COVID-19
ជាតិ
ក្រសួងទេសចរណ៍រៀបវគ្គបណ្តុះបណ្តាលអនឡាញលើការពង្រឹងសមត្ថភាពតបនឹងកូវីដ-១៩ លោក ថោង ខុន រដ្ឋមន្ត្រីក្រសួងទេសចរណ៍
× ភ្នំពេញ៖ ចាប់ពីថ្ងៃទី២២ ខែមិថុនា ដល់ថ្ងៃទី២០កក្កដា ឆ្នាំ២០២០ ក្រសួងទេសចរណ៍ នឹងរៀបចំវគ្គបណ្ដុះបណ្ដាល និងវាយតម្លៃសមត្ថភាពដល់បុគ្គលិក និងយោជិកបម្រើការងារនៅតាមអាជីវកម្មសេវាទេសចរណ៍ ដើម្បីអភិវឌ្ឍសមត្ថភាពអ្នកជំនាញទេសចរណ៍ឆ្លើយតបនឹងជំងឺកូវីដ-១៩។ នេះបើតាមសេចក្ដីជូនដំណឹងរបស់ក្រសួងទេសចរណ៍នៅថ្ងៃទី៥ មិថុនា។
តាមសេចក្ដីប្រកាសព័ត៌មានដដែល វគ្គបណ្ដុះបណ្ដាលនេះនឹងធ្វើឡើងចាប់ពីថ្ងៃចន្ទ ដល់ថ្ងៃសុក្រ រយៈពេល២វេន ដែលវេនព្រឹកចាប់ពីម៉ោង៩-១១ព្រឹក និងរសៀលចាប់ពីម៉ោង៣-៥ល្ងាច។ វគ្គបណ្ដុះបណ្ដាលនេះសិក្សាតាមរយៈប្រព័ន្ធអនឡាញ ដែលមានចំនួន៥វគ្គសិក្សា។ វគ្គទី១ សិក្សាចំណេះដឹងអំពីវិធានការការពារជាមូលដ្ឋាន និងគោលការណ៍ណែនាំស្ដីពីការបង្ការ និងត្រួតពិនិត្យការចម្លងរោគសម្រាប់ឧស្សាហកម្មទេសចរណ៍។ វគ្គទី២ អនុវត្តការងារស្របតាមនីតិវីធីអនាម័យនៅកន្លែងការងារ។ វគ្គទី៣ អនុវត្តនីតិវិធីសុខភាព នងិសុវត្ថិភាពក្នុងអាជីព។ វគ្គទី៤ សម្អាតបរិវេណ និងឧបករណ៍ និងវគ្គទី៥ ក្រមប្រតិបត្តិ និងវិធានសុវត្ថិភាពទេសចរណ៍សម្រាប់អាជីវកម្មទេសចរណ៍។
អំឡុងពេលសិក្សាក្នុងវគ្គនីមួយ សិក្ខាកាមទាំងអស់ត្រូវឆ្លងកាត់ការប្រឡងពេលបញ្ចប់វគ្គ រយៈពេល៤៥នាទី។ សិក្ខាទាំងអស់មានរយៈពេល១សប្ដាហ៍ ដើម្បីធ្វើស្វ័យប្រឡងតេស្តសមត្ថភាពរបស់ខ្លួនតាមអនឡាញ ហើយក្រោយពីប្រឡងជាប់នឹងទទួលបានវិញ្ញាបនបត្របញ្ជាក់សមត្ថភាពពីក្រសួងទេសចរណ៍។ សម្រាប់ការប្រឡងនឹងចាប់ផ្ដើមពីថ្ងៃទី២៩ ខែមិថុនា ដលថ្ងៃទី២៧ ខែកក្កដា ឆ្នាំ២០២០។
លើសពីនេះ ដើម្បីទទួលបាននូវការទទួលស្កាល់សមត្ថពិតប្រាកដផ្នែកទេសចរណ៍ ស្របទៅតាមស្តង់ដារ សិក្ខាកាមដែលបានសិក្សាក្នុងវគ្គបណ្ដុះបណ្ដាលទាំងអស់ ត្រូវទទួលបានការវាយតម្លៃយ៉ាងហោចណាស់ ៣សមត្ថភាព ដែលតម្រូវក្នុងវគ្គសិក្សា។
សម្រាប់បុគ្គលិកបម្រើការងារតាមអាជីវកម្ម សេវាកម្មទេសចរណ៍ បដិសណ្ឋារកិច្ច និងការធ្វើដំណើរទាំងអស់ដែលមានចំណាប់អារម្មណ៍ និងមានសមត្ថភាព អាចចុះឈ្មោះតាមរយៈ
https://www.tptd.org ។
Tag:
ក្រសួងទេសចរណ៍
កូវីដ-១៩
© រក្សាសិទ្ធិដោយ thmeythmey.com