រដ្ឋអាហ្វ្រិក កេនយ៉ា ចាប់ផ្តើមហាមឃាត់ការប្រើប្រាស់ប្លាស្ទិកប្រើម្តងបោះចោល (single-use) ជាផ្លូវការនៅថ្ងៃទី ៥ ខែមិថុនា។ ជំហានវិជ្ជមានក្នុងការប្រឆាំងប្លាស្ទិកនេះគឺធ្វើឡើងដើម្បី អបអរទិវាបរិស្ថានពិភពលោក។
សម្ភារប្លាស្ទិកប្រើប្រាស់ម្តងបោះចោលដូចជាដបជ័រ និងបំពង់បឺតជាដើម នឹងត្រូវលែងមានវត្តមាន នៅតាមទីសាធារណៈនាទឹកដីរដ្ឋអាហ្វ្រិកខាងកើតកេនយ៉ាទៀតហើយ ចាប់ពីថ្ងៃសុក្រទី ៥ ខែមិថុនានេះតទៅ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
រដ្ឋមន្ត្រីទេសចរណ៍កេនយ៉ា Najib Balala បានបញ្ជាក់ក្នុងលិខិតមួយច្បាប់របស់ខ្លួនដែលចេញផ្សាយជាសាធារណៈកាលពីសប្តាហ៍មុនថា វិធានការនេះគឺត្រូវបានកំណត់ចេញតាំងពីឆ្នាំមុនម្ល៉េះ។
«ការហាមឃាត់នេះជាផ្នែកមួយដើម្បីដោះស្រាយបញ្ហាបំពុលបរិស្ថានដោយប្លាស្ទិកដែលកេនយ៉ា និងពិភពលោកទាំងមូលកំពុងប្រឈម។ យើងសង្ឃឹមថា វិធានការនេះនឹងជំរុញឲ្យមានការដាក់ ចេញគោលនយោបាយស្រដៀងគ្នាពីសំណាក់សហគមន៍រដ្ឋអាហ្វ្រិកខាងកើតទាំងមូលផង»។ លោក Balala ថ្លែងបែបបនេះ។
រដ្ឋអាហ្វ្រិកមួយនេះបានស្វាគមន៍ភ្ញៀវទេសចរប្រមាណ ពីរលានរៀងរាល់ឆ្នាំ មុនពេលផ្ទុះ ឡើងនៃជំងឺរាតត្បាត កូវីដ-១៩។ លទ្ធភាពនៃការទាក់ទាញអ្នកទេសចរច្រើនលាននាក់រាល់ថ្ងៃនេះក៏បង្កឲ្យមានការបំពុលបរិស្ថានជាពិសេសជំរុញឲ្យកើនឡើងនៃសម្រាមប្លាស្ទិកដូចគ្នា។
យោងតាមរបាយការណ៍កម្មវិធីអង្គការសហប្រជាជាតិស្តីពីបរិស្ថាន (UNEP) មនុស្សលើពិភពលោកបង្កើតសម្រាមប្លាស្ទិកប្រហែល ៨,៣ ពាន់លានតោនរាប់ចាប់ពីអំឡុងឆ្នាំ ១៩៥០។ អ្វីដែលគួរឲ្យសោកស្តាយ ៦០ភាគរយនៃប្លាស្ទិកទាំងនោះត្រូវបានគេកប់ចោល ឬ បោះចោលពាសវាលពាសកាលតាមធម្មជាតិដែរ។
ការអនុវត្តវិធានការដោះស្រាយការបំពុលដោយប្លាស្ទិកនេះដែរ បានទទួលការស្វាគមន៍ពី សកម្មជនបរិស្ថានជាពិសេស អ្នកបរិស្ថានដ៏ល្បី Dipesh Pabari ដែលធ្វើដំណើរលើទូកដែលសង់ឡើងពីសម្រាមប្លាស្ទិកក្នុងចម្ងាយ ៥០០គីឡូម៉ែត្រតាមបណ្តោយឆ្នេរពីកេនយ៉ាងដល់ តង់ហ្សានីកាលពីឆ្នាំ ២០១៩។
អ្នកបរិស្ថានរូបនេះលើកឡើងដូច្នេះ ៖ «យើងជាសាក្សីដែលបានឃើញផ្ទាល់នឹងភ្នែកនូវគ្រោះមហន្តរាយ ប្រព័ន្ធជីវចម្រុះ និងសហគមន៍របស់យើងកំពុងប្រឈម បណ្តាលមកពីការប្រើប្រាស់ប្លាស្ទិកម្តងបោះចោល»។
«ឥឡូវនេះ អំឡុងពេលមានមេរោគរាតត្បាត យើងក៏កំពុងឃើញអ្វីដែលកើតឡើងនៅពេលដែលយើងរាល់គ្នាបំផ្លាញភពផែនដី និងបំផ្លាញប្រព័ន្ធមួយដែលទ្រទ្រង់ជីវិតមនុស្សជាតិរាល់គ្នានោះ»៕