ជាតិ
សិល្បះ
«កណ្តៀវអូន...» ពាក្យគន្លាស់ក្នុងបទចម្រៀង ដែលបង្កប់ន័យអាសគ្រាម...
× បើតាមវចនានុក្រមសម្តេចសង្ឃរាជ ជួន ណាត ចាស់ទុំហាមថា កុំនិយាយគន្លាស់លើពាក្យពុំសមគួរ ឬ លើពាក្យអាសគ្រាម ព្រោះនាំឲ្យគេរង្កៀល ឲ្យគេរិះគន់និន្ទាថាព្រហើន។ នៅសម័យហ្វេសប៊ុកនេះ Like, Share, Comment, View បានក្លាយជាគោលដៅចម្បងដែលធ្វើឲ្យអ្នកប្រកបអាជីវកម្មលើសិល្បៈមួយចំនួនមិនខ្វល់ពីការរិះគន់ ជេរប្រទេចនោះឡើយ។
កាលពីថ្ងៃទី៨ ខែមិថុនា គណនី Youtube បានបង្ហោះបទចម្រៀងចង្វាក់កន្ទ្រឹមដែលមានចំណងជើងថា «កណ្តៀវអូន...» [យើងខ្ញុំសូមមិនសរសេរឃ្លាទាំងស្រុង]។ បើគន្លាស់ចំណងជើង និងពាក្យពេចន៍មួយចំនួនក្នុងបទចម្រៀងនោះ អត្ថបទពោរពេញទៅដោយពាក្យអាសគ្រាស ជាពិសេសស្ត្រីភេទ និងក្មេងៗ។
អូខេ! ក្នុងសម័យដ៏ទំនើបនេះ សង្គមគួរតែបើកទូលាយចំពោះការនិយាយស្តី គារតែងនិពន្ធ ប៉ុន្តែយើងមិនអាចកាត់ផ្តាច់ពីសីលធម៌នោះឡើយ។ បើពិនិត្យមើល «គុណសព្ទ» ដែលប្រើជាមួយពាក្យ «កណ្តៀវ» វាមិនមានលក្ខណៈស៊ីគ្នាបន្តិចណាសោះ។
ក្រោយការបង្ហោះជាង២៤ម៉ោង អ្នកប្រើប្រាស់បណ្តាញ Youtube សុទ្ធតែបញ្ចេញមតិទាំងខឹងសម្បារចំពោះការប្រើប្រាស់ពាក្យពេចន៍ក្នុងបទចម្រៀង ដោយពួកគេស្នើឲ្យលុបចេញវិញ និងបង្ហាញការសោកស្តាយចំពោះវប្បធម៌ជាតិ។
កន្លងមក ក្រសួងវប្បធម៌ និងវិចិត្រសិល្បៈ ក៏ដូចជាក្រសួងព័ត៌មាន បានចេញចំណាត់ការលើបទចម្រៀងជាច្រើនបទហើយ ដែលអត្ថន័យក្នុងបទទាំងនោះពិបាកទទួលយកបាន ប៉ុន្តែករណីដដែលៗនៅតែកើតមានឡើង៕
© រក្សាសិទ្ធិដោយ thmeythmey.com