OHCHR ថា កម្ពុជា​ប្រើពាក្យ​«Fake News» ដើម្បី​បិទ​សិទ្ធិ​បញ្ចេញមតិ​លើ​បញ្ហា​កូ​វីដ​១៩ តែ​មហាផ្ទៃ​ច្រានចោល​
COVID-19
ជាតិ
សង្គមជាតិ
OHCHR ថា កម្ពុជា​ប្រើពាក្យ​«Fake News» ដើម្បី​បិទ​សិទ្ធិ​បញ្ចេញមតិ​លើ​បញ្ហា​កូ​វីដ​១៩ តែ​មហាផ្ទៃ​ច្រានចោល​
05, Jun 2020 , 3:38 pm        
រូបភាព
​ភ្នំពេញ​៖ ឧ​ត្ត​ម​ស្នងការ​សិទ្ធិមនុស្ស នៃ​អង្គការសហប្រជាជាតិ មើលឃើញថា កម្ពុជា បាន​ប្រើប្រាស់​ពាក្យ​«​ព័ត៌មាន​មិន​ពិត ឬ​Fake News» ដើម្បី​រឹតត្បិត​សេរីភាព​បញ្ចេញមតិ​របស់​ពលរ​ដ្ឋ​លើ​បញ្ហា​វិបត្តិ​កូ​វីដ​១៩ ដែល​កំពុង​រាតត្បាត​នៅ​កម្ពុជា និង​ជុំវិញ​ពិភពលោក​។ ក្រសួងមហាផ្ទៃ​កម្ពុជា ច្រានចោល​ព័ត៌មាន​នេះ ដោយ​អះអាងថា មុននឹង​សមត្ថកិច្ច​ចាប់ខ្លួន​នរណាម្នាក់ គឺ​បាន​សិក្សា​ស្រាវជ្រាវ​ច្បាស់​ហើយ លើ​ពាក្យសម្តី​របស់​ពួកគេ​។​



​របាយការណ៍​ឧ​ត្ត​ម​ស្នងការ​សិទ្ធិមនុស្ស នៃ​អង្គការសហប្រជាជាតិ ដែល​ចេញ​ដោយ​លោកស្រី មី​ស្សែ​ល បា​ស្សេ​ឡេ​ត បាន​បញ្ជាក់ថា ប្រទេស​ជាច្រើន បាន​ចាប់ខ្លួន និង​ឃុំខ្លួន​អ្នក​ទាំងឡាយណា ដែល​និយាយ​រិះគន់ ចំពោះ​ការឆ្លើយតប​របស់​រដ្ឋា​ភិ​បាល​ជុំវិញ​ករណី​រាតត្បាត​នៃ​ជំងឺ​កូ​វីដ​១៩​។ ជាពិសេស​ចែករំលែក​ព័ត៌មាន និង​ទស្សន​អំពី​ជំងឺ​នេះ​។ 
 
​ក្នុង​របាយការណ៍​ឧ​ត្ត​ម​ស្នងការ​សិទ្ធិមនុស្ស ក៏មាន​ដាក់បញ្ចូល​ប្រទេស​កម្ពុជា​ផងដែរ​។ លោកស្រី មី​ស្សែ​ល បា​ស្សេ​ឡេ​ត បាន​បញ្ជាក់ថា អាជ្ញាធរ​កម្ពុជា បាន​ចាប់ខ្លួន​ពលរដ្ឋ ដែល​រិះគន់ និង​បញ្ចេញមតិ​មិន​ពេញចិត្ត ចំពោះ​រដ្ឋាភិបាល ក្រោម​ហេតុផល​ផ្សព្វផ្សាយ​ព័ត៌មាន​មិន​ពិត តាមរយៈ​សារព័ត៌មាន និង​បណ្តាញ​សង្គម​ជាដើម​។​
 
​ឧ​ត្ត​ម​ស្នងការ​សិទ្ធិមនុស្ស នៃ​អង្គការសហប្រជាជាតិ លោកស្រី មី​ស្សែ​ល បា​ស្សេ​ឡេ​ត បានចេញ​របាយការណ៍​មួយ កាលពី​ថ្ងៃទី​៣ មិថុនា យ៉ាង​ដូច្នេះ​ថា​៖«​នៅ​ប្រទេស​កម្ពុជា​, ការិយាល័យ​ឧ​ត្ត​ម​ស្នងការ អ​.​ស​.​ប ទទួលបន្ទុក​សិទ្ធិមនុស្ស (​ការិយាល័យ OHCHR) បាន​ចងក្រង​ជា​ឯកសារ​ទាក់ទង​នឹង​ការចាប់ខ្លួន​មនុស្ស​ចំនួន ៣០ នាក់ រាប់ទាំង​ស្ត្រី​មួយ​នាក់ និង​ក្មេងស្រី​ម្នាក់​អាយុ ១៤ ឆ្នាំ ដោយសារតែ​ការនិយាយ​អត្ថាធិប្បាយ​ជា​សាធារណៈ និង​ការ​បង្ហោះ​លើ​បណ្តាញ​សង្គម​ទាក់ទង​នឹង​ជំងឺ​កូ​វីដ​-១៩​។ មនុស្ស​មួយចំនួន ត្រូវបាន​ចោទប្រកាន់​ពីបទ​ផ្សព្វផ្សាយ​ព័ត៌មាន​មិន​ពិត ឬ​ព័ត៌មាន​ក្លែងក្លាយ ការ​ញុះញង់​ឱ្យ​ប្រព្រឹត្ត​បទឧក្រិដ្ឋ និង​រៀបចំ​ផែនការ​ប្រឆាំងនឹង​រដ្ឋា​ភិ​បាល​។ មនុស្ស​ចំនួន​១៤​នាក់ កំពុងស្ថិត​ក្នុង​ការឃុំ​ខ្លួន​នៅឡើយ ក្នុងនោះ ១០ នាក់ ជាប់​ពាក់ព័ន្ធ​នឹង​គណបក្ស​សង្គ្រោះ​ជាតិ ដែល​ត្រូវ​បានប្រកាស​រំលាយ​ហើយ​នោះ​»​។​
 
​ក្រៅពី​កម្ពុជា ក៏មាន​ការចាប់ខ្លួន​ព​ល​រដ្ឋ ដែល​រិះគន់​អាជ្ញាធរ​ផងដែរ ក្នុងនោះ​រួមមាន ប្រទេស​បង់​ក្លា​ដែ​ស ចិន ឥណ្ឌា ឥណ្ឌូនេស៊ី ម៉ាឡេស៊ី មី​យ៉ាន់​ម៉ា នេ​ប៉ាល់ ហ្វីលីពីន ស្រីលង្កា ថៃ និង​វៀតណាម​។ នេះ​បើតាម​របាយការណ៍​ឧ​ត្ត​ម​ស្នងការ​សិទ្ធិមនុស្ស នៃ​អង្គការសហប្រជាជាតិ ទាក់ទង​នឹង​ការបង្ក្រាប និង​រឹតត្បិត​សេរីភាព​បញ្ចេញមតិ​របស់​ពលរ​ដ្ឋ​ក្នុង​តំបន់​អាស៊ី​-​ប៉ាស៊ីហ្វិក​។​
 
​តែ​យ៉ាងណា​ក្រសួងមហាផ្ទៃ ច្រានចោល​របាយការណ៍​នេះ​។ លោក ខៀវ សុភ័គ បាន​អះអាងថា កម្ពុជា មិនបាន​បិទ​សិទ្ធិ​បញ្ចេញមតិ​ពលរដ្ឋ ដែល​រិះគន់​រដ្ឋាភិបាល និង​អាជ្ញាធរ​ជុំវិញ​ករណី​កូ​វីដ​១៩​នេះ​ទេ លើកលែងតែ​អ្នក​ទាំងនោះ ផ្សព្វផ្សាយ​ព័ត៌មាន​បែប​ញុះញង់​ប៉ុណ្ណោះ​។​
 
​ថ្លែងប្រាប់​សារព័ត៌មាន​ថ្មីៗ អ្នកនាំពាក្យ​ក្រសួងមហាផ្ទៃ​រូបនេះ បាន​អះអាង​ដូច្នេះ​ថា​៖«​បើ​ផ្សព្វផ្សាយ​ពី​កូ​វីដ​១៩ គ្មាន​អ្នកណា​គេ​ចាប់​ទេ ប៉ុន្តែ​បើ​ផ្សព្វផ្សាយ​ខុសច្បាប់​គេ​ចាប់​ហើយ​។ ហើយ​ឱ្យតែ​ចុះផ្សាយ​ព័ត៌មាន Fake News គឺ​គេ​ចាប់​ហើយ ការបញ្ចេញមតិ​ដោយ​ខ្លួនឯង ការបញ្ចេញមតិ​ឱ្យមាន​ការអុកឡុក ប៉ះពាល់​ដល់​សណ្ដាប់ធ្នាប់​សាធារណ និង​សង្គម គឺ​ច្បាប់​ខ្មែរ​គេ​អាច​ចោទប្រកាន់​បាន ពីបទ​ញុះញង់​ឱ្យ​ប្រព្រឹត្ត​អំពើហិង្សា​ជាអាទិ៍ (​ជាប់ទោស​) ពី​៦​ខែ ទៅ​៥​ឆ្នាំ​»​។​
 
​បើតាម​លោក ខៀវ សុភ័គ អាជ្ញាធរ​បាន​សិក្សា​លើ​ពាក្យសម្តី​លើ​អ្នក​រិះគន់​គ្រប់​ជ្រុងជ្រោយ​ហើយ មុន​ឈានដល់​ការចាប់ខ្លួន​។​«​គេ​(​សមត្ថកិច្ច​)​មាន​អង្គហេតុ​រួចរាល់​ហើយ គេ​មាន​ធាតុ​ផ្សំ​(​បទល្មើស​) គ្រប់គ្រាន់​ហើយ​»​។ នេះ​ជាការ​បញ្ជាក់​របស់លោក ខៀវ សុភ័គ​។​
 
​ផ្ទុយ​ពី​អំណះអំណាង​របស់​ក្រសួងមហាផ្ទៃ​នេះ ឧ​ត្ត​ម​ស្នងការ​សិទ្ធិមនុស្ស នៃ​អង្គការសហប្រជាជាតិ លោកស្រី មី​ស្សែ​ល បា​ស្សេ​ឡេ​ត បាន​សង្កត់ធ្ងន់ថា នៅក្នុង​គ្រា​លំបាក​នៃ​ការ​រាតត្បាត​នៃ​ជំងឺ​កូ​វីដ​១៩ ដែល​មិន​ច្បាស់លាស់​នេះ អ្នកជំនាញ​វេជ្ជសាស្ត្រ អ្នកកាសែត អ្នកការពារ​សិទ្ធិមនុស្ស និង​សាធារណជន​ទូទៅ ត្រូវតែ​ទទួលបាន​ការបញ្ចេញមតិ​យោបល់​ដោយ​សេរី លើ​ប្រធានបទ​សំខាន់ៗ ដែលជា​ផលប្រយោជន៍​សាធារណៈ ដូចជា ការផ្តល់​កិច្ច​គាំពារ​សុខភាព និង​ការគ្រប់គ្រង​វិបត្តិ​សុខភាព និង​សេដ្ឋកិច្ចសង្គម និង​ការ​ចែកចាយ​ជំនួយ​សង្គ្រោះ​ជាដើម​។ 
 
«​វិបត្តិ​នេះ មិនគួរ​ត្រូវបាន​ប្រើប្រាស់ ដើម្បី​រឹតត្បិត​មតិ​ប្រឆាំង ឬ​លំហូរ​ដោយ​សេរី នៃ​ព័ត៌មាន និង​ការជជែក​ដេញដោល​ឡើយ​។ ចម្រុះ​ភាព​នៃ​ទស្សន នឹង​ជំរុញឱ្យមាន​ការយល់ដឹង​កាន់តែច្រើន​ថែមទៀត អំពី​បញ្ហា​ប្រឈម​ផ្សេងៗ ដែល​យើង​ជួបប្រទះ និង​ជួយ​យើង​ឱ្យ​រិត​តែ​ជំនះបាន​នូវ​បញ្ហា​ទាំងនោះ​។ វា​ក៏​ជួយ​ប្រទេស​នានា ឱ្យមាន​ការជជែក​ដេញដោល​ដ៏​រស់​រវើក អំពី​ឫសគល់​នៃ​បញ្ហា និង​ការអនុវត្ត​ល្អៗ ដែល​ចាំបាច់ ដើម្បី​ជម្នះ​ផលប៉ះពាល់​ខាង​សេដ្ឋកិច្ចសង្គម​រយៈពេល​វែង និង​ផលប៉ះពាល់​ដទៃ​ផ្សេងទៀត​។ ការជជែក​ដេញដោល​នេះ​មាន​សារៈសំខាន់​សម្រាប់​ប្រទេស​ទាំងឡាយ​ក្នុង​ការកសាង​ស្តារឡើងវិញ បន្ទាប់ពី​មាន​វិបត្តិ​»​។ នេះ​ជាការ​បញ្ជាក់​របស់លោក​ស្រី មី​ស្សែ​ល បា​ស្សេ​ឡេ​ត ឧ​ត្ត​ម​ស្នងការ​សិទ្ធិមនុស្ស នៃ​អង្គការសហប្រជាជាតិ ។​
 
​គិត​ត្រឹម​ថ្ងៃទី​៥ មិថុនា​នេះ អ្នកជំងឺ​កូ​វីដ​១៩ នៅ​ទូទាំង​ពិភពលោក ជាង​៦​លាន​នាក់​ហើយ ដោយ​ក្នុងនោះ​ជាសះស្បើយ​ជាង​៣​លាន​នាក់ និង​ស្លាប់​ជិត​៤០​ម៉ឺន​នាក់​។ ដោយឡែក​នៅ​កម្ពុជា មាន​អ្នកជំងឺ​កូ​វីដ​១៩ ចំនួន​១២៥​នាក់ ហើយ​ជាសះស្បើយ​១២៣​នាក់​៕
 
 
 

Tag:
 សិទ្ធិមនុស្ស​
  Fake News
© រក្សាសិទ្ធិដោយ thmeythmey.com