កីឡាអន្តរជាតិ
អន្តរជាតិ
Son៖ កាតព្វកិច្ចយោធាដ៏លំបាក ជួយខ្លួនកើនសមត្ថភាព និងកាយសម្បទារឹងមាំជាងមុន
× Son Heung-min ខ្សែប្រយុទ្ធឆ្នើមរបស់ Tottenham Hotspur បានរៀបអំពីការចូលបំពេញកាតព្វកិច្ចយោធានៅកូរ៉េខាងត្បូងថាពិតជា «ស្វិតស្វាញ» ដែលធ្វើឲ្យរូបគេកើនសមត្ថភាព និងកាយសម្បទារឹងមាំបំផុតសម្រាប់ការចាប់ផ្តើម Premier League ឡើងវិញ។
ខ្សែប្រយុទ្ធវ័យ ២៧ ឆ្នាំរូបនេះ បានទៅបំពេញកាតព្វកិច្ចយោធាចំនួន៣សប្តាហ៍នៅឯប្រទេសកំណើត កាលពីខែមេសាបន្ទាប់ពីជាសះស្បើយពីការវះកាត់ដៃដែលបាក់អំឡុងពេលប្រកួតកន្លងមក។ តាមពិតទៅ Son បានរួចផុតពីកាតព្វកិច្ចនេះហើយ ប៉ុន្តែដោយសារលីគអង់គ្លេសផ្អាកព្រោះជំងឺ COVID-19 នោះ Son ក៏សម្រេចទៅចូលរួមវិញក្នុងរយៈពេលខ្លី។
ការទៅចូលរួមលំហាត់យោធានេះ បានធ្វើឲ្យកំពូលកីឡាករបាល់ទាត់លំដាប់ទី១នៅអាស៊ីរូបនេះទទួលបានផ្លែផ្កាជាច្រើន។
Son បានប្រាប់វេបសាយផ្លូវការរបស់ Spurs ថា៖ «វាពិតជាមមាញឹកណាស់ក្នុងរយៈពេល ៣សប្តាហ៍នេះ។ ខ្ញុំមិនដឹងថាអ្នកចូលរួមដូចខ្ញុំ មានអារម្មណ៍យ៉ាងណាទេ ប៉ុន្តែសម្រាប់ខ្ញុំ៣សប្តាហ៍នៅទីនោះគឺជារយៈពេលយូរ ហើយវាជាបទពិសោធន៍ដ៏អស្ចារ្យមួយ»។
ខ្សែប្រយុទ្ធរបស់មាន់ខ្នាយមាសបន្ថែមថារូបគេមិនអាចនិយាយពីស្ថានភាពនៅពេលនោះទាំងអស់បាននោះទេ ប៉ុន្តែអ្វីដែល Son រីករាយគឺការកើនសមត្ថភាព និងកាយសម្បទារឹងមាំដែលអាចយកមកប្រើប្រាស់ក្នុងកីឡាបាល់ទាត់កាន់តែអស្ចារ្យជាងមុន។
Son ដែលផ្លាស់ពី Bayer Leverkusen កាលពីឆ្នាំ២០១៥ បានបង្ហាសម្ថភាពដ៏ល្អនៅទឹកដីអង់គ្លេស ដោយជួយ Spurs ឈានដល់វគ្គផ្តាច់ព្រ័ត្រ Champions League បើទោះទទួលបានត្រឹមរងជើងឯកក្តី។
ស្របពេល Premier League នឹងឈានចូលការប្រកួតដែលនៅសេសល់រដូវកាលនេះវិញ Spurs ត្រូវមានកាតព្វកិច្ចសំខាន់ក្នុងការដណ្តើមយកចំណាត់ថ្នាក់ Top ដើម្បីបានកៅអីលេងក្របខណ្ឌកំពូលអឺរ៉ុបនៅរដូវកាលក្រោយ។ Spurs ឈរនៅចំណាត់ថ្នាក់ទី៨ ក្នុងតារាងលីគកំពូលអង់គ្លេស ដោយរកបាន៤១ពិន្ទុ ពីការប្រកួត២៩លើក តាមពីក្រោយ Chelsea ដែលឈរលេខ៤ ចំនួន៧ពិន្ទុ ខណៈការប្រកួតនៅសល់៩លើកទៀត៕
Tag:
Son Heung-min
Tottenham Hotspur
© រក្សាសិទ្ធិដោយ thmeythmey.com