ជាតិ
មហិច្ឆតាប្រែក្លាយភ្នំពេញជាក្រុងស្អាត លោក នីដូ ផ្តើមពីការប្រមូលសំរាមតាមផ្សារមកកែច្នៃ
×![]()
ភ្នំពេញ៖ ព្រោះមិនចង់ឃើញភ្នំពេញ មានកាកសំណល់ស្អុយរលួយចោលនៅតាមផ្សារ រោងចក្រ កសិដ្ឋាន និងទីសាធារណៈ លោក គីម នីដូ បានដើរប្រមូលកាកសំណល់ទាំងនោះ ជារៀលរាល់ថ្ងៃ យកមកកែច្នៃជាជីកំប៉ុស និងជីអាចម៍ជន្លេន។ សំរាមស្អុយរលួយ ដែលលោក នីដូ យល់ថា វាមិនត្រឹមតែប៉ះពាល់ដល់ខ្យល់អាកាសនោះទេ ប៉ុន្តែសោភ័ណភាពរាជធានីភ្នពេញ ក៏ត្រូវវាទាញទម្លាក់ដែរ។ រយៈពេល៨ឆ្នាំមកហើយ ដែលលោក នីដូ បានធ្វើការងារលើកាកសំណល់បន្លែ ផ្លែឈើ កាកអំពៅ សំបកដូង កំទេចរណារ សម្រាប់បណ្តុះផ្សិត និងសំណល់ផ្ទះបាយជាដើមមកកែច្នៃ ព្រោះតែលោក ចង់ឱ្យភ្នំពេញដែលជាបេះដូងរបស់កម្ពុជា ក្លាយជាទីក្រុងបរិស្ថានស្អាត។
:
នៅក្នុងបរិវេណដីឡូត៍ធំមួយកន្លែង នៅខណ្ឌសែនសុខ ជាយរាជធានី មានសំណល់កាកអំពៅ សំបកដូង កំទេចរណារ និងសំណល់ផ្សេងទៀតលាយឡំជាមួយសំណល់បន្លែ និងផ្លែឈើផង ត្រូវបានគេប្រមូលមកទុកគរលើគ្នា។ គំនរសំណល់ចម្រុះនេះមានកម្ពស់ជាង២ម៉ែត្រ និងមានបរិមាណ ជាច្រើនតោន។ ចំណែកម៉ាស៊ីន និងគ្រឿងចក្រផ្សេងៗ ក៏កំពុងដំណើរការកំទេច នឹងបម្លែងសំណល់មួយចំនួនធំនោះទៅជាជីកំប៉ុស និងជីអាចម៍ជន្លេន។ ជីធម្មជាតិនេះ គឺសម្រាប់ផ្គត់ផ្គង់ទៅទីផ្សារ ដែលនឹងជួយជំរុញដល់ផលិតកម្មកសិកម្មក្នុងស្រុក។
បុគ្គលិករបស់ក្រុមហ៊ុន Twin Agri Tech ប្រមូលកាកសំណល់បានពីផ្សារលើកដាក់ចូលឡាន។
លោក គីម នីដូ ដែលជាម្ចាស់ក្រុមហ៊ុនកែច្នៃនេះ បានប្រាប់សារព័ត៌មានថ្មីៗថា លោក និងមិត្តភក្តិជនជាតិសិង្ហបុរីម្នាក់ បានបង្កើតក្រុមហ៊ុន Twin Agri Tech. Co. Ltd ដែលជាក្រុមហ៊ុនកែច្នៃជីកំប៉ុស និងជីអាមច៍ជន្លេន ពីកាកសំណល់ នៅក្នុងឆ្នាំ២០១៣។ មានមាឌក្រអាញបន្តិច សម្បុរស្រគាំ លោក នីដូ ពន្យល់ថា ខ្លួនមានមហិច្ឆតាប្រមូលកាកសំណល់នានានៅក្នុងរាជធានីភ្នំពេញ និងចង់ប្រែក្លាយភ្នំពេញ ដែលមានសំរាមប្រមាណ ៣ពាន់តោនក្នុងមួយថ្ងៃៗ ទៅជាទីក្រុងបរិស្ថានគំរូ។ តាមបុរសបុរសវ័យ៣២ឆ្នាំរូបនេះ កាកសំណល់ដែលក្រុមហ៊ុនខ្លួនប្រមូល ក្រៅពីជួយសម្អាតដល់បរិស្ថានហើយ ក៏ជួយជំរុញផលិតកម្ម ក្នុងវិស័យកសិកម្មកម្ពុជាទៀតផង។ ពីបុគ្គលិកផ្នែកលក់ក្នុងក្រុមហ៊ុនបច្ចេកវិទ្យា ក្លាយជាម្ចាស់ក្រុមហ៊ុនមួយ ដែលធ្វើការងារលើការកែច្នៃកាកសំណល់នៅភ្នំពេញ ព្រោះតែកី្តស្រលាញ់បរិស្ថាន និងកសិកម្ម។
ពេលចាប់ផ្តើមរងការទិតៀន តែលោក នីដូ មិនរាថយទេ
ដំណើរការក្រុមហ៊ុនកែច្នៃកាកសំណល់ គឺមិនងាយស្រួលឡើយ។ ដ្បិតតែមិនចំណាយថវិកាច្រើន ទៅលើវត្ថុធាតុដើម ប៉ុន្តែលោក នីដូ បានចំណាយពេល និងទឹកចិត្តដ៏ច្រើន បញ្ចុះបញ្ចូលឱ្យពលរដ្ឋ ពិសេសអាជីវករ ម្ចាស់កសិដ្ឋាន ផ្តល់កាកសំណល់មកឲ្យខ្លួន។ បើតាមម្ចាស់ក្រុមហ៊ុនមកពីខេត្តស្វាយរៀងរូបនេះ ទម្រាំក្រុមហ៊ុន Twin Agri Tech ដំណើរការមកដល់សព្វថ្ងៃ លោក និងមិត្តភក្តិ បានដើរតួជាម្ចាស់ក្រុមហ៊ុនផង ជាកម្មករប្រមូលសំណល់ពីគំនរសំរាមផង ពន្យល់ពលរដ្ឋឲ្យញែកសំរាមផង ហើយក៏ជាអ្នកផលិតជីកសិកម្មធម្មជាតិពីកាកសំណល់ទាំងផង។ ការងារអប់រំពលរដ្ឋ ឲ្យបែងចែកសំរាម គឺជារឿងដែលលំបាកជាងគេ ហើយពេលខ្លះលោក នីដូ ក៏ទទួលបានការមិនពេញចិត្ត ពីអាជីវករផងដែរ។
អាជីវករលក់ដូងម្នាក់ បានដឹកសំបកដូងយកមកឱ្យក្រុមហ៊ុន Twin Agri Tech ដោយឥតថ្លៃ កាលពីថ្ងៃទី១៩ឧសភា ឆ្នាំ២០២០។
លោក នីដូ រំឭកប្រាប់សារព័ត៌មានថ្មីៗ(ThmeyThmey)ទាំងទឹកមុខស្រពោនថា៖«ពេលចាប់ផ្តើមបង្កើតការងារនេះឡើង គឺយើងមានគ្នាតែ២នាក់គត់ នាំគ្នាអូសរទះម្នាក់មួយៗ ដើរប្រមូលកាកសំណល់ដាក់ឡាន ដើម្បីដឹកយកមកកែច្នៃ។ ពួកយើងដើរប្រមូលកាកសំណល់បណ្តើរ ពន្យល់ពលរដ្ឋបណ្តើរ ពីការបែកចែកកាកសំណល់ឱ្យនៅដាច់ពីសំរាម ហើយពួកយើង ក៏កែច្នៃជីកសិកម្មពីកាកសំណល់ដែលប្រមូលបាននោះ បណ្តើរផងដែរ។ យើងមានការលំបាកខ្លាំង! ពេលខ្លះយើងត្រូវបានពួកគាត់ស្តីបន្ទាសទៀត ព្រោះតែគាត់មិនទុកចិត្តយើង និងមិនយល់ពីគោលបំណងនៃការងារយើង»។
បុគ្គលិករបស់ក្រុមហ៊ុន Twin Agri Tech កំពុងយកកាកអំពៅដាក់ចូលក្នុងម៉ាស៊ីនកិនឱ្យល្អិតសម្រាប់ជីអាចន៍ជន្លេនក្នុងមុខក្រុមហ៊ុន កាលពីថ្ងៃទី១៩ឧសភា ឆ្នាំ២០២០។
ថ្វីដ្បិតជួបការលំបាកលំបិនច្រើនបែបនេះក៏ដោយ លោក នីដូ ថាខ្លួនមិនដែលមានគំនិតបោះបង់ចោលការងារនេះម្តងណាឡើយ។ លោក នៅតែចង់ឲ្យក្តីស្រមៃរបស់ខ្លួន នោះគឺទីក្រុងភ្នំពេញដែលគ្មានសំណល់សរីរាង្គស្អុយរលួយនៅចោលពាសពេញតាមដងផ្លូវ,ផ្សារ,មុខផ្ទះ និងតាមកសិដ្ឋានជាដើម លេចចេញជារូបរាង។ ហើយនេះគឺជាអ្វីដែលជំរុញទឹកចិត្តឲ្យ លោក នីដូ នៅធ្វើការជាមួយនឹងសំរាមរាល់ថ្ងៃនេះ។
រុមបុគ្គលិករបស់ក្រុមហ៊ុន Twin Agri Tech កំពុងរៀបចំទុកដាក់ជីកសិកម្មដែលផលិតបានពីកាកសំណល់ កាលពីថ្ងទី១៩ឧសភា ឆ្នាំ២០២០។
បើតាមលោក នីដូ វត្តមានរបស់ក្រុមហ៊ុន Twin Agri Tech រយៈពេល៨ឆ្នាំកន្លងមកនេះ គឺបានរួមចំណែកក្នុងការបង្រៀន និងផ្លាស់ប្តូរគំនិតរបស់ពលរដ្ឋមួយចំនួន ដែលរស់នៅតាមផ្ទះ អ្នកផ្សារ និងម្ចាស់កសិដ្ឋាន ឱ្យចេះបែកចែក ឬទុកដាក់សំរាម និងកាកសំណល់ឱ្យបានត្រឹមត្រូវផងដែរ។ លោកបាននិយាយដូច្នេះ៖ «ចំពោះអាជីវករ និងពលរដ្ឋដែលឧបត្ថម្ភកាកសំណល់ឱ្យក្រុមហ៊ុនយើង គឺពួកគាត់យល់ដឹងច្រើន ប្រហែល៨០ភាគរយ ពីការបែកចែក និងទុកដាក់កាកសំណល់ឱ្យត្រឹមត្រូវ។ ឥឡូវនេះ ខ្ញុំលែងចំណាយលើការទិញកាកសំណល់ពីពួកគាត់ ដោយសារពីពួកគាត់យល់ពីអត្ថប្រយោជន៍ នៃការងាររបស់ខ្ញុំ ដែលបានជួយគាត់បានមួយចំណែក ក្នុងការដឹកជញ្ជូនចេញកាកសំណល់ដែលគាត់មាន។ ហើយតំបន់ដែលខ្ញុំធ្លាប់ចុះកាយកាកសំណល់ ចេញពីគំនរសំរាមពីមុន គឺពួកគាត់បានទុកដាក់កាកសំណល់ដែលខ្ញុំត្រូវការហ្នឹង ក្នុងថង់ ឬការ៉ុងត្រឹមត្រូវមួយនៅដាច់ដោយឡែកពីសំរាមផ្សេងៗ»។
បច្ចុប្បន្នក្នុងមួយថ្ងៃ ក្រុមហ៊ុននេះ មានលទ្ធភាពប្រមូលកាកសំណល់បានពី៣០ ទៅ៤៥តោន ពី តាមផ្សារអូរឫស្សី, ផ្សារដើមគរ, ផ្សារជម្ពូរវ័ន និងផ្សារនានានៅភ្នំពេញ។ ក្រៅពីនេះក៏មានពលរដ្ឋមួយចំនួន ពិសេសអ្នកលក់ដូង អ្នកលក់ទឹកអំពៅ ដឹកសំបកដូង និងកាកអំពៅ មកឱ្យដល់កន្លែងកែច្នៃរបស់ក្រុមហ៊ុនផងដែរ។ សំណល់ដែលប្រមូលបានក្នុងមួយថ្ងៃៗ អាចផលិតជាជីកំប៉ុស និងជីអាចម៍ជន្លេន បានពី២៣ ទៅ២៥តោន។ បើធៀបនឹងពេលចាប់ផ្តើមដំបូង មានជីកសិកម្មតែប្រមាណ២តោនប៉ុណ្ណោះត្រូវបានផលិត។
តាមលោក គីម នីដូ សំរាមសរីរាង្គជិត៥០តោន ដែលត្រូវបានប្រមូលយកទៅកែច្នៃជារៀងរាល់ថ្ងៃ នោះ គឺមិនបាន១០ភាគរយផងនៃបរិមាណសំណល់សរីរាង្គសរុបនៅភ្នំពេញ ដែលមានរហូតដល់៦០០តោនក្នុងមួយថ្ងៃ។ សម្រាប់លោក នីដូ ចំនួនកែច្នៃនេះ គឺតិចតួចមែនទែន ប៉ុន្តែក្រុមហ៊ុននៅខ្វះឧបករណ៍។ ទោះយ៉ាងណា លោក សង្ឃឹមថា ទៅថ្ងៃអនាគត ក្រុមហ៊ុនខ្លួននឹងមានលទ្ធភាពកែច្នៃសំរាមបានកាន់តែច្រើន ដោយការស្វែងរកកិច្ចសហការជាមួយអាជ្ញាធរ, ក្រុមហ៊ុនប្រមូលសំរាម និងក្រសួងបរិស្ថានប្រមូលកាកសំណល់សរីរាង្គឱ្យអស់ពីភ្នំពេញ និងឈានទៅសម្រេចមហិច្ឆតាប្រែក្លាយភ្នំពេញ ទៅជាទីក្រុងបរិស្ថានគំរូនោះ។
បច្ចុប្បន្ន រាជធានីភ្នំពេញ មានសំរាមចន្លោះ ២,៧០០-៣,០០០តោនក្នុងមួយថ្ងៃ ក្នុងនោះប្រមាណ៤០០-៦០០តោន ឬ១៥-២០ភាគរយ ជាសំរាមសរីរាង្គ,សំរាមប្លាស្ទិកមានពី១,៦០០-១,៩៥០តោន ឬ៦០-៦៥ភាគរយ) និងប្រហែល៦០០តោន ឬ២០ភាគរយទៀត ជាសំណល់រឹង និងសំណល់ឧស្សាហកម្មផ្សេងៗ។ នេះបើយោងតាមរបាយការណ៍របស់ក្រសួងបរិស្ថាន៕
Tag:
កសិកម្ម
ផ្សារ
សំរាម
កាកសំណល់
លោក គីម នីដូ
ស្វាយរៀង
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
