ភ្នំពេញ៖ មជ្ឈមណ្ឌលសម្ព័នភាពការងារ និងសិទ្ធមនុស្ស (សង់ត្រាល់) និង សហព័ន្ធសហជីពកម្មករសំណង់ និងព្រៃឈើកម្ពុជា (BWTUC) ស្នើដល់រដ្ឋាភិបាល ឲ្យជំរុញចាត់វិធានការ ដោយ ចុះស្រាវជ្រាវរកអ្នកទទួលខុសត្រូវ និងផ្ដល់សំណងដល់គ្រួសារជនរងគ្រោះជាកម្មករពីរនាក់ ដែលស្លាប់ ដោយសារថ្មភ្នំបាក់លើ ព្រមទាំងស្នើឲ្យផ្អាកក្រុមហ៊ុនម៉ៅការ។ អ្នកនាំពាក្យក្រសួងរ៉ែ និងថាមពល អះអាងថា ពាក់ព័ន្ធនឹងរឿងរ៉ាវនេះ មន្ត្រីក្រសួង បានចុះប្រមូលព័ត៌មាន និងរៀបចំឯកសារ ហើយបានបញ្ជូនទៅឲ្យរដ្ឋមន្រី្ត ពិនិត្យនិងវាយតម្លៃហើយ។
តាមរយៈសេចក្ដីថ្លែងការណ៍រួម ចេញនៅថ្ងៃទី២ ខែមិថុនា សង់ត្រាល់ និង BWTUC បានសម្លែងការសោកស្ដាយ ចំពោះការស្លាប់កម្មករពីរនាក់ ដែលត្រូវថ្មភ្នំបាក់រលំលើ ខណៈពួកគេកំពុងឃួងថ្មយកទៅផ្គត់ផ្គង់ឲ្យរោងកច្រស៊ីម៉ង់ត៍ ថៃ ប៊ុនរ៉ុង។ ហេតុការនេះ កើតឡើងនៅភូមិល្អាង ឃុំល្អាង ស្រុកដងទង់ ខេត្តកំពត កាលពីថ្ងៃទី២៩ ខែឧសភា ឆ្នាំ២០២០។
បើតាមប្រភពដដែល កម្មករទាំងពីរនាក់នេះ គឺបម្រើការងារឲ្យក្រុមហ៊ុនចិន ដែលម៉ៅការបន្តពីរោងចក្រស៊ីម៉ង់ត៍ ថៃ ប៊ុនរ៉ុង។ សង់ត្រាល់ និង BWTUC បានស្នើឲ្យ រដ្ឋាភិបាលជំរុញការចាត់វិធានការ ដោយផ្អាកក្រុមហ៊ុនម៉ៅការចិននេះជាបន្ទាន់ ដើម្បីត្រួតពិនិត្យនិងវាយតម្លៃ។
លើសពីរនេះ សង់ត្រាល់ និង BWTUC ស្នើឲ្យចុះធ្វើអធិការកិច្ចជាប្រចាំ លើគ្រប់ក្រុមហ៊ុនម៉ៅការបន្តពីរោងចក្រផលិតស៊ីម៉ង់ត៍ ថៃប៊ុន រ៉ុង ដើម្បីពិនិត្យបទដ្ឋានការងារ និងស្រាវជ្រាវរកអ្នកទទួលខុសត្រូវ ដើម្បីដឹងថាជាកំហុសរបស់ភាគីណាមួយ។ ក្រៅពីនេះ សង់ត្រាល់ និង BWTUC ស្នើឲ្យមានការផ្ដល់សំណង់ដល់គ្រួសាររងគ្រោះ។
លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពល ប្រាប់សារព័ត៌មានថ្មីៗ តាមទូរស័ព្ទ នៅថ្ងៃទី៥ ខែមិថុនា ឆ្នាំ២០២០ ថា ក្រុមការងាររបស់ក្រសួង បានប្រមូលព័ត៌មានពាក់ព័ន្ធ និងធ្វើរបាយការណ៍រួចហើយ ដោយរង់ចាំតែរដ្ឋមន្រី្តពិនិត្យប៉ុណ្ណោះ។
លោក ថ្លែងថា៖«ក្រុមការងារបានចុះពនិត្យ ប្រមូលរបាយការណ៍ហើយ ចាំថ្នាក់ដឹកនាំធ្វើការវាយតម្លៃ។ ចំពោះលទ្ធផល មិនទាន់អាចសន្និដ្ឋានបានឡើយ ព្រោះឆ្លងកាត់ការពិនិត្យសិន ថាអាចនឹងស្រាវជ្រាវឡើងវិញឬយ៉ាងណា យើងមិននិយាយបានឡើយ។ យើងនឹងរកឲ្យឃើញថា ករណីនេះ ជាកំហុសរបស់ខាងរោចក្រ ក្រុមហ៊ុនម៉ៅការ ឬជាកំហុសរបស់កម្មករដោយផ្ទាល់»។
សូមបញ្ជាក់ថា កន្លងមក រោងចក្រស៊ីម៉ង់ត៍ ថៃប៊ុន រ៉ុង ធ្លាប់មានករណីស្រុតអគារ បង្កឲ្យមានកម្មកររងរបួសផងដែរ។ នេះបើតាមការបញ្ជាក់របស់ប្រធានមន្ទីរសាធារណការ និងដឹកជញ្ជូន លោក ដាញ់ សារី ដែលប្រាប់សារព័ត៌មានថ្មីៗតាម ទូរស័ព្ទ នៅថ្ងៃទី៥ ខែមិថុនា។
លោក មិនបានបញ្ជាក់ពីពេលវេលានិងចំនួនអ្នករងរបួសច្បាស់លាស់ឡើយ។ លោក និយាយថា៖ «កន្លងមកកន្លែងណាក៏តែងមានចន្លោះប្រហោង មិនមានអ្វីល្អគ្រប់យ៉ាងឡើយ ប៉ុន្តែក្រុមម៉ៅការសំណង់នោះ ត្រូវបានបញ្ឈប់ហើយ»៕