សមត្ថកិច្ច ចាប់បុរស៤នាក់ ជាមួយសារធាតុផលិតគ្រឿងញៀនជាង១០០គីឡូក្រាម

ជាតិ

សង្គមជាតិ

សមត្ថកិច្ច ចាប់បុរស៤នាក់ ជាមួយសារធាតុផលិតគ្រឿងញៀនជាង១០០គីឡូក្រាម

08, Jun 2020 , 3:14 pm

រូបភាព

ជនជាតិចិនទាំង៤នាក់ និង គ្រឿងញៀនដែលដកហូតបាន។ (រូបពីអគ្គស្នងការដ្នាននគរបាលជាតិ)

ដោយ: ឡាយ សុភាវតី

ភ្នំពេញ៖ កម្លាំងជំនាញមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ បានឃាត់ខ្លួនជន សង្ស័យជាជនជាតិចិន៤នាក់ ហើយដកហូតបានសារធាតុញៀនជាង១០០គីឡូក្រាម នៅសង្កាត់ ទន្លេបាសាក់ និងសង្កាត់ បឹងកេងកងទី១ រាជធានីភ្នំពេញ។ នេះយោងតាមការចេញផ្សារលើគេហទំព័ររបស់អគ្គស្នងការដ្ឋាននគរបាលជាតិ នៅថ្ងៃទី៨ ខែមិថុនា។

កាលយប់ពីថ្ងៃទី៥ ខែមិថុនា សមត្ថកិច្ចបានចុះបង្ក្រាបគោលដៅ២កន្លែងផ្សេងគ្នា គឺនៅចំណុចក្បែរស្ថានទូតអូស្ត្រាលី ក្នុងសង្កាត់ទន្លេបាសាក់ ខណ្ឌចំការមន និងអគារជួលមួយកន្លែងលើផ្លូវ៣៥២ ស្ថិតនៅសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។ ការចុះបង្ក្រាបនេះ សមត្ថកិច្ចបានឃាត់ខ្លួនជនជាតិចិនទាំង៤នាក់នោះ និងថ្នាំញៀនជាង៧គីឡូក្រាម។

លើសពីនេះ សមត្ថកិច្ចបានដកហូតសារធាតុផ្សំសម្រាប់ផលិតថ្នាំញៀន១០៩គីឡូក្រាមបន្ថែមទៀត។

បុរសជនជាតិទាំង៤នាក់ ត្រូវបានកម្លាំងជំនាញរៀបសំណុំរឿង ហើយបញ្ជូនទៅតុលាការនៅថ្ងៃនេះ៕