លោក មូ​ហ៊ី​ឌី​ន យ៉ា​ស៊ីន ៖ COVID-19 នៅ​ម៉ាឡេស៊ី​ឈានដល់​ដំណាក់​សះស្បើយ​ជា​បន្ត​បន្តា​ប់​
COVID-19
អន្តរជាតិ
លោក មូ​ហ៊ី​ឌី​ន យ៉ា​ស៊ីន ៖ COVID-19 នៅ​ម៉ាឡេស៊ី​ឈានដល់​ដំណាក់​សះស្បើយ​ជា​បន្ត​បន្តា​ប់​
07, Jun 2020 , 4:45 pm        
រូបភាព
នាយករដ្ឋមន្រ្តីម៉ាឡេស៊ី លោក មូហ៊ីឌីន យ៉ាស៊ីន ។ រូបភាព៖ Bernama
នាយករដ្ឋមន្រ្តីម៉ាឡេស៊ី លោក មូហ៊ីឌីន យ៉ាស៊ីន ។ រូបភាព៖ Bernama
​បន្ទាប់ពី​ស្ថានភាព​ជំងឺ​រលាក​សួត ដែល​បង្កដោយ​កូ​រ៉ូ​ណាវី​រុស​(COVID-19) នៅក្នុង​ប្រទេស​មាន​ស្ថានភាព​ធូរស្រាល ម៉ាឡេស៊ី នឹង​ចាប់ផ្តើម «​ដំណាក់កាល​ជាសះស្បើយ​» នៅក្នុង​ប្រទេស នាពេល​ឆាប់ៗ​ខាងមុខ​។ នេះ​បើតាម​សេចក្តីប្រកាស​របស់​នាយ​ក​រដ្ឋមន្ត្រី​ម៉ាឡេស៊ី នៅ​ថ្ងៃទី​៧ ខែមិថុនា​។


 
​ម៉ាឡេស៊ី បានដាក់​ប្រទេស​ក្រោម​បទបញ្ជា​រឹតត្បិត​ការធ្វើដំណើរ​តាំងពី​ថ្ងៃទី​១៨ ខែមីនា​មក​ម្លេះ និង​ត្រូវ​បន្ត​រហូតដល់​ថ្ងៃទី​៩ ខែមិថុនា​នេះ ដើម្បី​ទប់ស្កាត់​ការ​រាតត្បាត​នៃ COVID-19 នៅក្នុង​ប្រទេស​។​
 
​ដោយ​មើលឃើញថា ស្ថានភាព​អ្នក​ឆ្លង​កូ​រ៉ូ​ណាវី​រុស មានការ​ធ្លាក់ចុះ ម៉ាឡេស៊ី សម្រេច​ដាក់ចេញ​វិធានការ​ថ្មី ដើម្បី​បើក​ប្រទេស​ឡើងវិញ​។ ថ្លែង​តាម​កញ្ចក់​ទូរទស្សន៍​នៅ​ថ្ងៃទី​៧ ខែមិថុនា លោក មូ​ហ៊ី​ឌី​ន យ៉ា​ស៊ីន (Muhyiddin Yassin) នាយករដ្ឋមន្ត្រី​ម៉ាឡេស៊ី បាន​លើកឡើងថា​៖ « ម៉ាឡេស៊ី បាន​ទប់ស្កាត់​ការ​រាតត្បាត​នៃ​ជំងឺឆ្លង​សកល (COVID-19) បាន​យ៉ាង​ជោគជ័យ ហើយ​ឥឡូវនេះ ម៉ាឡេស៊ី នឹង​ឈានដល់ ដំណាក់កាល​ជាសះស្បើយ​»​។ ដំណាក់កាល​ជាសះស្បើយ​នេះ នឹង​ចាប់ផ្តើម​ពីថ្ងៃ​ទី​១០ ខែមិថុនា​ខាងមុខនេះ រហូតដល់​ថ្ងៃទី​៣១ ខែសីហា​។ 
 
​តាមរយៈ «​ដំណាក់កាល​ជាសះស្បើយ​» នេះ ម៉ាឡេស៊ី នឹង​អនុញ្ញាត​ឲ្យ​ដំណើរការ​សកម្មភាព​មួយចំនួន​ឡើងវិញ ប៉ុន្តែ​ត្រូវ​ស្ថិតក្រោម​លក្ខខណ្ឌ​ខ្លះ​។ បើតាម​ការបញ្ជា​ក់រប​ស់លោក​នាយករដ្ឋមន្ត្រី ស្ទើរតែ​សកម្មភាព​អប់រំ សង្គម សកម្មភាព​សាសនា ជំនួញ វិស័យសេដ្ឋកិច្ច នឹង​បើក​ដំណើរការ​ឡើងវិញ ប៉ុន្តែ​ត្រូវគោរព​តាម​នីតិវិធី​ស្តង់ដា​មួយចំនួន ដើម្បី​ទប់ស្កាត់​ការកើនឡើង​នៃ COVID-19 សារជាថ្មី​។ នេះ​បើតាម​ការចុះផ្សាយ​របស់​ទូរទស្សន៍ Channel News Asia​។ 
 
​ផ្អែក​តាម​ដំណាក់កាល​ជាសះស្បើយ​នេះ ម៉ាឡេស៊ី នឹង​បើក​ឲ្យ​មានការ​ធ្វើដំណើរ​ឆ្លងរ​ដ្ឋ​ឡើងវិញ លើកលែងតែ​រដ្ឋ​មួយចំនួន ដែល​ស្ថិតក្រោម​វិធាន​នៃ​ការ​រឹតត្បិត​ការធ្វើដំណើរ​។ ចំណែក​ពលរដ្ឋ​ម៉ាឡេស៊ី ដែល​នៅ​បរទេស ក៏​ត្រូវគេ​អនុញ្ញាត​ឲ្យ​ត្រលប់​ចូល​ប្រទេស​វិញ​ដែរ ប៉ុន្តែ​ស្ថិតក្រោម​វិធាន​ច​ត្តា​ឡី​ស័ក​។ ចំណែក​សាលារៀន រដ្ឋាភិបាល បាន​បញ្ជាក់ថា មិនទាន់បាន​សម្រេច​ឡើយ ជុំវិញ​ការបើក​ឲ្យ​សិស្ស​ចូលរៀន​ឡើងវិញ​។ 
 
​សូមបញ្ជាក់ថា គិត​ត្រឹម​ថ្ងៃទី​៦ ខែមិថុនា ម៉ាឡេស៊ី​មាន​ករណី​ឆ្លង COVID-19 សរុប​ចំនួន ៨៣០៣​ករណី អ្នកស្លាប់​ចំនួន ១១៧​នាក់ និង​អ្នកជា​សះស្បើយ​មាន​ចំនួន ៦៦៣៥​នាក់​៕ 

Tag:
 ​ម៉ាឡេស៊ី​
  COVID-19
© រក្សាសិទ្ធិដោយ thmeythmey.com