COVID-19
អន្តរជាតិ
ប្រធានធនាគារពិភពលោក លោក David Malpass (AFP)
×![]()
ជំងឺរាតត្បាតសកល COVID-19 នឹងទម្លាក់កំណើនសេដ្ឋកិច្ចសកលរហូតដល់៥,២ភាគរយក្នុងឆ្នាំ២០២០នេះ ដែលជាវិបត្តិសេដ្ឋកិច្ចអាក្រក់បំផុត ចាប់ពីសង្គ្រាមលោកលើកទី២មក។ ធនាគារពិភពលោក បញ្ជាក់បែបនេះក្នុងរបាយការណ៍នៅថ្ងៃទី៨ ខែមិថុនា ដោយសង្កត់ធ្ងន់ថា ក្រោមសេណារីយ៉ូអាក្រក់ផុតលេខ កំណើនសេដ្ឋកិច្ចសកលអាចដាំក្បាលចុះរហូតដល់៨ភាគរយ។ ទន្ទឹមនេះ វិបត្តិនេះ ក៏នឹងរុញច្រានមនុស្សរាប់សិបលាននាក់ធ្លាក់ចូលក្នុងបន្ទាត់ភាពក្រីក្រខ្លាំងផងដែរ។
ក្នុងបណ្ដាប្រទេសអ្នកមាន សកម្មភាពសេដ្ឋកិច្ច រំពឹងនឹងធ្លាក់ចុះ ៧ភាគរយ ដ្បិតការរាលដាលCOVID-19 បន្តបង្អាក់ខ្លាំងលើតម្រូវការនិងការផ្គត់ផ្គង់ក្នុងស្រុក ព្រមទាំងសកម្មភាពហិរញ្ញវត្ថុនិងពាណិជ្ជកម្ម។ របាយការណ៍ WB លើកឡើងបែបនេះ។
ដោយឡែក សេដ្ឋកិច្ចនៃបណ្ដាប្រទេសកំពុងអភិវឌ្ឍនិងមានទីផ្សារលេចឡើង រំពឹងនឹងដាំក្បាលចុះ ២,៥ភាគរយ ដែលការធ្លាក់ចុះលើកដំបូងក្នុងពេល៦០ឆ្នាំចុងក្រោយ។ ទន្ទឹមនេះ ចំណូលមធ្យមក្នុងមនុស្សម្នាក់ៗ (per capita income) ត្រូវបានព្យាករថាធ្លាក់ចុះ ៣,៦ភាគរយ ដែលនឹងធ្វើឲ្យមនុស្សរាប់លាននាក់ធ្លាក់ចូលក្នុងភាពក្រីក្រខ្លាំង។
របាយការណ៍ធនាគារពិភពលោកកម្រាស់ជាង២០០ទំព័រដដែល គូសបញ្ជាក់ទៀតថា ប្រទេសរងគ្រោះខ្លាំងបំផុត គឺជាប្រទេសដែលជំងឺរាតត្បាតសកល COVID-19 នេះមានកម្រិតធ្ងន់ធ្ងរខ្លាំង ហើយសេដ្ឋកិច្ចពួកគេពឹងផ្អែកខ្លាំងលើពាណិជ្ជកម្មសកល វិស័យទេសចរណ៍ និងការនាំចេញវត្ថុធាតុដើម។
«នេះគឺជារបាយការណ៍ទស្សនវិស័យសេដ្ឋកិច្ចអាក្រក់មួយ ដោយវិបត្តិនេះ ទំនងបន្សល់ទុកស្នាកស្នាមរយៈពេលវែងទៀត ហើយបង្កបញ្ហាប្រឈមសកលធ្ងន់ធ្ងរ»។ អនុប្រធានធនាគារពិភពលោក អ្នកស្រី Ceyla Pazarbasioglu បញ្ជាក់ប្រាប់អ្នកព័ត៌មានបែបនេះនៅថ្ងៃទី៨ ខែមិថុនា ដោយព្រមានទៀតថា ជម្រៅនៃវិបត្តិនេះ នឹងរុញច្រានមនុស្ស៧០-១០០លាននាក់ធ្លាក់ចូលក្នុងភាពក្រីក្រខ្លាំង។ ការព្យាករថ្មីនេះគឺអាក្រក់ជាងលើកមុន ៦០លាននាក់។ នេះបើតាម AFP ។
របាយការណ៍ក្រោមចំណងជើង «Global Economic Propects» ដែលមាន៤ជំពូកធំៗនេះ សង្កត់ធ្ងន់ថា៖«ការបិទទ្វាររោងចក្រ និងបង្អាក់ផលិតកម្មទំនិញពាក់កណ្ដាលសម្រេច ជះឥទ្ធិពលអវិជ្ជមានលើសង្វាក់ផ្គត់ផ្គង់ក្នុងប្រទេស កម្ពុជា ម៉ាឡេស៊ី មីយ៉ាន់ម៉ា និងថៃ។ ការរឹតត្បិតក្នុងស្រុក និងផលប៉ះពាល់ពីខាងក្រៅ បង្កឲ្យមានការធ្លាក់ចុះក្នុងការប្រើប្រាស់ ការវិនិយោគ ផលិតកម្ម និងលំហូរពាណិជ្ជកម្ម ដែលឈានដល់ការដាំក្បាលចុះខ្លាំងបំផុត ចាប់តាំងពីវិបត្តិហិរញ្ញវត្ថុអាស៊ី»។
សូមបញ្ជាក់ដែរថា កាលពីសប្តាហ៍មុន ធនាគារពិភពលោក ក៏បានបញ្ចេញរបាយការណ៍មួយ ដោយអះអាងថា ប្រទេសកំពុងអភិវឌ្ឍ និងសហគមន៍អន្តរជាតិ អាចចាត់វិធានការចាំបាច់ដើម្បីពន្លឿនការស្រោចស្រង់សេដ្ឋកិច្ចពួកគេ ក្រោយវិបត្តិសុខាភិបាលដ៏អាក្រក់បំផុតនេះឆ្លងផុត ហើយនេះគឺដើម្បីបន្ថយផលប៉ះពាល់រយៈពេលវែង។
ត្រង់ចំណុចនេះ ប្រធានធនាគារពិភពលោក លោក David Malpass លើកឡើងដូច្នេះថា៖«ជម្រើសគោលនយោបាយនាពេលបច្ចុប្បន្ន រួមមាន តម្លាភាពផ្នែកបំណុលច្រើនជាងមុនដើម្បីទាក់ទាញវិនិយោគថ្មី ពន្លឿនទំនើបកម្មផ្នែកការតភ្ជាប់ឌីចីថល និងពង្រីកកម្មវិធីគាំទ្រហិរញ្ញវត្ថុសម្រាប់ប្រជាជនក្រីក្រ នឹងជួយកម្រិតការបំផ្លិចបំផ្លាញ និងកសាងការស្រោចស្រង់សេដ្ឋកិច្ចខ្លាំងជាងមុន»៕
Tag:
ធនាគារពិភពលោក
COVID-19
សេដ្ឋកិច្ច
© រក្សាសិទ្ធិដោយ thmeythmey.com
