COVID-19
អន្តរជាតិ
ផែនទីពិភពលោក ដែលកំណត់ពីករណី COVID-19។ រូបភាព៖Bing
×![]()
ដោយ: ធៀន ភារិន្ទ
ពិភពលោក បានកើនករណីឆ្លងជំងឺរលាកសួត ដែលបង្កដោយកូរ៉ូណាវីរុស(COVID-19) ដល់ជាង ៧លានករណីហើយ ខណៈពេលអាមេរិក ដែលឈរនៅតារាងទីមួយ នៃប្រទេសមានករណីCOVID-19 ច្រើនជាងគេនោះ បានកើនដល់ជាង ២លានករណី។ នេះបើតាមតួលេខរបស់វេបសាយ Worldometer ថ្ងៃទី៨ ខែមិថុនា។ 
ករណីឆ្លងCOVID-19 សរុបនៅលើពិភពលោក បានកើនដល់ ៧០៨៦០០៨ករណី អ្នកស្លាប់មានចំនួន ៤០៦១០៧នាក់ និងអ្នកជាសះស្បើយមានចំនួន ៣៤៥៩៩៧២នាក់ គិតត្រឹមព្រឹកថ្ងៃទី៨ ខែមិថុនា។
ជាងរយៈពេល ៦ខែហើយក្រោយការផ្ទុះឡើងនៅចិន ស្ថានភាព COVID-19 ហាក់មានភាពធូរស្រាល ឬករណីឆ្លងតិចនៅប្រទេសមួយចំនួននៅអឺរ៉ុប អាស៊ីអាគ្នេយ៍។ ប៉ុន្តែតំបន់ផ្សេងទៀត ដូចជាអាមេរិក អាមេរិកខាងត្បូង គឺមានការកើនឡើងខ្ពស់។ ប្រទេសដែលកើនឡើងច្រើនជាងគេ ក្នុងរយៈពេលចុងក្រោយនេះ គឺប្រេស៊ីល ដែលមានអ្នកឆ្លងក្នុងមួយថ្ងៃរហូតដល់ ជាង ២ម៉ឺនករណី ហើយថ្ងៃខ្លះមានដល់ ៣ម៉ឺនករណី ប៉ុន្តែនៅថ្ងៃទី៧ ខែមិថុនា ប្រេស៊ីលបានរាយការណ៍ថា មានករណីឆ្លងជិត ២ម៉ឺនករណី។
ក្នុងពេលជាមួយគ្នា នៅអាមេរិកឯណោះវិញ អាជ្ញាធរសុខាភិបាលរបស់ខ្លួន បានរាយការណ៍ថា ករណីឆ្លងកូរ៉ូណាវីរុសសរុប គឺបានកើនឡើងដល់ជាង ២លានករណីហើយ។ រដ្ឋញូវយ៉ក នៅតែមានករណីឆ្លងច្រើនជាងគេ ដោយមានចំនួនជាង ៣០ម៉ឺនករណី បន្ទាប់មកគឺរដ្ឋ New Jersey និង California មានចំនួនជាង ១០ម៉ឺនករណី។
ដោយឡែកនៅតំបន់អាស៊ីវិញ ឥណ្ឌា ក៏បានរាយការណ៍ថាមានករណីឆ្លងច្រើនដែរ។ ដោយនៅថ្ងៃទី៧ ខែមិថុនា ឥណ្ឌា មានចំនួនអ្នកឆ្លងរហូតដល់ ជាង១ម៉ឺនករណី។ ចំនួនឆ្លងដ៏ច្រើន ក្នុងមួយថ្ងៃៗបែបនេះ បានធ្វើឲ្យ ឥណ្ឌា ឈរនៅលំដាប់ទី៦ នៃប្រទេសមាន COVID-19 ច្រើនជាងគេ។ តួលេខឆ្លងរបស់ឥណ្ឌាមានចំនួន ជាង ២៥ម៉ឺនករណី។
ចំណែកនៅបណ្តាប្រទេសនៅតំបន់អឺរ៉ុបវិញ អេស្ប៉ាញ អ៊ីតាលី អាល្លឺម៉ង់ បារាំង គឺមានករណីឆ្លងថយចុះយ៉ាងខ្លាំង ពោលគឺមានករណីឆ្លងក្នុងមួយថ្ងៃតិចជាង ៤០០ករណី។ ចំណែកអង់គ្លេសវិញ មានចំនួនករណីឆ្លង ជាង ១០០០ករណីក្នុងមួយថ្ងៃ។
ដោយឡែកនៅតំបន់អាស៊ីអាគ្នេយ៍វិញ ចំនួនឆ្លងក្នុងប្រទេសនីមួយៗ គឺមានការធ្លាក់ចុះជាលំដាប់។ ឥណ្ឌូណេស៊ី ហ្វីលីពីន និងសិង្ហបុរី បានរាយការណ៍ករណីឆ្លងច្រើនជាងគេក្នុងមួយថ្ងៃៗ។ ប្រទេសទាំង៣ មានចំនួន អ្នកឆ្លងលើសពី៣០០ករណីក្នុងមួយថ្ងៃ៕
Tag:
អាមេរិក
COVID-19
© រក្សាសិទ្ធិដោយ thmeythmey.com
