ជាតិ
បញ្ហាកូវីដ ធ្វើឱ្យខេត្តបន្ទាយមានជ័យ មានផ្សារបន្លែសុវត្ថិភាពនៅកណ្តាលក្រុងសេរីសោភ័ណ
លោក អ៊ុំ រាត្រី អភិបាលខេត្តបន្ទាយមានជ័យ ថ្លែងសន្និសីទសារព័ត៌មាន នៅទីស្តីការគណៈរដ្ឋមន្ត្រី កាលពីថ្ងៃទី៤មិថុនា ឆ្នាំ២០២០
×![]()
ភ្នំពេញ៖ អាជ្ញាធរខេត្តបន្ទាយមានជ័យ កំពុងរៀបចំបង្កើតផ្សារកសិផលសុវត្ថិភាព នៅចំកណ្តាលក្រុងសេរីភ័ណ។ ផ្សារនេះ នឹងដាក់ឱ្យដំណើរការយ៉ាងយូរបំផុតនៅក្នុងខែកក្កដា ឆ្នាំ២០២០។ នេះជាការលើកឡើងរបស់លោក អ៊ុំ រាត្រី អភិបាលខេត្តបន្ទាយមានជ័យ ។
បើតាម លោក អ៊ុំ រាត្រី គោលបំណងបង្កើតផ្សារកសិផលសុវត្ថិភាពនេះឡើងដើម្បីជំរុញ និងលើកម្ពស់ជីវភាពរស់នៅប្រជាពលរដ្ឋក្នុងស្រុក តាមរយៈការដាំំបន្លែ និងការចិញ្ចឹមសត្វប្រភេទណា ដែលទទួលបានទិន្នផល រយៈពេលខ្លី សម្រាប់លក់នៅលើទីផ្សារ។ ជាពិសេសជួយដល់ពលរដ្ឋដែលត្រលប់មកពីប្រទេសថៃវិញ ហើយអត់ការងារធ្វើ ដោយសារវិបត្តិកូវីដ-១៩។ អភិបាលខេត្តបន្ទាយមានជ័យរូបនេះ បានអះអាងថា បញ្ហាជំងឺកូវីដ-១៩នេះ មិនត្រឹមតែធ្វើឱ្យពលរដ្ឋខ្មែរមួយចំនួន នៅក្រៅប្រទេសអត់ការងារធ្វើទេ សូម្បីតែពលរដ្ឋក្នុងស្រុកជាច្រើនក៏បាត់បង់ការងារផងដែរ។
លោក អ៊ុំ រាត្រី និយាយប្រាប់សារព័ត៌មានថ្មីៗ(ThmeyThmey)តាមទូរសព្ទ នៅថ្ងៃទី៨មិថុនានេះ ដូច្នេះ៖ «កន្លងមកយើងជួបបញ្ហាកូវីដ-១៩ ធ្វើឱ្យពលរដ្ឋក្នុងស្រុកមួយចំនួនអត់កាងារធ្វើ ហើយបងប្អូនដែលត្រលប់មកពីថៃវិញក៏អត់ការងារធ្វើផងនោះ យើងក៏បានបង្កើតក្រុមការងារដើម្បីជំរុញពួកគាត់ឱ្យដាំបន្លែ ចិញ្ចឹមមាន់ ចិញ្ចឹមទា ចិញ្ចឹមត្រី ដើម្បីបានចំណូលសម្រាប់ផ្គត់ផ្គង់ជីវភាពប្រចាំថ្ងៃ។ ក្រៅពីជំរុញឱ្យពួកគាត់ដាំបន្លែនិងចិញ្ចឹមសត្វហើយនោះ យើងក៏បានបង្កើតក្រុមកាងារមួយទៀត សម្រាប់ជួយរកទីផ្សារឱ្យពួកគាត់ គឺតាមរយៈការបង្កើតផ្សារកសិផលសុវត្ថិភាពនេះឡើង និងទីផ្សារនាំចេញផ្សេៗទៀត»។
ក្រៅពីជំរុញពលរដ្ឋឱ្យដាំបន្លែ ចិញ្ចឹមសត្វ និងជួយរកទីផ្សារឱ្យនោះ អាជ្ញាធរខេត្តក៏បានបង្កើតក្រុមការងារជួយសម្របសម្រួលផ្នែកដើមទុនដល់ពលរដ្ឋផងដែរ។ ចំណុចទាំងនេះ នឹងអាចលើកកម្ពស់ជីវភាពរស់នៅរបស់ពលរដ្ឋក្នុងខេត្តបន្ទាយមានជ័យឱ្យបានល្អប្រសើរ បានល្អមួយកម្រិតទៀត។ នេះបើតាមលោក អ៊ុំ រាត្រី ។
ខេត្តបន្ទាយមានជ័យមានប្រជាពលរដ្ឋ៨៥ភាគរយ ប្រកបរបក្នុងវិស័យកសិកម្ម។ ក្នុងនោះ មានដំណាំ៦ប្រភេទបម្រើដល់ការនាំចេញរបស់កម្ពុជា រួមមាន ស្រូវ គ្រាប់ឈូកគ្រៀប ស្វាយកែវរមៀត ពោតក្រហម គ្រាប់ស្វាយចន្ទី និងម្ទេសក្រៀម។ នេះបើយោងតាមរបាយការណ៍ប្រចាំឆ្នាំ២០១៩របស់ខេត្តបន្ទាយមានជ័យកន្លងមក៕
Tag:
បន្លែសុវត្ថិភាព
បន្ទាយមានជ័យ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
