ជាតិ
សង្គមជាតិ
រដ្ឋមន្ត្រីអប់រំ សម្រេចឲ្យគ្រឹះស្ថានឧត្តមសិក្សាប្រឡងបញ្ចប់ការសិក្សា លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា រូបភាពពីក្រសួងអប់រំ យុវជន និងកីឡា
× ភ្នំពេញ៖ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា កាលពីថ្ងៃទី៨ ខែមិថុនា បានសម្រេចឲ្យគ្រប់គ្រឹះស្ថានឧត្តមសិក្សានានា រៀបចំប្រឡងបញ្ចប់ការសិក្សា ។ ចំណែកនិស្សិតដែលត្រូវចូលរៀននៅឆ្នាំនេះវិញ គឺតម្រូវរៀនតាមអនឡាញ ដើម្បីទប់ស្កាត់កុំឲ្យឆ្លងនូវជំងឺកូវីដ-១៩ រាលដាលចូលសហគមន៍។
លោក ហង់ ជួន ណារ៉ុន បញ្ជាក់ថា គ្រប់គ្រឹះស្ថានឧត្តមសិក្សាទាំងអស់ ត្រូវរៀបចំឯកសារស្នើសុំមកក្រសួងអប់រំ ដើម្បីងាយស្រួលរៀបចំឧទ្ទេសនាមគណៈកម្មការចុះត្រួតពិនិត្យដំណើរការប្រឡង។
ដោយឡែកការពន្យារពេលចូលរៀននៅតែមានសុពលភាព។ លោក រដ្ឋមន្ត្រីក្រសួងអប់រំ បានណែនាំឲ្យគ្រប់គ្រឹះស្ថានឧត្តមសិក្សារៀបចំការបណ្តុះបណ្តាលនិស្សិតតាមប្រព័ន្ធអេឡិចត្រូនិក ដោយឲ្យគ្រូ និងសិស្សត្រូវមានទំនាក់ទំនងគ្នា ហើយគ្រឹះស្ថានឧត្តមសិក្សាត្រូវរៀបចំរចនាសម្ព័ន្ធគ្រប់គ្រងឲ្យបានច្បាស់លាស់ ដើម្បីធានាឲ្យការបង្រៀន និងការរៀនប្រកបដោយគុណភាព និងនិរន្តរភាព។
ចំណែកសិស្សានុសិស្សដែលរៀននៅតាមសាលាឯកជន ហើយត្រៀមនឹងប្រឡងឌីប្លូម និងបាក់ឌុបនៅឆ្នាំនេះ ក៏ត្រូវប្រឡងពីចម្ងាយ ឬប្រឡងតាមអេឡិចត្រូនិក ទៅតាមការកំណត់បរិច្ឆេទប្រឡងរបស់សាលាឯកជននានាផងដែរ។ ក្រសួងនឹងសហការជាមួយនឹងគ្រឹះស្ថានសិក្សាឯកជនក្នុងការរៀបចំដំណើរការប្រឡងនេះ ដើម្បីឲ្យការប្រឡងប្រព្រឹត្តទៅដោយគុណភាព និងតម្លាភាព។ ចំពោះសិស្សានុសិស្សនៅតាមសាលារដ្ឋវិញ ក្រសួងពន្យារពេលប្រឡងសិន និងកំណត់ថ្ងៃប្រឡងនៅពេលក្រោយ។ នេះបើតាមលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានបញ្ជាក់នៅក្នុងសេចក្តីប្រកាសព័ត៌មាននាថ្ងៃទី១៣ ខែមេសាឆ្នាំ២០២០៕
Tag:
ក្រសួងអប់រំ
គ្រឹះស្ថានឧត្តមសិក្សា
និស្សិត
អប់រំ
© រក្សាសិទ្ធិដោយ thmeythmey.com