ជាតិ
២៥ខេត្ត/រាជធានី
លោក សាក់ ផុន៖ សាវម៉ាវ ក៏មានទីផ្សារខ្ពស់មិនចាញ់ទុរេនដែរ
× ភ្នំពេញ៖ ចាប់ពីខែមេសា ដល់ខែមិថុនា ជារដូវការប្រមូលផលផ្លែទុរេន និងសាវម៉ាវ។ ពេលវេលាប្រមូលផលទន្ទឹមគ្នា ប៉ុន្តែផ្លែឈើទាំង២ប្រភេទនេះ មានទីផ្សារខ្ពស់មិនចាញ់គ្នានោះទេ។ នេះបើតាមលោក សាក់ ផុន ម្ចាស់ចម្ការទុរេន និងសាវម៉ាវ នៅស្រុកស្រែអំបិល ខេត្តកោះកុង ដែលបានបញ្ជាក់ប្រាប់សារព័ត៌មានថ្មីៗ២៥តាមទូរសព្ទ។
បើតាមលោក សាក់ ផុន ទោះជាឆ្នាំនេះមានវិបត្តិកូវីដ-១៩ ក្តីក៏ផ្លែសាវម៉ាវដែលកំពុងពេញប្រមូលផលរបស់លោក នៅតែមានទីផ្សារខ្ពស់ដដែល។ សាវម៉ាវមួយគីឡូក្រាម លោក ផុន អាចលក់បានចន្លោះ ៤០០០-៦០០០រៀល។ លោក សាក់ ផុន លើកឡើងថា៖«នៅតែមានទីផ្សារលក់អស់ដដែល គ្រាន់តែអ្នកមកទិញយកតិចៗ ត្រឹម៥០០ ទៅ៦០០គីឡូក្រាម។ អ្នកមកទិញសាវម៉ាវបានកើនក្នុងឆ្នាំនេះ តែម្នាក់ៗ យកតិច»។
លោក សាក់ ផុន មានផ្ទៃដីដាំសាវម៉ាវជិតមួយហិកតា ដែលឆ្នាំនេះលោក ផុន ប៉ាន់ស្មានថា លោកអាចប្រមូលផលបានប្រមាណ ២០តោនឯណោះ គឺហុចផលច្រើនជាងឆ្នាំមុនៗទៅទៀត។ កសិករវ័យ ៥៤ឆ្នាំរូបនេះ ក៏មិនច្បាស់ពីមូលហេតុដែរ ប៉ុន្តែលោក បានអះអាងថា លោកថែទាំសាវម៉ាវដោយស្រោចទឹកឲ្យបានទៀងទាត់ និង មិនមានប្រើប្រាស់ជីគីមីនោះទេ គឺលោកប្រើតែជីអាចម៍ប្រចៀវ និងជីអាចម៍គោប៉ុណ្ណោះ។ ក្រៅពីនេះ លោក ផុន បានបន្ថែមទឹកឃ្មុំនៅពេលដាំផងដែរ។ កសិកររូបនេះ បន្តអួតសរសើរពីរសជាតិផ្លែសាវម៉ាវរបស់ខ្លួនប្រាប់ប់ថ្មីៗ២៥យ៉ាងដូច្នេះ៖«សាវម៉ាវហ្នឹងសាច់ស្រួយ និងមិនជាប់គ្រាប់ ហើយវាមានរសជាតិផ្អែមឆ្ងាញ់»៕
© រក្សាសិទ្ធិដោយ thmeythmey.com