នៅខេត្តព្រះវិហារ មានត្មាតត្នោត២២ក្បាល ត្មាតផេះ៩ក្បាល និងត្មាតភ្លើង៣ក្បាល

ជាតិ

សង្គមជាតិ

២៥ខេត្ត/រាជធានី

នៅខេត្តព្រះវិហារ មានត្មាតត្នោត២២ក្បាល ត្មាតផេះ៩ក្បាល និងត្មាតភ្លើង៣ក្បាល

11, Jun 2020 , 1:56 pm

រូបភាព

ដោយ: អ៊ូ សុខមាន (OU Sokmean)

បច្ចុប្បន្ន សត្វ«ត្មាត»ដែលរស់នៅក្នុងទឹកដីខេត្តព្រះវិហារ នៅសល់ត្រឹម៣៤ក្បាលប៉ុណ្ណោះ ក្នុងនោះសត្វត្មាតផេះមាន ៩ក្បាល, ត្មាតភ្លើង មាន៣ក្បាល និងត្មាតត្នោតមាន២២ក្បាល។ នេះបើយោងតាមទិន្ននៃការធ្វើជំរឿនសត្វត្មាតប្រចាំឆ្នាំ២០២០ នៅសហគមន៍ដងផ្លិត-អាហារដ្ឋានត្មាតនៃដែនជម្រកសត្វព្រៃឆែប ក្នុងស្រុកឆែប ខេត្តព្រះវិហារ របស់អង្គការសមាគមអភិរក្សសត្វព្រៃប្រចាំកម្ពុជា (WCS) និងក្រសួងបរិស្ថាន។ ចំនួនសត្វត្មាតដែលនៅសេសសល់ក្នុងតំបន់នេះ គឺបានបាត់បង់អស់១០ក្បាល បើនឹងឆ្នាំ២០១៩ មានចំនួន៤៤ក្បាល។

ការចូលរួមធ្វើជំរឿនសត្វត្មាត ជាមួយអង្គការ WCS នៅខេត្តព្រះវិហារ កាលពីថ្ងៃទី១០មិថុនា ឆ្នាំ២០២០ តាម លោក នេត្រ ភក្ត្រា រដ្ឋលេខាធិការក្រសួងបរិស្ថាន បានលើកឡើងថា មូលហេតុដែលធ្វើឱ្យសត្វត្មាតបាត់បង់នោះ គឺដោយសារតែមានការបំពុលពីមនុស្ស ការបាត់បង់ជម្រក និងការខ្វះអាហារសម្រាប់សត្វត្មាតនៅក្នុងព្រៃតាមរយៈមនុស្សបរបាញ់សត្វ ឬដាក់អន្ទាក់ជាដើម។

លោក នេត្រ ភក្ត្រា រដ្ឋលេខាធិការក្រសួងបរិស្ថាន កំពុងផ្ដល់បទសម្ភាសឱ្យក្រុមអ្នកសារព័ត៌មានដែនជម្រកសត្វព្រៃឆែប ក្នុងស្រុកឆែប ខេត្តព្រះវិហារ កាលពីថ្ងៃទី ១០ មិថុនា ឆ្នាំ២០២០

វត្តមានសត្វត្មាតនៅកម្ពុជាគឺជាប្រភេទសត្វកម្រនិងជិតផុតពូជនៅលើពិភពលោក ហើយដើម្បីអភិរក្សសត្វដែលជិតផុតពូជនេះ តាមរយៈគម្រោងសហប្រត្តបត្តិការជាមួយអង្គការWCS ដែលមានការគាំទ្រថវិកាពីគម្រោងព្រៃឡង់បៃតងនោះ ក្រសួងបរិស្ថានបានអនុវត្តសកម្មភាពការពារសត្វត្មាតនៅតាមតំបន់ការពារធម្មជាតិនានាក្នុងទឹកដីកម្ពុជា ដោយមានការផ្តល់ចំណីបន្ថែម(សាកសព្វគោយ៉ាង២ក្បាលក្នុងមួយខែ ទៅតាមអាហារសត្វត្មាតនីមួយៗ) ការការពារសំបុកពងកូន និងបង្កើនការយល់ដឹងឱ្យកាន់តស៊ីជម្រៅ ដល់ប្រជាសហគមន៍នៅតាមតំបន់នីមួយៗ។ នេះជាការលើកឡើងរបស់លោក នេត្រ ភក្ត្រា ដោយបានបញ្ជាក់ ថា ថ្វីដ្បិតសត្វត្មាតនៅក្នុងខេត្តព្រះវិហារនេះធ្លាក់ចុះ ប៉ុន្តែមិនទាន់កំណត់បាននៅឡើយថាចំនួន សត្វត្មាតនៅកម្ពុជាទាំងមូល មានការធ្លាក់ចុះ ឬកើនឡើង ដោយរងចាំលទ្ធជំរឿនសត្វត្មាតនៅកម្ពុជា ៤ទីតាំងក្នុងខេត្តផ្សេងទៀតសិន។

សត្វត្មាតកំពុងស៊ីសាកសពគោនៅអាហារដ្ឋានត្មាតនៃដែនជម្រកសត្វព្រៃឆែបក្នុងស្រុកឆែប ខេត្តព្រះវិហារ នាព្រឹកថ្ងៃទី ១០ មិថុនា ឆ្នាំ២០២០

សត្វត្មាតដែលមានវត្តមាននៅ៤ទីតាំងទៀតនោះ មាននៅដែនជម្រកសត្វព្រៃសៀមប៉ាងក្នុង នៅអាហារដ្ឋានត្មាតចំណុចវាលបឹងទាល់ និងនៅស្រែអង្ក្រងក្នុងតំបន់សេសាន ខេត្តស្ទឹងត្រែង, មាននៅដែនជម្រកសត្វព្រៃស្រែពក ក្នុងខេត្តមណ្ឌលគិរី និងដែនជម្រកសត្វព្រៃលំផាត់នៅក្នុងភូមិសាស្ត្រ ខេត្តរតនគិរី។

លោក នេត្រ ភក្រា្ត បានបញ្ជាក់ថា ការជំរឿនសត្វត្មាតប្រចាំឆ្នាំ២០១៩ នៅទូទាំងប្រទេសកម្ពុជា គឺមានសរុប១៣៧ក្បាល ហើយខេត្តដែលមានសត្វត្មាតរស់នៅច្រើនជាងគេ គឺខេត្តស្ទឹងត្រែង និងខេត្តព្រះវិហារ៕