ភ្នំពេញ៖ រដ្ឋសភាបានអនុម័តសេចក្តីព្រាងច្បាប់ចំនួន២ ទាក់ទងនឹងការប្រឆាំងការសម្អាតប្រាក់ ក្នុងប្រជុំពេញអង្គលើកទី៤ នីតិកាលទី៦ នាព្រឹកថ្ងៃទី៤ ខែមិថុនា ឆ្នាំ២០២០នេះ ។
សេចក្តីព្រាងច្បាប់ចំនួន២ ក្នុងចំណោម៤នោះ ដែលសភាបានអនុម័តនោះ រួមមានសេចក្តីព្រាងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធ មហាប្រល័យ និង សេចក្តីព្រាងច្បាប់ស្តីពីការប្រឆាំងការសម្អាតប្រាក់ និង ហិរញ្ញប្បទានភេរវកម្ម។
សេចក្តីព្រាងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធ មហាប្រល័យនិង សេចក្តីព្រាងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម នឹងក្លាយជាគតិយុត្តថ្មី បន្ថែមលើចំនុចខ្វះខាតពាក់ព័ន្ធនឹងការសម្អាតប្រាក់ ស្របទៅតាមស្តង់ដារនៃសមាជិកក្រុមប្រទេសអាស៊ីប៉ាស៊ីហ្វិកស្តីការសម្អាតប្រាក់ ដែលកម្ពុជាបានក្លាយជាសមាជិកកាលពីឆ្នាំ២០០៤។
សព្វថ្ងៃនេះ កម្ពុជាកំពុងស្ថិតនៅក្នុង«បញ្ជីប្រផេះ» ក្រុមប្រទេសអាស៊ីប៉ាស៊ីហ្វិក ស្តីពីការសម្អាតប្រាក់។ «បញ្ជីប្រផេះ» គឺជាសញ្ញាហានិភ័យមួយ ដល់បណ្ដាប្រទេសនៅក្នុងពិភពលោក នៃសមាជិកក្រុមប្រឆាំងការសម្អាតប្រាក់កខ្វក់អាស៊ីប៉ាស៊ីហ្វិច (APG) ដែលសង្ស័យថា មានករណីចរាចរលើការសម្អាតប្រាក់ និងហិរញ្ញប្បទានភេរវកម្មនេះ។
ដើម្បីគេចចេញពី«បញ្ជីប្រផេះ» និង«បញ្ជីខ្មៅ» របស់ក្រុមប្រទេសអាស៊ីប៉ាស៊ីហ្វិក ស្តីពីការសម្អាតប្រាក់នេះ កម្ពុជានៅសល់ពេលវេលា៤ខែទៀត សម្រាប់រៀបចំច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ដើម្បីយកមកអនុវត្តឱ្យស្របតាមបទដ្ឋានអន្តរជាតិ និងសេចក្តីសម្រេចរបស់អង្គការសហប្រជាជាតិ ទាក់ទងនឹងការដាក់ទណ្ឌកម្មហិរញ្ញវត្ថុ នៃករណីសម្អាតប្រាក់។
អ្នកនាំពាក្យរដ្ឋាភិបាល លោក ផៃ ស៊ីផាន ធ្លាប់បានបញ្ជាក់នៅលើហ្វេសប៊ុកដូច្នេះថា៖«នៅថ្ងៃទី២២ ខែកុម្ភៈ ឆ្នាំ២០១៩ ក្រុមការងារហិរញ្ញវត្ថុ បានដាក់បញ្ចូលកម្ពុជាទៅក្នុងបញ្ជីប្រផេះម្ដងទៀត និងបានតម្រូវឱ្យអនុវត្តផែនការសកម្មភាពដើម្បីបំពេញបន្ថែមចំណុចខ្វះខាតជាយុទ្ធសាស្ត្រនានាតាមកាលបរិច្ឆេទកំណត់ ដូចជា ត្រូវមានក្របខណ្ឌគតិយុត្តទាក់ទងនឹងការប្រឆាំងហិរញ្ញប្បទានដល់ការរីកសាយអាវុធមហាប្រល័យ ឱ្យបានមុនដំណាច់ខែឧសភា ឆ្នាំ២០២០ និងការធ្វើវិសោធនកម្មច្បាប់ស្ដីពីការប្រឆាំងការសម្អាតប្រាក់និងហិរញ្ញប្បទានភេរវកម្ម ឱ្យបានមុនដំណាច់ខែកញ្ញា ឆ្នាំ២០២០ ជាដើម»។
ក្រុមប្រទេសអាស៊ីប៉ាស៊ីហ្វិក ស្តីពីការសម្អាតប្រាក់ (Asia Pacific Group on Money Laundering /APG) បានរកឃើញថា កម្ពុជានៅពុំទាន់មានមូលដ្ឋានគតិយុត្ត និងយន្តការអនុវត្តច្បាប់គ្រប់គ្រាន់ ទាក់ទងនឹងការដាក់ទោសលើបទល្មើសសម្អាតប្រាក់ និងហិរញ្ញប្បទានភេរវកម្ម ដែលពុំទាន់ស្របតាមបទដ្ឋានអន្តរជាតិ វិធានការបង្កក ឃាត់ទុក និងរឹបអូសផលនៃបទល្មើសនៅឡើយ។ ជាពិសេសយុទ្ធសាស្ត្រ ឬវិធានការខ្លះ មិនទាន់ស្របតាមគោលដៅបង្ក្រាប«ហិរញ្ញប្បទានដល់ការរីកសាយភាយអាវុធមហាប្រល័យ» នៃសេចក្តីសម្រេចរបស់អង្គការសហប្រជាជាតិ។
ក្រុមប្រទេសអាស៊ីប៉ាស៊ីហ្វិក ស្តីពីការសម្អាតប្រាក់ បានត្រួតពិនិត្យនឹងរកឃើញចំណុចអវិជ្ជមានកម្ពុជា ចំនួន២លើក គឺនៅឆ្នាំ២០០៧ និង២០១៦ មុននឹងឈានដល់ការដាក់បញ្ចូលកម្ពុជា ក្នុងបញ្ជីប្រផេះ៕