COVID-19
ជាតិ
កម្ពុជា-ឥណ្ឌា សហការគ្នា បញ្ជូនពលរដ្ឋវិលត្រឡប់រៀងខ្លួន សម្ដេចនាយករដ្ឋមន្រ្តី ហ៊ុន សែន និង នាយករដ្ឋមន្រ្តីឥណ្ឌា លោក ណារិន្រ្ទា ម៉ូឌី (រូបពីទំព័រហ្វេសប៊ុករបស់សម្ដេចហ៊ុន សែន)
× យន្តហោះមួយគ្រឿង នឹងដឹកពលរដ្ឋនិងសិស្សខ្មែរ៦០នាក់ ពីឥណ្ឌា មកកម្ពុជាវិញ នៅថ្ងៃទី១២ ខែមិថុនាស្អែក ហើយពលរដ្ឋឥណ្ឌា២៨០នាក់ នឹងបានត្រឡប់ទៅស្រុកកំណើតវិញ តាមជើងហោះហើរពីរលើក គឺនៅព្រឹកថ្ងៃទី១១ ខែមិថុនានេះ និងនៅថ្ងៃទី១៩ ខែមិថុនា។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ស្តីពីលទ្ធផលនៃកិច្ចសន្ទនារវាងសម្តេចនាយករដ្ឋមន្ត្រី ហ៊ុន សែន និង លោក ណារិនដ្រា ម៉ូឌី នាយករដ្ឋមន្ត្រីឥណ្ឌា តាមទូរស័ព្ទ កាលពីថ្ងៃទី១០ ខែមិថុនា។
សេចក្តីប្រកាសព័ត៌មាន ដែលចេញផ្សាយនៅថ្ងៃទី១១ ខែមិថុនានេះ បានឲ្យដឹងថា កិច្ចសន្ទនារវាងនាយករដ្ឋមន្ត្រីនៃប្រទេសពីរ គឺផ្តោតលើការរួមគ្នាប្រយុទ្ធប្រឆាំងនឹងជំងឹកូវីដ-១៩ រួមទាំងទំនាក់ទំនងទ្វេភាគីនិងក្នុងតំបន់។ មេដឹកនាំទាំងពីរ បានអរគុណគ្នាទៅវិញទៅមក ចំពោះការយកចិត្តទុកដាក់និងការសម្របសម្រួលដល់ពលរដ្ឋនៃប្រទេសទាំងពីរ ដែលជាប់នៅប្រទេសផ្សេង ឲ្យបានវិលត្រឡប់ទៅស្រុកកំណើតវិញ។
ជាមួយគ្នានេះ ថ្នាក់ដឹកនាំទាំងពីរ បានឯកភាពថា ដើម្បីស្តារស្ថានភាពសេដ្ឋកិច្ចសង្គម នៅក្រោយចប់វិបត្តិជំងឺកូវីដ-១៩ គឺទាមទារឲ្យមានកិច្ចសហប្រតិបត្តិការនិងការសម្របសម្រួលជាអន្តរជាតិ កាន់តែខ្លាំងជាងមុន។
មកដល់ថ្ងៃទី១១ ខែមិថុនា ឆ្នាំ២០២០ កម្ពុជា មានអ្នកឆ្លងជំងឺកូវីដ-១៩ ១២៦នាក់ ជាសះស្បើយ១២៥នាក់ ដោយមិនមានអ្នកស្លាប់ ចំណែកឥណ្ឌា មានអ្នកឆ្លងជាង២៨ម៉ឺនាក់ ជាសះស្បើយជាង១៤ម៉ឺននាក់ ស្លាប់ជាង៨ពាន់នាក់។
ក្នុងកិច្ចសន្ទនាតាមទូរស័ព្ទ សម្តេចនាយករដ្ឋមន្ត្រី បានចូលរួមរំលែកទុក្ខជាមួយនាយករដ្ឋមន្ត្រីឥណ្ឌា ចំពោះអ្នកបាត់បង់ជីវិត ដោយសារជំងឺកូវីដ-១៩៕
Tag:
កម្ពុជា-ឥណ្ឌា
COVID-19
© រក្សាសិទ្ធិដោយ thmeythmey.com