ជាតិ
សង្គមជាតិ
បុរសកូឡុំប៊ីពីរនាក់ ត្រូវជាប់ទោសមួយជីវិតនៅកម្ពុជា ពីបទនាំចូលសារធាតុញៀន២០គីឡូក្រាម
× បុរសជនជាតិកូឡុំប៊ីពីរនាក់ ឈ្មោះ Quevedo Pinzonfelix Rodrigo អាយុ ៥៤ឆ្នាំ និងឈ្មោះ Giraldo Marulandajuan Carlos អាយុ ៤៧ ត្រូវបានតុលាការកម្ពុជា ផ្តន្ទាទោសឲ្យជាប់ពន្ធនាគារមួយជីវិត ក្រោយរកឃើញថា ពួកគេ នាំចូលសារធាតុញៀនកូកាអ៊ីន (Cocaine) ២0គីឡូក្រាម ពីប្រទសប្រេស៊ីល។ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសបុរសជនជាតិកូឡុំប៊ីទាំងពីរ កាលពីថ្ងៃទី៥ ខែមិថុនា ឆ្នាំ២០២០។
កាសែតខ្មែរថាមស៍ បានស្រង់សម្តីរបស់លោក សេង លាង ចៅក្រមជំនុំជម្រះថា ក្រៅពីផ្តន្ទាទោសឲ្យជាប់ពន្ធនាគារមួយជីវិត ពួកគេ ក៏ត្រូវបង់ថវិកា១ម៉ឺនដុល្លារក្នុងម្នាក់ៗ ចូលទៅរដ្ឋផងដែរ។
បុរសជនជាតិកូឡុំប៊ីទាំងពីរនោះ ត្រូវបានឃាត់ខ្លួន ពាក់ព័ន្ធនឹងការនាំសារធាតុញៀន ពីប្រទេសប្រេស៊ីល ចូលមកកម្ពុជា តាំងពីចុងឆ្នាំ២០១៧មក។
លោក អ៊ី រិន្ទ ប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ ប្រាប់ឲ្យសារព័ត៌មានថ្មីៗ ទៅសាលាដំបូងរាជធានីភ្នំពេញផ្ទាល់ ហើយលោក នឹងឲ្យមន្ត្រីរបស់លោក ផ្តល់ព័ត៌មានអំពីសំណុំរឿងរបស់បុរសជនជាតិកូឡុំប៊ីទាំងពីរនាក់នោះ។ ចំណែក លោក សួស វិទ្យារ៉ាឌី ជាអនុប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ មិនទាន់ហ៊ានផ្តល់ព័ត៌មានឡើយ ដោយលោក សុំទៅសួរព័ត៌មាននេះ ពីចៅក្រមនិងពិនិត្យមើលជាមុនសិន៕
Tag:
បុរសកូឡុំប៊ី
ទោសមួយជីវិត
គ្រឿងញៀន
© រក្សាសិទ្ធិដោយ thmeythmey.com