លោក Duterte ផ្តើម​យុទ្ធនា​ការសម្លាប់​ឈ្មួញ​គ្រឿងញៀន​ជាថ្មី ក្រោយ​រឹបអូស​បាន​សារធាតុ​ញៀន​ជាង​៧០០​គីឡូក្រាម​
អន្តរជាតិ
លោក Duterte ផ្តើម​យុទ្ធនា​ការសម្លាប់​ឈ្មួញ​គ្រឿងញៀន​ជាថ្មី ក្រោយ​រឹបអូស​បាន​សារធាតុ​ញៀន​ជាង​៧០០​គីឡូក្រាម​
07, Jun 2020 , 8:29 pm        
រូបភាព
​លោក​ប្រធានាធិបតី​ហ្វីលីពីន រ៉ូ​ឌ្រី​ហ្គោ ឌូ​ទើ​តេ បានប្រកាស​អនុវត្ត​វិធានការ​ក្តៅ​ជាថ្មី​ប្រឆាំងនឹង​ក្រុម​ឈ្មួញ​ជួញដូរ​គ្រឿងញៀន ដែល​លោក​អះអាងថា បាននិងកំពុង​ប្រើប្រាស់​ហ្វីលីពីន​ជា​កន្លែង​ចែកចាយ​គ្រឿងញៀន​មួយ​យ៉ាងសកម្ម​។ លោក​ប្រធានាធិបតី ព្រមាន​សម្លាប់​ឧក្រិដ្ឋជន​ទាំងនោះ ដោយ​មិន​រើសមុខ​ឡើយ​។

 
 
​ទោះបីជា​ភ្នាក់ងារ​ជំនាញ​អង្គការសហប្រជាជាតិ បាន​ព្រមាន​ពី​ការបំពាន​សិទ្ធិមនុស្ស​ធ្ងន់ធ្ងរ​ពាក់ព័ន្ធ​នឹង​ការសម្លាប់​ក្នុង​ប្រតិបត្តិ​សង្គ្រាម​ប្រឆាំង​គ្រឿងញៀន​ក្រោម​រដ្ឋបាល​ដឹកនាំ​របស់លោក​ប្រធានាធិបតី រ៉ូ​ឌ្រី​ហ្គោ ឌូ​ទើ​តេ​ក៏ដោយ ក៏​លោក ឌូ​ទើ​តេ មិន​ខ្វាយខ្វល់​ឡើយ​។ លោក​ប្រធានាធិបតី នៅតែ​ការពារ​ជំហរ​របស់ខ្លួន​ថា ធ្វើឡើង​ដើម្បី​អនាគត​ល្អ​របស់​ប្រជាជន​ហ្វីលីពីន​ជំនាន់​ក្រោយ​នោះទេ​។​
 
​តាមរយៈ​សន្និសីទ​សារព័ត៌មាន​ថ្ងៃ​៥ មិថុនា លោក​ប្រធានាធិបតី បាន​ឲ្យ​ដឹងថា ប៉ូលិស​ហ្វីលីពីន បាន​រឹបអូស​សារធាតុ​ញៀន​ប្រមាណ ៧៥៦ គីឡូក្រាម ដែល​ត្រូវបាន​គេ​ប៉ាន​ស្មានថា​មានតម្លៃ​ប្រមាណ​ជាង ១០០ លាន​ដុល្លារ​។ ហើយ​ប្រតិបត្តិការ​រឹបអូស​នេះ គឺជា​ប្រតិបត្តិ​ធំ​បំផុត​មួយ គិត​ចាប់តាំងពី​យុទ្ធនាការ​សង្គ្រាម​គ្រឿងញៀន​បានចាប់ផ្តើម​ក្នុង​ឆ្នាំ​២០១៦​មក​។ នេះ​បើ​យោងតាម​ការចុះផ្សាយ​រប​ស់​សារព័ត៌មាន Jakarta Post​។​
 
​ខណៈ​លាក់បាំង​ប្រភព​នៃ​ការ​នាំចូល​គ្រឿងញៀន​ដ៏​ច្រើនសន្ធឹក​សន្ធាប់​នេះ លោក​ប្រធានាធិបតី បាន​ព្រមាន​ថា​៖ ប្រសិន​អ្នក​បំផ្លាញ​ប្រទេស​របស់ខ្ញុំ .... ខ្ញុំ នឹង​សម្លាប់​អ្នក​តែម្តង​។ លោក បន្ថែមថា ហ្វីលីពីន បាន​ក្លាយជា​កន្លែង​សម្រាប់​ក្រុម​ឈ្មួញ​ម៉ិ​កសិក ចែកចាយ​គ្រឿងញៀន​ដ៏​ធំ​មួយ​ក្នុង​តំបន់ ដែល​ចំណុច​នេះ លោក មិនអាច​បណ្តែតបណ្តោយ​ឲ្យ​បានឡើយ​។​
 
​គួរ​ជម្រាប​ថា នៅ​ថ្ងៃ​៤ មិថុនា​កន្លងទៅ​ការិយាល័យ​សិទ្ធិមនុស្ស​អង្គការសហប្រជាជាតិ បានចេញ​របាយការណ៍​មួយ ដោយ​អះអាងថា ប្រតិបត្តិការ​លុបបំបាត់​អំពើ​ជួញដូរ​គ្រឿងញៀន​របស់​រដ្ឋាភិបាល​ហ្វីលីពីន​ពី​ឆ្នាំ​២០១៦​មក បានសម្លាប់​មនុស្ស​ពាក់ព័ន្ធ​យ៉ាងហោចណាស់ ៨៦០០​នាក់ ដែល​ទង្វើ​នេះ ភ្នាក់ងារ​អង្គការសហប្រជាជាតិ សន្យាថា នឹងមាន​វិធាន​ការនាំ​ឲ្យ​មានការ​ទទួលខុសត្រូវ​ទាំង​ក្របខណ្ឌ​ជាតិ និង​អន្តរជាតិ​។​
 
​តាមពិតទៅ​ពាក់ព័ន្ធ​នឹង​បញ្ហា​សង្គ្រាម​គ្រឿងញៀន​របស់​រដ្ឋបាល​ដឹកនាំ លោក រ៉ូ​ឌ្រី​ហ្គោ ឌូ​ទើ​តេ បាន​ធ្លាក់​ដល់​ចំណាត់ការ​ពី​តុលាការ​ព្រហ្មទណ្ឌ​អន្តរជាតិ (ICC) រួចទៅហើយ​។ ទោះបីជា​ហ្វីលីពីន បានប្រកាស​ចាកចេញ​ជា​ផ្លូវការ​ពី​តុលាការ​នេះ​ក្តី តុលាការ បាន​អះអាងថា សំណុំ​រឿងនេះ នៅតែ​ស្ថិតក្រោម​ការស៊ើបអង្កេត និង​វាយតម្លៃ​បឋម​របស់​តុលាការ​ដដែល មុនពេល​ឈានដល់​ការស៊ើបអង្កេត និង​ចោទប្រកាន់​ពេញលេញ​៕ 
 

Tag:
 ហ្វីលីពីន​
  គ្រឿងញៀន​
© រក្សាសិទ្ធិដោយ thmeythmey.com