កីឡាជាតិ
ជាតិ
កីឡាករ ឃីម ឌីម៉ា៖ បើរបួសជាដូចដើមនឹងត្រឡប់ចូលសង្វៀនវិញ តែបើមិនដូចដើមនឹងផ្អាក កីឡាករ ឃីម ឌីម៉ា ពេលដណ្តើមបានមេដាយមាសក្នុងការប្រកួតកីឡាស៊ីហ្គេមនៅម៉ាឡេស៊ីឆ្នាំ២០១៧
× ការវិលត្រឡប់ចូលប្រឡូកក្នុងវិស័យកីឡាគុនខ្មែររបស់កីឡាករ ឃីម ឌីម៉ា កំពុងស្ថិតក្នុងភាពមិនច្បាស់លាស់ ដ្បិតរបួសរបស់គេ ដែលបានវះកាត់កាលពីអំឡុងខែឧសភា ឆ្នាំ២០១៩ ពុំទាន់ជាសះស្បើយនៅឡើយទេ។ ទោះបីបច្ចុប្បន្នរបួសគេនៅមានការឈឺចាប់ក៏ដោយ ឌីម៉ា បានចាប់ផ្តើមហ្វឹកហាត់តិចៗវិញហើយ។
ម្ចាស់មេដាយមាសស៊ីហ្គេមឆ្នាំ២០១៧ កីឡាករ ឃីម ឌីម៉ា មិនទាន់ប្រាកដ១០០ភាគរយថា រូបគេអាចត្រឡប់ចូលប្រឡូកក្នុងវិស័យកីឡាប្រដាល់គុនខ្មែរបានវិញ ឬយ៉ាងណានោះទេ។ ព្រោះរបួសដាច់សរសៃជង្គង់ និងប្រេះឆ្អឹងស្មងជើងរបស់គេ ដែលបានវះកាត់កាលពីអំឡុងខែឧសភា ឆ្នាំ២០១៩ នៅមានអាការៈឈឺតិចៗនៅឡើយ។ បច្ចុប្បន្ន ឌីម៉ា មិនទាន់អាចចូលហ្វឹកហាត់បានបានដូចដើមវិញនៅឡើយទេ។
ការបន្ត ឬផ្អាកដើរលើវិថីកីឡាគុនខ្មែររបស់កីឡាករមកពីខេត្តបន្ទាយមានជ័យរូបនេះ គឺអាស្រ័យលើស្ថានភាពរបួសរបស់គេ។ ក្នុងបទសម្ភាសជាមួយអ្នកសារព័ត៌ពេលយកមេដាយមាសស៊ីហ្គេមនៅម៉ាឡេស៊ីមកប្រគល់ជូនសហព័ន្ធប្រដាល់គុនខ្មែរ ដើម្បីរក្សាទុកក្នុងសាលតម្កល់ឯកសារកីឡាកម្ពុជា កីឡាកររូបនេះបញ្ជាក់ដូច្នេះថា៖«វាអត់ទាន់ជា១០០ភាគរយទេ ឥលូវនេះខ្ញុំកំពុងចាប់ផ្តើមហ្វឹកហាត់តិចៗ បើសិនវាបានល្អដូចដើមខ្ញុំនឹងត្រឡប់មកវិញ តែបើវាមិនអាចដូចដើមទេ ខ្ញុំប្រហែលផ្អាកត្រឹមនឹង»។
សម្រាប់កីឡាករ ឃឹម ឌីម៉ា មានតែភាពសោកស្តាយប្រសិនបើរូបគេមិនអាចបន្តដើរវិថីប្រដាល់គុនខ្មែរ ខណៈបច្ចុប្បន្នវិស័យនេះកំពុងមានការរីកចម្រើន និងមានប្រជាប្រិយភាពខ្លាំង។ គិតតាំងពីពេលវះកាត់មកដល់បច្ចុប្បន្ន របួសកីឡាករវ័យ២៩ឆ្នាំរូបនេះមានរយៈពេលជាង១ឆ្នាំហើយ ស្របពេលគ្រូពេទ្យអះអាងក្រោយការវះកាត់ថា របួសគេនឹងជាសះស្បើយក្នុងរយៈពេលចន្លោះពី៦ទៅ១ឆ្នាំ។
គួររំលឹកថា កីឡាករ ឃីម ឌីម៉ា បានរងរបួសដាច់សរសៃពួរក្បាលជង្គង់ និងប្រេះឆ្អឹងស្មងជើង ដែលទាមទារវះកាត់ជាចាំបាច់ បើពុំនោះទេរបួសនេះនឹងវិវឌ្ឍន៍ទៅរកស្ថានភាពធ្ងន់ធ្ងររហូតឈានដល់ពិការភាព។ ក្រោយមកលោក ហេង ប៊ុនឃីម ដែលជាឪពុកបង្កើតបាននាំកីឡាករ ឃីម ឌីម៉ា ទៅវះកាត់នៅប្រទេសថៃ នាអំឡុងខែឧសភា ឆ្នាំ២០១៩។ មុនសម្រេចចិត្តវះកាត់នៅថៃ ឌីម៉ា ត្រូវបានសហព័ន្ធកីឡាប្រដាល់គុនខ្មែរឲ្យមកវះកាត់នៅមន្ទីរពេទ្យមិត្តភាពខ្មែរសូវៀត និងសិក្សាពេទ្យមួយចំនួននៅវៀតណាម៕
Tag:
ប្រដាល់គុនខ្មែរ
ឃុន ឌីម៉ា
© រក្សាសិទ្ធិដោយ thmeythmey.com