COVID-19
អន្តរជាតិ
ចិនប្រាប់និស្សិតខ្លួនឲ្យគិតឡើងវិញមុនទៅរៀននៅអូស្ត្រាលី ក្រោយផ្ទុះការរើសអើងអំឡុង COVID-19
×![]()
រដ្ឋាភិបាលចិន នៅថ្ងៃទី៩ ខែមិថុនា បានទទូចឲ្យនិស្សិតដែលប៉ងសិក្សានៅបរទេសគិតដោយប្រុងប្រយ័ត្នមុនពេលជ្រើសរើសប្រទេសអូស្ត្រាលី។ ការព្រមានបែបនេះ ធ្វើឡើងក្រោយកើតហេតុការណ៍ជាច្រើនករណីពាក់ព័ន្ធការរើសអើងជនជាតិអាស៊ីអំឡុងពេលជំងឺរាតត្បាត COVID-19 ។
ក្នុងសេចក្តីថ្លែងការណ៍ ក្រសួងអប់រំចិន បានក្រើនរំឮកនិស្សិតនៅបរទេសឲ្យរៀបចំការវាយតម្លៃហានិភ័យឲ្យបានល្អ និងប្រុងប្រយ័ត្នចំពោះការជ្រើសរើសទៅសិក្សាក្នុងប្រទេសអូស្ត្រាលី ឬត្រលប់ទៅសិក្សាក្នុងប្រទេសនេះវិញ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
ការព្រមានរបស់ក្រសួងអប់រំចិន ធ្វើឡើងប៉ុន្មានថ្ងៃប៉ុណ្ណោះក្រោយក្រសួងទេសចរណ៍និងវប្បធម៌ចិន បានផ្ដល់យោបល់ឲ្យពលរដ្ឋខ្លួនកុំធ្វើដំណើរទៅកាន់ប្រទេសអូស្ត្រាលី ព្រោះករណីហិង្សានិងការរើសអើងពូជសាសន៍ដែលកើតចេញពីការរាលដាល COVID-19 កំពុងកើតមាន។ ជំងឺរាតត្បាតនេះ បានផ្ទុះឡើងដំបូងក្នុងប្រទេសចិនកាលពីចុងឆ្នាំ២០១៩។
ក្នុងបទសម្ភាសជាមួយវិទ្យុជាតិ ABC របស់អូស្ត្រាលី នៅថ្ងៃទី៨ ខែមិថុនា រដ្ឋមន្ត្រីពាណិជ្ជកម្មអូស្ត្រាលី លោក Simon Birmingham លើកឡើងថា វាមានឧបទ្ទវហេតុរើសអើងពូជសាសន៍កើតឡើងក្នុងប្រទេស។ ក៏ប៉ុន្តែលោកអះអាងថា លោកយល់ឃើញថា គំនិតដែលថា អូស្ត្រាលី ក្នុងឥរិយាបថនេះ ជាប្រទេសមិនមានសុវត្ថិភាពសម្រាប់ភ្ញៀវទេសចរមកលេងកម្សាន្ត គឺជារឿងមួយដែលគ្មានការត្រួតពិនិត្យច្បាស់លាស់ឡើយ។
កាសែត The Sydney Morning Herald បានចុះផ្សាយនៅថ្ងៃទី៧ ខែមិថុនាពីការស្ទង់មតិមួយដែលរៀបចំឡើងដោយស្ថាប័នស្រាវជ្រាវមួយឈ្មោះ Per Capita ដោយរកឃើញថា អូស្ត្រាលីមានករណីរើសអើងពូជសាសន៍រហូត ៣៨៦ករណី រួមមានការវាយដំរាយកាយ ប្រមាថ និងស្តោះទឹកមាត់ដាក់ជាដើម។ តួលេខនេះ គឺរាប់ចាប់ពីថ្ងៃទី២ ខែមេសា ឆ្នាំ២០២០មក។
ទំនាក់ទំនងរវាងអូស្ត្រាលី និងចិនបានក្លាយជាល្អក់កករបន្ទាប់ពីផ្ទុះការរាលដាល COVID-19 ខណៈរដ្ឋាភិបាលអូស្ត្រាលីបានស្នើឲ្យមានការស៊ើបអង្កេតជាលក្ខណៈអន្តរជាតិដើម្បីកំណត់ប្រភពជំងឺនេះ និងរបៀបដែលវារាលដាលជុំវិញពិភពលោក។ ឆ្លើយតបរឿងនេះ ចិនបានដំឡើងពន្ធលើទំនិញនាំចូលពីប្រទេសអូស្ត្រាលី និងរារាំងការនាំចូលសាច់គោកពីប្រភពក្រុមហ៊ុនអូស្ដ្រាលីមួយចំនួនផងដែរ៕
Tag:
ចិន
អូស្ត្រាលី
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
