ជាតិ
×![]()
កំពង់ចាម៖ លោក ម៉ាង គឹមស្រ៊ិន ជាកសិករនៅភូមិតាប៉ុង ឃុំស្វាយទៀប ស្រុកចំការលើ។ កសិកររូបនេះ មានបច្ចេកទេសកែច្នៃជីធម្មជាតិដោយខ្លួនឯង ដោយប្រើប្រាស់សំបកផ្លែឈើគ្រប់ប្រភេទ ផលិតជីមានគុណភាពល្អ និងដែលកាត់បន្ថយចំណាយទិញជីពីទីផ្សារ។
កសិករលោក ម៉ាង គឹមស្រ៊ិន មានដីចម្ការប្រមាណ២ហិកតា ដែលដាំដំណាំចម្រុះមាន ទុរេន សាវម៉ាវ ខ្នុរ ក្រូចឆ្មារ ក្រូចថ្លុងជាដើម។ នេះជារដូវប្រមូលផលទុរេន និងសាវម៉ាវ ដែលទិន្នផលឆ្នាំនេះបានផល និងមានតម្លៃថ្លៃគួរសម។
កំពុងកិនសំបកផ្លែទុរេន លោក គឹមស្រ៊ិន វ័យ៤០ឆ្នាំនិយាយដោយទឹកមុខញញឹមញញែមថា ក្រោយពីលោកអនុវត្តន៍ផលិតជីទឹក និងជីកំប៉ុសដោយខ្លួនឯងជាង២ឆ្នាំមកនេះ ទិន្នផលដំណាំរបស់លោកកើនផលល្អ និងកាត់បន្ថយការងាប់ដើមបានជាងមុនៗ។ លោក គឹមស្រ៊ិន ផលិតជីដែលអាចប្រើប្រាស់ខួបដោយមិនចាំបាច់ទិញជីនៅលើទីផ្សារ។ «ដំណាំចម្ការខ្ញុំ អត់ប្រើជីគេទាំងអស់ ខ្ញុំផលិតខ្លួនឯងបាន កាត់បន្ថយចំណាយបានច្រើន បើទិញគេមួយគីឡូក្រាមជិត២ពាន់រៀល តែបើផលិតខ្លួនឯងយើងថា ៥រយទៅចុះ...ការធ្វើបែបនេះគឺធម្មជាតិវិលជុំតែម្ដង យើងមិនបាច់បោះចោលទេ កែច្នៃបានទាំងអស់ កាលមិនទាន់ធ្វើខ្លួនឯងខ្ញុំទិញជីគីមីដាក់ដំណាំទុរេន ក្នុងមួយឆ្នាំក្នុងចំណោម១០០ដើមស្លាប់យ៉ាងហោច១០ដើម តែក្រោយអនុវត្តន៍បច្ចេកទេសថ្មី ឃើញថាអត់ទាន់មានងាប់ទេ»។ លោក គឹមស្រ៊ិន បន្ថែម។
ជាកសិករម្នាក់មានភាពវៃឆ្លាតជាមួយរឿងកសិកម្ម លោក គឹមស្រ៊ិន ធ្លាប់បានសិក្សាជំនាញនេះរយៈពេលខ្លីពីអង្គការដែលចុះបង្រៀនដល់ភូមិ។ ចំណេះដឹងគួបផ្សំនឹងការកែច្នៃដោយខ្លួនឯង ធ្វើឱ្យកសិកររូបនេះ ចេះផលិតជីសម្រាប់ផ្គត់ផ្គង់ចម្ការខ្លួន ដែលអាចកាត់បន្ថយប្រចាំឆ្នាំបានមួយផ្នែកធំ។ ក្រៅពីនេះ ដំណាំរបស់លោក គឹមស្រ៊ិន ដែលមានដូចជាទុរេន លក់បានតម្លៃថ្លៃដែលឆ្នាំនេះលក់បានពីតម្លៃ ២ម៉ឺន៥ពាន់រៀល ទៅ៣ម៉ឺនរៀលក្នុងមួយគីឡូក្រាម ដែលជាតម្លៃដ៏ល្អសម្រាប់កសិករ៕
© រក្សាសិទ្ធិដោយ thmeythmey.com
