COVID-19
ជាតិ
COVID-19៖ កម្ពុជាធ្វើតេស្តអ្នកដំណើរតាមយន្តហោះជាង៣៦០០នាក់ ចាប់តាំងពីថ្ងៃទី១៦ ខែឧសភា មក
× លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានបញ្ជាក់នៅក្នុងសេចក្តីជូនព័ត៌មាននៅព្រឹកថ្ងៃអាទិត្យ ទី៧ ខែមិថុនា នេះថា កម្ពុជាបានធ្វើតេស្តអ្នកដំណើរតាមយន្តហោះសរុប៣៦៣៧នាក់ (ស្រី៧៥៦នាក់ និងប្រុស២៨៨១នាក់) ចាប់តាំងពីថ្ងៃទី១៦ ខែឧសភាមក។ ក្នុងចំណោមការធ្វើតេស្តជាបន្តបន្ទាប់ លទ្ធផលវិជ្ជមាន COVID-19 មាន៣នាក់ ក្នុងនោះម្នាក់បានជាសះស្បើយ។ រីឯការតេស្តសំណាកវិភាគសរុបទូទាំងប្រទេស មានចំនួន២១ ៧៤៩សំណាក ដោយគិតចាប់តាំងពីខែមករា មក។
គិតត្រឹមថ្ងៃអាទិត្យ ទី៧ ខែមិថុនា កម្ពុជាមានអ្នកឆ្លងសរុប១២៦នាក់ ដែលក្នុងនោះស្រី៣៩នាក់ និងបុរស៨៧នាក់។ អ្នកជំងឺ១២៣នាក់ បានជាសះស្បើយ រីឯករណី៣ចុងក្រោយ ស្ថិតក្រោមការព្យាបាល ដែលក្នុងនោះមានបុរសខ្មែរដែលបានវិលត្រឡប់ពីហ្វីលីពីន និងបុរសខ្មែរបារាំង (សម្រាកនៅពេទ្យរុស្ស៊ី) និងបុរសខ្មែរម្នាក់ទៀតដែលកំពុងសម្រាកព្យាបាលនៅពេទ្យខេត្តមិត្តភាពកម្ពុជា-ជប៉ុន មង្គលបូរី ខេត្តបន្ទាយមានជ័យ។
បុរសវ័យ៣០ឆ្នាំ ជាជនជាតិខ្មែរ-បារាំង ទើបតែរកឃើញមានករណីនាំចូលកូវីដ-១៩នៅថ្ងៃទី៦ ខែមិថុនា ដោយសារលោកបានធ្វើដំណើរមកពីប្រទេសបារាំងតាមរយៈការហោះហើរពីសាធារណៈរដ្ឋកូរ៉េ មកដល់កម្ពុជា កាលពីថ្ងៃ២៤ ខែឧសភា ឆ្នាំ២០២០។ ក្រោយមកដល់កម្ពុជា ក្រុមគ្រូពេទ្យបានយកសំណាក់របស់គាត់ទៅធ្វើតេស្តកូវីដ-១៩ នៅវិទ្យាស្ថានប៉ាស្ទ័រកម្ពុជា។ ក្រោយការធ្វើតេស្តរយៈពេល១៣ថ្ងៃ ឃើញថាបុរសវ័យយ៣០រូបនេះ ទទួលបានផលវិជ្ជមាន ហើយក៏ត្រូវបញ្ចូនទៅសម្រាកព្យាបាលនៅមន្ទីរពេទ្យមិត្តភាពខ្មែរសូវៀត៕
© រក្សាសិទ្ធិដោយ thmeythmey.com