លោក ឈឺន ឈីម៖ ៥ខែដំបូងក្នុងឆ្នាំ២០២០នេះ អ្នកឡើងភ្នំឱរ៉ាល់មានជាង៣០០០នាក់

ជាតិ

លោក ឈឺន ឈីម៖ ៥ខែដំបូងក្នុងឆ្នាំ២០២០នេះ អ្នកឡើងភ្នំឱរ៉ាល់មានជាង៣០០០នាក់

05, Jun 2020 , 4:24 pm

រូបភាព

ដោយ: ផាត ដាណេ

ពីខែមករា ដល់ខែឧសភា ទេសចរដែលឡើងភ្នំឱរ៉ាល់ មានដល់ទៅជាង៣០០០នាក់។ នេះបើតាមការប៉ាន់ប្រមាណរបស់លោក ឈឺន ឈីម ។ ទោះបីជាមិនទាន់មានរបាយការណ៍ផ្លូវការពីមន្ត្រីមូលដ្ឋាន ឬស្ថាប័នជំនាញក៏ដោយ តែមគ្គុទ្ទេសក៍ដែលនាំភ្ញៀវឡើងជាប្រចាំរូបនេះ បានអះអាងថា តួលេខភ្ញៀវទេសចរមានចំនួនកាន់តែច្រើន ខណៈកាលពីឆ្នាំ២០១៩ លោកអះអាងថា មានត្រឹមតែជាង៤០០០នាក់ប៉ុណ្ណោះ។

ក្នុងចំណោមអ្នកឡើងចំនួន៣៣១៣នាក់ដែលឡើងភ្នំឱរ៉ាល់នៅ៥ខែដំបូងឆ្នាំ២០២០នេះ មានបរទេសប្រមាណ៣០ភាគរយ។ ភ្ញៀវទាំងនោះ ជាអ្នកនិយមធ្វើដំណើរកម្សាន្តលក្ខណៈផ្សងព្រេងបែបធម្មជាតិ ដូចជាឡើងភ្នំ និងបោះតង់ជាដើម ហើយភាគច្រើនទៅនៅថ្ងៃចុងសប្ដាហ៍។

កាលពីខែមេសា កន្លងទៅ ដោយខ្លាចការឆ្លង កូវីដ-១៩ លោក ឈីម ក៏បានផ្អាកទទួលភ្ញៀវទេសចរឡើង ភ្នំរយៈពេល ១៥ថ្ងៃផងដែរ។ ប៉ុន្តែបច្ចុប្បន្ន លោកបានដំណើរការការទទួលភ្ញៀវឡើងភ្នំឱរ៉ាល់តាមធម្មតា ជាមួយនឹងវិធានការការពារខ្ពស់។

ជារៀងរាល់ឆ្នាំ ភ្ញៀវទេសចរភាគច្រើននិយមទៅឡើងភ្នំឱរ៉ាល់នៅរដូវប្រាំង ព្រោះមិនមានភ្លៀងធ្លាក់ដែលងាយស្រួលក្នុងការធ្វើដំណើរ។ ដោយឡែកឆ្នាំនេះ អ្នកទៅឡើងភ្នំឱរ៉ាល់និយមទៅនៅរដូវវស្សាវិញ ព្រោះវាមានទេសភាពស្អាត មិនក្ដៅដែលនាំឲ្យឆាប់អស់កម្លាំង។ ដោយសារ ចំនួនអ្នកឡើងភ្នំបានកើនឡើង លោក ឈីម ត្រៀមលក្ខណៈ និងរៀបចំកន្លែងដែលត្រូវធ្វើដំណើរដើម្បីបញ្ចៀសគ្រោះថ្នាក់ផងដែរ៕