហរដ្ឋអាមេរិក ក៏​កំពុង​ពិចារណា​ស្វាគមន៍​ពលរដ្ឋ​ហុងកុង​ផងដែរ តាមរយៈ​កែស​ម្រួ​ក​គោលការណ៍​អន្តោប្រវេសន៍​ផងដែរ​។

 
​ក្នុង​អត្ថបទ​វិចារ​ណា​កថា​ផ្សាយ​លើ​កាសែត The Times និង​កាសែត South China Morning Post នៅ​ថ្ងៃទី​២ ខែមិថុនា នាយករដ្ឋមន្ត្រី បូរី​ស ច​ន​សុន សរសេរថា​៖«​មនុស្ស​ច្រើន​ក្នុង​ទីក្រុង​ហុងកុង ភ័យខ្លាច​ថា សេរីភាព​ពួកគេ ដែល​ចិន​សន្យា​គាំទ្រ កំពុង​រង​គំរាមកំហែង​»​។ 
 
​លោក សរសេរ​បន្តថា ប្រសិនបើ​ចិន​រឹងទទឹង ហើយ​បញ្ជាក់​ការភ័យខ្លាច​របស់​ពល​រដ្ឋ​ហុងកុង​នេះ​ជាការ​ពិតមែន​នោះ ដូច្នេះ​រដ្ឋាភិបាល​អង់គ្លេស ពុំ​អាច​ឱបដៃ​ឈរ​មើល​។ ត្រង់នេះ លោក​សង្កត់ធ្ងន់ថា ចក្រភព​អង់គ្លេស នឹង​គោរព​កាតព្វកិច្ច​ក្នុងនាម​ជា​អតីត​ម្ចាស់​អាណានិគម ហើយ​ផ្ដល់​ផ្លូវ​ក្រោយ​សម្រាប់​ពួកគេ​។ 
 
​ក្នុង​អត្ថបទ​ដដែល លោកនាយក​រដ្ឋមន្ត្រី ច​ន​សុន លើកឡើងថា បច្ចុប្បន្ន ពលរដ្ឋ​ហុងកុង​ប្រមាណ ៣៥​ម៉ឺន​នាក់​កាន់​លិខិតឆ្លងដែន​សម្រាប់​ពលរ​ដ្ឋ​ចក្រភព​អង់គ្លេស ឬ British National (Overseas) ដែល​អនុញ្ញាត​ឲ្យ​ចូល​ដែនដី​ប្រទេស​នេះ​ដោយ​ពុំ​ចាំបាច់​ស្នើ​ទិដ្ឋាការ ហើយ​អាច​ស្នាក់នៅ​រហូតដល់ ៦ ខែ​។ ចំណែក ពលរដ្ឋ​ហុង​ហុង ២,៥​លាន​នាក់ នឹងមាន​សិទ្ធិ​ដាក់​ស្នើ​សម្រាប់​លិខិតឆ្លងដែន​នេះ​។ 
 
«​ប្រសិនបើ ចិន ដាក់​ប្រើ​ច្បាប់​សន្តិសុខ​ជាតិ រដ្ឋាភិបាល​ចក្រភព​អង់គ្លេស នឹង​ផ្លាស់ប្តូរ​គោលការណ៍​អន្តោប្រវេសន៍  និង​បើកផ្លូវ​ឲ្យ​អ្នក​កាន់​លិខិតឆ្លងដែន​ទាំងនេះ​ពី​ក្រុង​ហុងកុង​មកកាន់​ចក្រភព​អង់គ្លេស សម្រាប់​អំឡុងពេល​១២​ខែ​ដែល​អាច​សុំ​ស្នើ​ជាថ្មី  ហើយ​ផ្ដល់​ឲ្យ​សិទ្ធិ​អន្តោប្រវេសន៍​ច្រើន​ទៀត ក្នុងនោះ សិទ្ធិ​ធ្វើ​ការងារ ដែល​អាចជា​ឱកាស​ទទួល​សញ្ជាតិ​»​។ លោកនាយក​រដ្ឋមន្ត្រី ច​ន​សុន សង្កត់ធ្ងន់​បែបនេះ​។​
 
​កាលពី​ចុងខែ​ឧសភា សភា​ប្រជាជន​ចិន បានអនុម័ត​លើ​ដំណោះស្រាយ​ច្បាប់​សន្តិសុខ​ជាតិ​ហុងកុង​ហើយ​។ ការអនុម័ត​នេះ នឹង​បើកផ្លូវ​ឲ្យ​គណៈកម្មការ​អចិន្ត្រៃយ៍​នៃ​សភា​ប្រជាជន​ចិន តាក់តែង​ច្បាប់​សន្តិសុខ​ជាតិ​ហុងកុង​ឡើង ទោះជា​មានការ​តវ៉ា​ពី​អ្នកនយោបាយ​នៃ​ហុងកុង និង​ការព្រមាន​របស់​អាមេរិក​ក្ដី​។ ការផ្ទុះ​តវ៉ា​ប្រឆាំង​ធ្វើឡើង​ក្រោម​ហេតុផល​ថា ប្រជាជន​ហុងកុង​ជឿថា​សេចក្តីស្នើច្បាប់​សន្តិសុខ​នេះ នឹង​លុបបំបាត់​សិទ្ធិសេរីភាព​របស់​ពួកគេ និង​គោលការណ៍ «​ប្រទេសមួយ ប្រព័ន្ធ​ពីរ​»​។​
 
​នាយករដ្ឋមន្ត្រី​ចក្រភព​អង់គ្លេស​វ័យ​៥៥​ឆ្នាំ​រូបនេះ គូសបញ្ជាក់​ក្នុង​អត្ថបទ​ដដែល​ថា ច្បាប់​សន្តិសុខ​ជាតិ​ហុងកុង​នេះ នឹង​កាត់បន្ថយ​សេរីភាព និង​បំផ្លាញ​ស្វ័យភាព​ទីក្រុង​នេះ​ធំធេង​។ លោក​ព្រមាន​ថា ប្រសិនបើ​ដាក់ចូល​ជា​ធរមាន​មែន​នោះ រដ្ឋាភិបាល​លោក នឹង​គ្មាន​ជម្រើស​អ្វី​ផ្សេង​ក្រៅពី​បន្ត​រក្សា​ចំណង​ប្រវត្តិសាស្ត្រ​និង​មិត្តភាព​ដ៏​ចម្បង​របស់​អង់គ្លេស​ជាមួយ​ប្រជាជន​ហុងកុង​។ 
 
​ទោះជា​បែបនេះ​ក្តី លោក ច​ន​សុន សង្ឃឹមថា រឿងហេតុ​អកុសល​បែបនេះ នឹង​ពុំ​កើត​ឡើយ ហើយ​លោក​បន្ត​ប្រកាស​ជំហរ​ថា ចក្រភព​អង់គ្លេស​មិន​ចង់​រារាំង​ការ​ងើបឡើង​របស់​ប្រទេស​ចិន​នោះទេ​។ ត្រង់ចំណុច​នេះ លោក​សរសេរ​ដូច្នេះ​ថា​៖«​យើង​ស្វាគមន៍​ចិន​ក្លាយជា​សមាជិក​ឈានមុខ​មួយ​នៃ​សហគមន៍​ពិភពលោក ដែល​យើង​រំពឹងថា​ចិន​គោរព​តាម​កិច្ចព្រមព្រៀង​អន្តរជាតិ​»​។​
 
​ការប្រកាស​ពី​ជំហរ​របស់​រដ្ឋាភិបាល​អង់គ្លេស​លើ​សំណុំរឿង​ហុងកុង​នេះ ធ្វើឡើង​ក្រោយ​សហរដ្ឋអាមេរិក កាលពី​ថ្ងៃទី​១ ខែមិថុនា ក៏​កំពុង​ពិចារណា​ស្វាគមន៍​ប្រជាជន​ហុងកុង​មកកាន់​ប្រទេស​ខ្លួន​ផងដែរ ប្រសិនបើ​ចិន​ដាក់​ប្រើ​ច្បាប់​សន្តិសុខ​ដ៏​ចម្រូងចម្រាស​នេះ​។ ក្នុង​សេចក្តីថ្លែងការណ៍ លោក ម៉ៃ ប៉ុ​ម​ប៉េ​អូ រដ្ឋមន្ត្រីការបរទេស​អាមេរិក អះអាងថា លោក​កំពុង​មើល​គោលការណ៍​កូតា ឬ​ទិដ្ឋាការ​អន្តោប្រវេសន៍​សម្រាប់​ពល​រដ្ឋ​ហុងកុង​។ យ៉ាងណាមិញ​លោក​ពុំ​បញ្ជាក់​ព័ត៌មាន​លម្អិត​ឡើយ​៕ 
 
 

Tag:
 ចក្រភព​អង់គ្លេស​
  ហុងកុង​
  ចិន​
  សេចក្តីស្នើច្បាប់​សន្តិសុខ​ជាតិ
© រក្សាសិទ្ធិដោយ thmeythmey.com