បងធំអាស៊ាន បដិសេធការចរចាគ្រប់រូបភាពជាមួយនឹងចិនលើបញ្ហាសមុទ្រចិនខាងត្បូង

អន្តរជាតិ

បងធំអាស៊ាន បដិសេធការចរចាគ្រប់រូបភាពជាមួយនឹងចិនលើបញ្ហាសមុទ្រចិនខាងត្បូង

06, Jun 2020 , 9:29 pm

រូបភាព

ដោយ:

រដ្ឋាភិបាលក្រុងហ្សាការតា បានបដិសេធទទួលសំណើរបស់រដ្ឋាភិបាលក្រុងប៉េកាំងក្នុងការចរចាគ្នាពាក់ព័ន្ធការគ្រប់គ្រងក្នុងសមុទ្រចិនខាងត្បូង។ ក្រុងហ្សាការតា ដែលកន្លងមកធ្លាប់មានរឿងប្រទាំងប្រទើសគ្នាជាមួយនឹងក្រុងប៉េកាំងនៅតំបន់ប្រជុំកោះ ណាទុណា នៃសមុទ្រចិនខាងត្បូង បានអះអាងថា ខ្លួនគ្មានរឿងដែលត្រូវចរចាលើតំបន់សមុទ្រចិនខាងត្បូងអ្វីឡើយ។

នេះ គឺជាជំហរដ៏មុតមាំ និងចុងក្រោយមួយរបស់សមាជិកអាស៊ាន ឥណ្ឌូណេស៊ី ដែលបានធ្វើឡើងតបតទៅនឹងចិនដែលត្រូវបានមើលឃើញថាកំពុងតែព្យាយាមបង្កើនឥទ្ធិពល និងសកម្មភាពយ៉ាងគឃ្លើននៅក្នុងតំបន់ជម្លោះសមុទ្រចិនខាងត្បូង។ ឥណ្ឌូណេស៊ី ដែលត្រូវបានគេចាត់ទុកជា រដ្ឋចាស់ទុំ និងមានឥទ្ធិពលមួយក្នុងតំបន់ បានប្រកាសដាច់ខាតមិនចរចាជាមួយនឹងចិនលើតំបន់សមុទ្រចិនខាងត្បូងនោះទេ។

តាមការចុះផ្សាយរបស់សារព័ត៌មានឥណ្ឌូណេស៊ី Benar News នៅថ្ងៃ៥ មិថុនា ក្រសួងការបរទេសឥណ្ឌូណេស៊ី បានបដិសេធសំណើចរចាមួយរបស់ចិនលើសមុទ្រចិនខាងត្បូង ដោយក្រសួងអះអាងថា ឥណ្ឌូណេស៊ី ពុំមានតំបន់ត្រួតស៊ីគ្នាជាមួយនឹងចិននៅក្នុងសមុទ្រចិនខាងត្បូងឡើយ។ តាមការបញ្ជាក់របស់មន្ត្រីជាន់ខ្ពស់ក្រសួងដដែល ទោះការចរចាក្នុងរូបភាពណាក៏ដោយ ក៏ឥណ្ឌូណេស៊ី មិនទទួលយកដែរ។

សេចក្តីថ្លែងការណ៍បដិសេធរបស់ឥណ្ឌូណេស៊ី ធ្វើឡើងបន្ទាប់ពី រដ្ឋាភិបាលក្រុងប៉េកាំង បានធ្វើសំណើចរចាមួយទៅកាន់ឥណ្ឌូណេស៊ី និងកំណត់ទូតមួយទៅកាន់អគ្គលេខាធិការអង្គការសហប្រជាជាតិ ដោយបានទទួលស្គាល់ថា ចិន មិនមានជម្លោះអធិបតេយ្យជាមួយនឹងឥណ្ឌូណេស៊ីឡើយ ក៏ប៉ុន្តែប្រទេសទាំងពីរ មានការទាមទារត្រួតស៊ីគ្នាលើសិទ្ធិគ្រប់គ្រងក្នុងផ្នែកខ្លះនៃសមុទ្រចិនខាងត្បូង។ នេះបើយោងតាមប្រភពព័ត៌មានដដែល។

តាមការអះអាងរបស់មន្ត្រីជាន់ខ្ពស់ឥណ្ឌូណេស៊ីដដែលនោះ ផ្អែកតាមច្បាប់ស្តីពីសមុទ្រឆ្នាំ១៩៨២ របស់អង្គការ សហប្រជាជាតិ (UNCLOS) ឥណ្ឌូណេស៊ី មិនមានការទាមទារត្រួតស៊ីគ្នាជាមួយចិនឡើយ ដូច្នេះ វាមិនមែនជារឿងចាំបាច់អ្វីឡើយ ដែលត្រូវមានកិច្ចសន្ទនាស្តីពីការកំណត់ព្រំដែនសមុទ្រនោះ។

គួរជម្រាបផងដែរថា ក្នុងក្របខណ្ឌអាស៊ាន ជម្លោះសមុទ្រចិនខាងត្បូង មានរដ្ឋពាក់ព័ន្ធដូចជា ព្រុយណេ ម៉ាឡេស៊ី ហ្វីលីពីន និងវៀតណាម ជាមួយនឹងចិន។ ថ្មីៗនេះ វៀតណាម បានចេញសេចក្តីថ្លែងការណ៍ជាបន្តបន្ទាប់ប្រឆាំងនឹងចិន ដែលត្រូវបានរាយការណ៍ បានព្យាយាមបង្កើនសកម្មភាពគ្រប់គ្រងនៅក្នុងសមុទ្រចិនខាងត្បូងដោយឯកតោភាគី ទាំងផ្នែករដ្ឋបាល និងយោធា។

ដោយឡែកសម្រាប់បញ្ហាជាមួយនឹងឥណ្ឌូណេស៊ីវិញ កន្លងមក ចិន ធ្លាប់មានរឿងចម្រូងចម្រាស់រហូតដល់មានការប្រឈមមុខការទូតជាមួយគ្នាខ្លាំង នៅក្នុងតំបន់ប្រជុំកោះណាទុណា ដែលជាផ្នែកមួយនៃសមុទ្រចិនខាងត្បូង ។ សំអាងលើផែនទីប្រាំបួនចំណុច (ផែនទីដែលបញ្ជាក់ថាចិនមានសិទ្ធិគ្រប់គ្រងសមុទ្រចិនខាងត្បូងស្ទើរតែទាំងស្រុង) ចិន អះអាងថា ខ្លួនមានសិទ្ធិខ្លះលើតំបន់ប្រជុំណាទុណា ខណៈឥណ្ឌូណេស៊ី អះអាងថា ជាតំបន់សេដ្ឋកិច្ចផ្តាច់មុខរបស់ខ្លួន។

ដោយសារបញ្ហានេះដែរ កន្លងមក ឥណ្ឌូណេស៊ី បានបញ្ជូនក្រុមទាហានល្បាតទៅកាន់ទីនោះ និងចុងក្រោយនេះ ថែមទាំងបានដាក់មូលដ្ឋានយោធា ដើម្បីការពារការឈ្លានពានពីសំណាក់ប្រទេសខាងក្រៅទៀតផង៕