COVID-19
កីឡាអន្តរជាតិ
អន្តរជាតិ
មុនវិបត្តិ COVID-19 ក្លិបនៅ Premier League ខាត៧៦៦លានដុល្លាររួចហើយ
× ក្លិបនានានៅក្របខណ្ឌ Premier League បានខាតបង់រួមគ្នាចំនួន ៦០០ លានផោន (៧៦៦លានដុល្លារអាមេរិក) ក្នុងរដូវកាល ២០១៨-១៩ រួចទៅហើយ មុនពេលរងវិបត្តិផ្នែកហិរញ្ញវត្ថុដោយសារជំងឺ COVID-19 ទៅទៀត។ នេះបើយោងតាមរបាយការណ៍ពីក្រុមអ្នកវិភាគហិរញ្ញវត្ថុបាល់ទាត់មួយដែលបានផ្សាយនៅថ្ងៃទី៩ ខែមិថុនា។
ការវិភាគពីអ្នកជំនាញខាងហិរញ្ញវត្ថុកីឡាបាល់ទាត់ Vysyble បង្ហាញថាក្លិបទាំង ២០ ដែលស្ថិតក្នុងក្របខណ្ឌលីគកំពូលអង់គ្លេសបានប្រកាសពីការខាតបង់ដ៏ធំធេង បើទោះបីទទួលបានប្រាក់ចំណូលជាកំណត់ត្រាប្រចាំឆ្នាំចំនួន ៥,១៥ ពាន់លានផោន (៦,៦ ពាន់លានដុល្លារ) ក៏ដោយ។
ដោយសារហេតុផលខាងលើ ត្រូវបានគេមើលឃើញថាផលប៉ះពាល់ផ្នែកហិរញ្ញវត្ថុដែលបង្កដោយ COVID-19 នឹងជះឥទ្ធិពលយ៉ាងខ្លាំងដល់លីគកីឡាបាល់ទាត់ដ៏ល្បីល្បាញនៅអឺរ៉ុបមួយនេះ បើទោះជាផែនការបញ្ចប់រដូវកាលក្រោមលក្ខខណ្ឌប្រកួតបិទទ្វារកីឡដ្ឋានដំណើរការបានរលូនក៏ដោយចុះ។
ក្លិបនៅ Premier League ប្រឈមនឹងការចំណាយប្រាក់ ៣៣០លានផោន (៤២២លានដុល្លារ) ដើម្បីសងត្រឡប់ទៅកាន់ក្រុមហ៊ុនផ្សាយវិញ ខណៈការប្រកួតមិនអាចបញ្ចប់តាមកាលវិភាគ។ លើសពីនេះ បើតាមការប៉ាន់ស្មាន ទឹកប្រាក់ចំនួន ១២៦ លានផោន (១៦១លានដុល្លារ) ក៏អាចត្រូវបាត់បង់ផងដែរសម្រាប់ប្រាក់ចំណូលដែលទទួលបានពីអំឡុងការប្រកួត ដែលមានអ្នកចូលទស្សនានោះ។
លោក Roger Bell ប្រធាន Vysyble លើកឡើងជុំវិញការខាតបង់ប្រាក់ក្នុងអំឡុងពេលមានជំងឺរាតត្បាតសកលថា៖ «ជំងឺ COVID-19 មិនមែនជាមូលហេតុបង្កឲ្យមានគ្រោះថ្នាក់ផ្នែកហិរញ្ញវត្ថុនោះទេ។ COVID-19 គ្រាន់តែជាការបង្កើនល្បឿនទៅលើបញ្ហាហិរញ្ញវត្ថុរបស់ក្លិបឲ្យមានរយៈពេលកាន់តែវែង»។ លោក Bell បន្ថែមថា តួលេខនៅរដូវកាល ២០១៨-១៩ គឺជាលទ្ធផលហិរញ្ញវត្ថុគួរឲ្យព្រួយបារម្ភយ៉ាងខ្លាំង និងជារោគសញ្ញានៃបញ្ហាដែលឈានកាន់តែស៊ីជម្រៅ។
ដោយឡែក ថ្លៃឈ្នួលសម្រាប់កីឡាករដែលប្រកបអាជីពក្នុងក្លិបនៅ Premier League បានកើនឡើងដល់ ៣,១២ ពាន់លានផោន (ជិត៤ពាន់លានដុល្លារ) ឯណោះ។
ក្លិប Everton បានប្រកាសពីការខាតបង់គួរឲ្យព្រួយបារម្ភចំនួន ១១១លានផោន (១៤១លានដុល្លារ) ស្របពេលដែលបរាជ័យរបស់ Chelsea ក្នុងការបង្ហាញខ្លួនក្នុងក្របខណ្ឌ Champions League បានធ្វើឲ្យពួកគេខាតចំណូលអស់៩៦ លានផោន (១២៣លានដុល្លារ)៕
Tag:
Premier League
COVID-19
Vysyble
© រក្សាសិទ្ធិដោយ thmeythmey.com