COVID-19
អន្តរជាតិ
អង្គការសុខភាពពិភពលោក។រូបភាពAFP
×![]()
អង្គការសុខភាពពិភពលោក(WHO) បានផ្តល់អនុសាសន៍ឲ្យរដ្ឋាភិបាលប៉ាគីស្ថានបិទប្រទេសឡើងវិញ នៅតំបន់មួយចំនួន។ អង្គការនេះលើកហេតុផលថា ប៉ាគីស្ថានមិនទាន់បំពេញលក្ខខណ្ឌគ្រប់គ្រាន់ក្នុងការបន្ធូរបន្ថយការរឹតត្បិតប្រទេសឡើយ។ នេះបើតាមទីភ្នាក់ងារព័ត៌មាន Reuters។
ការផ្តល់អនុសាសន៍របស់ WHO នេះធ្វើឡើងបន្ទាប់ពីចំនួនឆ្លងថ្មីនៅប៉ាគីស្ថានមានការកើនឡើងយ៉ាងគំហុក បន្ទាប់ពីប្រទេសនេះបន្ទូរបន្ថយការបិទប្រទេសនៅថ្ងៃទី៩ ខែឧសភា ក្រោមហេតុផលសេដ្ឋកិច្ច។ តាំងពីមានការផ្ទុះឆ្លងមក ប៉ាគីស្ថានមានករណីឆ្លងចំនួន ១១៣,៧០២ករណី និងស្លាប់ចំនួន២,២៥៥នាក់។ ដោយកាលពីថ្ងៃ៨ ខែមិថុនា មានចំនួនអ្នកស្លាប់ក្នុងមួយថ្ងៃដល់ទៅ ១០៥នាក់។
ក្នុងលិខិតរបស់ WHO ដែលផ្ញើ ទៅកាន់អាជ្ញាធរខេត្ត Punjab និង Sindh ដែលជាខេត្តមានប្រជាជនច្រើនជាងគេ WHO បានសង្កត់ធ្ងន់ពីភាពចំបាច់ក្នុងការកាត់បន្ថយការចុះខ្សោយនៃប្រព័ន្ធសុខាភិបាល។ យោងតាមស្ថិតិរបស់រដ្ឋាភិបាលប៉ាគីស្ថាន ក្រោយពេលដែលគេបើកប្រទេសឡើងវិញ ចំនួនអ្នកធ្វើតេស្តវិជ្ជមានផ្ទុក COVID-19 មានច្រើនជាងម្នាក់ក្នុងចំណោម៥នាក់ ខណៈអំឡុងពេលបិទប្រទេស អ្នកធ្វើតេស្តវិជ្ជមាន COVID-19 មានត្រឹមតែម្នាក់ក្នុងចំណោម១០នាក់ប៉ុណ្ណោះ។
លោកវេជ្ជបណ្ឌិត Palitha Mahipala ប្រធាន WHO ប្រចាំប៉ាគីស្ថានដែលជាអ្នកចេញលិខិតនេះបានលើកឡើងថា WHO ផ្តល់អនុសាសន៍ឲ្យរដ្ឋាភិបាលអនុវត្តយុទ្ធសាស្ត្របិទ និងបើកប្រទេសរយៈពេល២សប្តាហ៍ម្តង។ អាជ្ញាធរខេត្ត Punjab និង Sindh បានទទួលយកស្គាល់ពីសេចក្តីបារម្ភរបស់ WHO ហើយថារដ្ឋបាលខេត្តនិងពិភាក្សាទៅលើអនុសាសន៍ទាំងនោះ។
លិខិតរបស់ WHO ក៏បានបញ្ជាក់ផងដែរនូវលក្ខខណ្ឌចំនួន៦ ក្នុងការបន្ធូរបន្ថយការបិទប្រទេសដែលក្នុងនោះរួមមាន ការគ្រប់គ្រងការឆ្លងជំងឺ ការអាចស្វែងរកជំងឺ ការដាក់នៅដាច់តែឯង ព្យាបាល និងតាមរកអ្នកដែលប៉ះពាល់ ទីកន្លែងសំខាន់ៗមានវិធានការការពារ និងការអប់រំក្នុងសហគមន៍ ដោយចូលរួម និងជំរុញឲ្យរស់នៅក្នុងភាពធម្មតាបែបថ្មី។ ចំពោះប៉ាគីស្ថាន ប្រទេសនេះមិនទាន់អាចបំពេញលក្ខខណ្ឌសូម្បីតែមួយ។
លិខិតនេះក៏ បញ្ជាក់ផងដែរថា វាជាការសំខាន់ណាស់ដែលប្រទេសនេះមានសមត្ថភាពក្នុងការធ្វើចាប់ពី៥ម៉ឺនតេស្តក្នុងមួយថ្ងៃ ប៉ុន្តែពេលនេះប៉ាគីស្ថានមានសមត្ថភាពធ្វើត្រឹមតែ២ម៉ឺន៤ពាន់តេស្តប៉ុណ្ណោះ៕
Tag:
ប៉ាគីស្ថាន
COVID-19
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
