សៀមរាប៖ ក្រុងអង្គរធំ ជាអតីតរាជធានីនៅសម័យគ្រប់គ្រងដោយព្រះបាទជ័យវរ្ម័នទី៧ ដែលព្រះអង្គ បានធ្វើឱ្យរជ្ជកាលនេះ មានភាពខ្លាំងក្លា និងក្លាយជាអាណាចក្រមួយ ដ៏ធំនាសម័យនោះ។ រាជធានីក្រុងអង្គរធំ សាងសង់ដោយមានកំពែង៤ជ្រុង កម្ពស់៧ម៉ែត្រកន្លះ និងមានខ្លោងទ្វារចំនួន៥។ ដោយសារអាយុកាល ធ្វើឱ្យកំពែងដែលធ្លាប់តែរឹងមាំ ការពារការឈ្លានពានពីសត្រូវគ្រប់ទិសទី បានដួលរលំ និងខូចខាតច្រើនកន្លែង។ បច្ចុប្បន្ន អ្នកជំនាញកំពុងជួសជុល ដើម្បីសង្គ្រោះកំពែងនេះឡើងវិញ ដើម្បីជាកេរមរតកដ៏សំខាន់ ទៅអ្នកជំនាន់ក្រោយ។
ព័ត៌មានពិស្ដារ សូមស្ដាប់បទយកការណ៍ ដែលអ្នកនាង អ៊ីសា រ៉ហានី នឹងលម្អិតជូនអ្នកស្ដាប់ដូចតទៅ
ក្រុមមន្ត្រីជំនាញនៃអាជ្ញាធរជាតិអប្សរា កំពុងជួសជុលកំពែងក្រុងអង្គរធំ នៅចំណុចខាងលិចខ្លោងទ្វារទន្លេអុំ។ នេះជាកិច្ចដ៏សំខាន់មួយ ក្នុងកិច្ចការអភិរក្សសំណង់ប្រាសាទអង្គរ នៃរមណីយដ្ឋានអង្គរ។
លោក ម៉ៅ សុខនី ប្រធានគម្រោងជួសជុលកំពែងក្រុងអង្គរធំ បានឱ្យដឹងថា ក្រុមការងារលោកកំពុងជួសជុលកំពែងអង្គរធំ នៅចំណុចខ្លោងទ្វារទន្លេអុំ ដែលមានប្រវែងសរុប៣២ម៉ែត្រ។ លោកបន្ថែមថា ការងារជួសជុលកំពែងក្រុងអង្គរធំ ចាប់ផ្តើមដំបូងនៅឆ្នាំ២០១៤ ដែលដំណាក់កាលទី១ ឆ្នាំ២០១៤-២០១៦ ជួសជុលបានប្រវែង៨៣ម៉ែត្រ ដំណាក់កាលទី២ នៅខ្លោងទ្វារទន្លេអុំ និងទី៣ នៅចំណុចខាងកើតខ្លោងទ្វារដីឆ្នាំង ដែលសរុបទាំងអស់មានប្រវែង ១៥៥ម៉ែត្រ។
ហានិភ័យធំៗ ដែលធ្វើឱ្យជញ្ជាំងកំពែងក្រុងអង្គរធំ រងការខូចខាត មានកត្ដាធម្មជាតិ អាយុកាលរបស់ថ្ម។ រីឯដើមឈើដែលដុះជ្រែកថ្ម ក៏ដូចជាភាពពុកផុយនៃស្លឹកឈើ ធ្វើឱ្យហូរច្រោះតាមទឹកភ្លៀង ដែលធ្វើឱ្យថ្មកំពែងងាយដួលរលំ។ លោក ម៉ៅ សុខនី ពន្យល់ទៀតថា កត្ដាទាំងនោះ ធ្វើឱ្យជើងជញ្ជាំង ចេះតែរលួសបន្ដិចម្ដងៗ ដែលអាចឱ្យជញ្ជាំងទាំងមូលខូចទ្រង់ទ្រាយដើម ពិសេសភាពចាស់ទ្រុឌទ្រោមរបស់ថ្មតែម្ដង។ ក្រៅពីនេះ នៅឆ្នាំ២០១១ កម្ពុជាបានពើបប្រទះព្យុះស៊ូណាម៉ិ ដែលធ្វើឱ្យមានខ្យល់ និងភ្លៀងធ្លាក់ខ្លាំង បណ្ដាលឱ្យជញ្ជាំងកំពែងក្រុងអង្គរធំ រងការខូចខាតច្រើនផងដែរ។
ទាក់ទងនឹងការដ្ឋាននៅខ្លោងទ្វារទន្លេអុំវិញ លោក ម៉ៅ សុខនី ពន្យល់ថា ទីតាំងនេះ ចាំបាច់ត្រូវទទួលការជួសជុលឱ្យទាន់ពេលវេលា ព្រោះវានៅជិតខ្លោងទ្វារ ដែលអាចមានហានិភ័យដួលរលំថ្មដល់ខ្លោងទ្វារ។ តាមការបញ្ជាក់ពីលោក ម៉ៅ សុខនី កំពែងក្រុងអង្គរធំទាំងមូល មានហានិភ័យខ្ពស់ និងចំណុចខ្លះ អាចទាល់ទ្របណ្ដោះអាសន្ន និងទាមទារឱ្យមានការជួសជុល ទាន់ពេលវេលា។ ចំណុចដែលដួលរលំសរុប ដែលក្រុមអ្នកសិក្សាស្រាវជ្រាវរកឃើញកន្លងមក មានចំនួន១៨ទីតាំង ក្នុងនោះ មាន៧ទីតាំងកំពុងជួសជុល។ ក្រុមការងាររបស់អាជ្ញាធរជាតិអប្សរា នឹងបន្តដាក់ផែនការជួសជុលពីមួយឆ្នាំ ទៅមួយឆ្នាំ ក្នុងន័យសង្គ្រោះកំពែងក្រុងអង្គរធំ ឱ្យមានភាពរឹងមាំឡើងវិញ។
ជាតំបន់រមណីយដ្ឋានបេតិកភណ្ឌពិភពលោក ដូច្នេះការងារអភិរក្ស ជួសជុលនានា គឺត្រូវឆ្លងកាត់ការវាយតម្លៃ ត្រួតពិនិត្យ និងសម្រេចដោយអ្នកជំនាញការជាតិ និងអន្ដរជាតិ។ ចំពោះកំពែងក្រុងអង្គរធំនេះ ក្រុមបច្ចេកទេស បានចុះសិក្សា និងវាយតម្លៃ ដែលបានត្រួតពិនិត្យយ៉ាងត្រឹមត្រូវ ពីអ្នកជំនាញការអាដហុក នៃគណៈកម្មាធិការអន្ដរជាតិ អាយស៊ីស៊ី-អង្គរ។ តាមការសិក្សាកន្លងមក កំពែងក្រុងអង្គរធំ ធ្លាប់ទទួលបានការជួសជុល នៅសម័យបុរាណច្រើនដងរួចហើយ ហើយការអនុវត្តការជួសជុល នាពេលបច្ចុប្បន្ន ក៏យកលំនាំដូចការជួសជុលនៅពេលបុរាណនោះដែរ។ លោក សុខនី បន្ថែម៖«ការជួសជុលនៅសម័យដូនតា មានរបៀបខុសៗគ្នា តែយើងរក្សាទម្រង់ដើម។ កន្លែងជិតៗគ្នា យើងរក្សាទម្រង់ជួសជុលដើម! ដូចការរៀបជញ្ជាំងថ្មបាយក្រៀមដើម្បីកុំឱ្យទឹកជ្រាបតាមជញ្ជាំងគាត់យកកម្ទេកថ្មបាយក្រៀម បុកជាមួយដីឥដ្ឋ ហើយដាក់អែបជាប់ជញ្ជាំងពី២០ ទៅ៣០សង់ទីម៉ែត្រ ពេលទឹកធ្លាក់មក អត់ជ្រាបតាមថ្មទេ គេធ្វើប្រយ័ត្នណាស់ ហ្មត់ចត់...»។
អ្នកជំនាញបានចាត់ទុកកំពែងក្រុងអង្គរធំ ថាជាកំពែងដែលសំខាន់ ដ្បិតវាជាទីក្រុងដ៏ធំ និងល្បីល្បាញ នៅសម័យស្ដេចជ័យវរ្ម័នទី៧។ កូនខ្មែរ ត្រូវរក្សាទម្រង់កំពែងនេះ ឱ្យនៅសភាពដើម មិនត្រូវបាត់បង់នោះទេ។ កំពែងជាកន្លែងសំខាន់ សម្រាប់ការពារក្រុងអង្គរធំ វាមានខ្លោងទ្វារចំនួន៥ ដែលដាក់តាមឈ្មោះ អ្នកថែរក្សានៅជំនាន់នោះ។ កំពែងនេះ មានកម្ពស់៧,៥ម៉ែត្រ បណ្ដោយ១២គីឡូម៉ែត្រ និងមានកសិន្ធុទឹក ទទឹង១០០ម៉ែត្រ និងជាឧបសគ្គដ៏ធំ សម្រាប់សត្រូវដែលចង់ឈ្លានពានក្រុងអង្គរធំ នាសម័យនោះ៕