ជាតិ
៤ខែដើមឆ្នាំ បទល្មើសធនធានធម្មជាតិជាង២ពាន់ករណីត្រូវបានបង្ក្រាប ដោយការលួចកាប់ឈើមានច្រើនជាងគេ ឈើនៅលើគោយន្ត ដែលក្រុមមន្ត្រីឧទ្យានុរក្សបង្ក្រាបបានពីអ្នកលួចកាប់ព្រៃ។ រូបថត៖ លោក នេត្រ ភក្រ្តា អ្នកនាំពាក្យក្រសួងបរិស្ថាន។
× ភ្នំពេញ៖ រយៈពេល៤ខែដើមឆ្នាំ២០២០ មន្ត្រីឧទ្យានុរក្សនៃក្រសួងបរិស្ថាន បង្ក្រាបបទល្មើសធនធានធម្មជាតិបានចំនួន២,៣៣៣ករណី។ ក្នុងនោះ មានភាគច្រើនគឺពាក់ព័ន្ធនឹងការទន្ទ្រានកាន់កាប់ព្រៃខុសច្បាប់ និងបទល្មើសលួចកាប់ឈើ។ នេះបើតាមយោងសំណេររបស់លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន ផ្តល់ឱ្យក្រុមអ្នកកាសែតតាមប្រព័ន្ធតេលេក្រាម(Telegram)កាលពីថ្ងៃទី២មិថុនា។
លោក នេត្រ ភក្រា្ត បានបញ្ជាក់ថា ក្នុងចំណោមបទល្មើសធនធានធម្មជាតិសរុបខាងលើនេះ មាន១៧៩ករណីដែលពាក់ព័ន្ធនឹងមនុស្សជិត២០០នាក់ ត្រូវបានកសាងសំណុំរឿងបញ្ជូនទៅតុលាការ ដើម្បីជំនុំជំរះក្តីតាមនីតិវីធី។ មាន៤០៣ករណីត្រូវបានអាជ្ញាធរផាកពិន័យអន្តរកាល និង៦១៣ករណីទៀត គឺបានពាក់ព័ន្ធនឹងមនុស្ស៦២៤នាក់ ត្រូវបានអាជ្ញាធរអប់រំ និងធ្វើកិច្ចសន្យាបញ្ឈប់ប្រព្រឹត្តបទល្មើស ដែលអនុលោមតាមច្បាប់ស្តីពីតំបន់ការពារធម្មជាតិ។
ពីខែមករា-មេសា ឆ្នាំ២០២០មកនេះ មន្ត្រីឧទ្យានុរក្សរបស់ក្រសួងបរិស្ថានទូទាំងប្រទេសទាំង១,២៦០នាក់ បានចុះបេសកកម្មដើរល្បាតចំនួនជាង៧ពាន់លើក នៅក្នុងតំបន់ការពារធម្មជាតិ និងរបៀងអភិរក្សជីវៈចម្រុះទាំង៦០កន្លែង ដែលមានផ្ទៃដីជាង៧,២លានហិកតា។ នេះបើតាមលោក នេត្រ ភក្ត្រា ដោយបានអះអាងថា ក្នុងការចុះទប់ស្កាត់បទល្មើសធនធានធម្មជាតិចំនួន៤ខែមកនេះ មន្ត្រីឧទ្យានុរក្ស និងសហគមន៍តំបន់ការពារធម្មជាតិនោះ មានរឹបអុសរណាយន្តជិត១០០គ្រឿង, រថយន្តកែច្នៃត្រាក់ទ័រ៥៣គ្រឿង ម៉ូតូ១២៦គ្រឿង និងគោយន្ត២០៣គ្រឿង។ ក្រៅពីនេះ មន្ត្រីឧទ្យានុរក្សក៏បានដោះអន្ទាក់សម្លាប់សត្វជិត៩ពាន់អន្ទាក់ ព្រមទាំងដកហូតកាំភ្លើង កាំភ្លើងកែច្នៃ ស្នាតេះ ដែលប្រើប្រាស់ពេលបរបាញ់សត្វ បាន២៣៩ដើម ផងដែរ។
ក្រុមមន្ត្រីឧទ្យានុរក្ស។ រូបថត៖ លោក នេត្រ ភក្ត្រា អ្នកនាំពាក្យក្រសួងបរិស្ថាន។
អ្នកនាំពាក្យក្រសួងបរិស្ថានរូបនេះ បាននិយាយថា៖«នេះគឺជាកិច្ចខិតខំបំពេញការងារប្រកបដោយទំនួលខុសត្រូវ និងប្រកបដោយវិជ្ជាជីវៈរបស់មន្ត្រីគ្រប់លំដាប់នៃក្រសួងបរិស្ថាន។ ជាពិសេសមន្ត្រីឧទ្យានុរក្ស ដែលលះបង់កម្លាំងកាយចិត្ត បញ្ញាដើម្បីបុព្វហេតុបរិស្ថាន និងធនធានធម្មជាតិ ដើម្បីភាពគង់វង្សនៃសម្បត្តិធម្មជាតិសម្រាប់មនុស្សជំនាន់ក្រោយទៀត»។
លោក នេត្រ ភក្រា បានបន្ត ទោះបីជាមានការរឹតបន្តឹងការអនុវត្តច្បាប់ បង្កើនសកម្មភាពអប់រំស្តីពីច្បាប់តំបន់ការពារធម្មជាតិពីសំណាក់មន្ត្រីអនុវត្តច្បាប់នោះ បទល្មើសធនធានធម្មជាតិទ្រង់ទ្រាយតូច ដូចការលួចកាប់ព្រៃឈើ ការបរបាញ់ និងការដាក់អន្ទាក់សត្វព្រៃ នៅតែកើតមានក្នុងតំបន់ការពារធម្មជាតិដោយចំបាច់ ត្រូវការចូលរួមពីភាគីពាក់ព័ន្ធ ក្នុងការចាត់វិធានការទប់ស្កាត់ និងបង្ក្រាបបទល្មើសទាំងនោះបន្តទៀត។ ជាមួយគ្នានេះ លោកបានបញ្ជាក់ថា កម្លាំងមានសមត្ថកិច្ចរបស់រាជរដ្ឋាភិបាលកម្ពុជា បានតាំងចិត្តខ្ពស់ក្នុងការតប់ស្កាត់ និងបង្ក្រាបនឹងបទល្មើសធនធានធម្មជាតិដែលកើតឡើងស្រមតាមច្បាប់នានា គឺមិនលើកលែងឡើយ។
កាលឆ្នាំ២០១៩ មន្ត្រីឧទ្យានុរក្សទាំងជាំង១២០០នាក់ដែលឈរជើងនៅក្នុងតំបន់ការពារធម្មជាតិបានបង្ក្រាបបទល្មើសធនធានធម្មជាតិចំនួន ៤,៧៤៦ករណី និងបានកសាងសំណុំរឿងទៅតុលាការ៤៨៧ករណី រឹបអូសរណាយន្តបាន២,៥៣១គ្រឿង៕
Tag:
ព្រៃឈើ
ធនធានធម្មជាតិ
© រក្សាសិទ្ធិដោយ thmeythmey.com