ពីនេះ ពីនោះ
ហេតុអ្វីអ្នកបើកឡានថ្លៃខ្លះ ចុច «ស៊ីផ្លេ» ដេញគេចេញពីមុខឡានខ្លួនឯង ?
× ផ្អាករឿងកូវីដ-១៩ ក្លើសុធីរ និងសំណាង ត្រឡប់មកនិយាយរឿងចរាចរណ៍វិញម្តង។ សុធីរ និយាយទូលពិតទៅសំណាង ខឹងរឿងអ្នកបើកឡានធំៗ ថ្លៃៗមួយចំនួនតូច បើកបរឥតសីលធម៌ ស៊ីផ្លេដាក់អ្នកធ្វើដំណើរផ្សេងៗទៀតឱ្យចៀសចេញពីគន្លងផ្លូវរបស់ខ្លួន។
សុធីរ៖ មនុស្សចេញជិះពេញផ្លូវវិញហើយអ្ហាអើយ! ដល់ពេលចង្អៀតណែន អ្នកបើកបរឡានថ្លៃខ្លះដែលនិយម ស៊ីផ្លេ ដេញគេឱ្យចេញឆ្ងាយពីឡានខ្លួនឯងនោះ ចេញមកទៀតហើយ។
សំណាង៖ មិនមែនម្ចាស់ឡានទេ។ ច្រើនតែពួក chauffeur ទេ។
សុធីរ៖ ពេលខ្លះ គឺតៃកុងឡានមែន តែម្ចាស់ឡានអង្គុយនៅពីក្រោយដែរតើ។ ម៉េចមិនប្រាប់តែកុងទៅ? ព្រោះបើគេជេរ គឺគេជេរម្ចាស់ឡានហើយ។ បើគេថតលេខឡានបង្ហោះហ្វេសប៊ុក គឺឡានរបស់អ្នកអង្គុយក្រោយនោះហើយ។ តែអញថា ម្ចាស់ឡានខ្លះ បើកបរផ្ទាល់ខ្លួនឯង ក៏អត់សូវគិតដែរ។ ដូចផ្លូវហ្នឹង គាត់បង់ពន្ធជិះម្នាក់ឯងអីចឹង។
សំណាង៖ អញមិនកាន់ជើង អ្នកបើកបរឥតសីលធម៌ហ្នឹងទេ។ ចុចស៊ីផ្លេ ឱ្យគេចៀសពីគន្លងខ្លួនឯង ពិសេសពេលស្ទះផ្លូវផង គឺមិនត្រូវទេ។ ប៉ុន្តែ អញក៏ទើសចិត្តនឹងអ្នកបើកបរចុចទូរសព្ទ និយាយទូរសព្ទរំភើយ ហើយនៅពីមពើមកណ្តាលថ្នល់ហ្នឹងដែរ។ មិនដឹងអង្កាល់ណា វាអស់ អាធុនហ្នឹង?
សុធីរ៖ យី អានេះ! និយាយចុះ និយាយឡើង ខឹងខ្លាំងជាងអញទៀត?
© រក្សាសិទ្ធិដោយ thmeythmey.com