ភ្នំពេញ៖ ក្រសួងមហាផ្ទៃ បានផ្ដល់ព័ត៌មានបឋមថា គ្មានឈ្មោះ Wanchalearm Satsaksit រស់នៅកម្ពុជាទេ។ សមត្ថកិច្ច បានស្រាវជ្រាវស្វែងរកលោក Wanchalearm Satsaksit សកម្មជននយោបាយថៃម្នាក់ ដែលប្រឆាំងរបបដឹកនាំរបស់លោក ប្រាយុទ្ធ ចាន់អូចារ នាយករដ្ឋមន្ត្រីថៃ ក្រោយមានដំណឹងថា មានករណីចាប់ជំរិតសកម្មជនរូបនេះនៅកម្ពុជា។
លោក ខៀវ សុភ័គ អ្នកនាំពាក្យក្រសួងមហាផ្ទៃរូបនេះ បានបញ្ជាក់ថា មន្ត្រីជំនាញបានចុះស្រាវជ្រាវករណីបាត់ខ្លួនសកម្មជនថៃ លោក Wanchalearm Satsaksit ហើយ ប៉ុន្តែគ្មានព័ត៌មានអ្វីពីបុគ្គលរូបនេះឡើយ។
ថ្លែងប្រាប់សារព័ត៌មានថ្មីៗ អ្នកនាំពាក្យក្រសួងមហាផ្ទៃរូបនេះ បានបញ្ជាក់ថា៖«យើងបានចុះទៅខាងសណ្ឋាគារហ្នឹង ដែលថាគាត់ (លោក Wanchalearm)ស្នាក់នៅហ្នឹង គឺដូចជាគ្មានឈ្មោះ(Wanchalearm)ហ្នឹង ស្នាក់នៅទេ។ ក្រុមជំនាញបានធ្វើការស៊ើបអង្កេតនៅកន្លែងហ្នឹងហើយ គ្មានឈ្មោះហ្នឹង រស់នៅកន្លែងហ្នឹងទេ តាំងពីប៉ុន្មានឆ្នាំហើយ គេមិនឃើញទេ។ ហើយមាន(លោក Wanchalearm) ស្នាក់នៅ គឺខាងម្ចាស់ខុនដូត្រូវរាយការណ៍មក(សមត្ថកិច្ច)ហើយ ហើយខាងអ្នកគ្រប់គ្រងទិដ្ឋាការខុសច្បាប់នោះ ក៏គ្មានព័ត៌មានពីគាត់ដែរ»។
ដ្បិតលោក ខៀវ សុភ័គ អះអាងបែបនេះមែន ប៉ុន្តែគេបានឃើញក្រុមប្រដាប់អាវុធមួយក្រុម បានចាប់លោក Wanchalearm បញ្ចូលក្នុងឡានខ្មៅមួយគ្រឿង កាលពីល្ងាចថ្ងៃទី៤ មិថុនា នៅពេលដែលសកម្មជននយោបាយថៃរូបនេះ បានដើរនៅតាមផ្លូវ ដើម្បីទិញម្ហូបនៅពីមុខកន្លែងស្នាក់នៅខ្លួន។ សកម្មភាពចាប់ជំរិតនេះ គឺបានឃើញតាមរយៈកាមេរ៉ាសុវត្ថិភាពមួយ។ នេះបើតាមអង្គការឃ្លាំមើលសិទ្ធិមនុស្ស ដែលទទួលបានព័ត៌មាននេះ។
ប៉ុន្តែលោក ខៀវ សុភ័គ ច្រានចោលរូបភាពតាមកាមេរ៉ាសុវត្ថិភាពនេះ។ «វីដេអូ អ្នកណាក៏អាចធ្វើបានដែរ នៅសម័យនេះ។ វីដេអូ(កាមេរ៉ាសុវត្ថិភាព)មានគ្រប់តែផ្ទះ ផ្ទះពូក៏មាន ផ្ទះក្មួយក៏មាន អ៊ីចឹងគេអាចធ្វើបាន(កាត់ត)បានហ្នឹង ហើយវាមិនដឹងយកអ្វីជាការបាន។ ហើយយើងរីករាយទទួលយកព័ត៌មានទាំងអស់ពីការចាប់ជំរិតជនហ្នឹង»។ នេះជាការបញ្ជាក់របស់លោក ខៀវ សុភ័គ។
សាក្សី៣នាក់ដែលបានឃើញហេតុការណ៍នេះ បានប្រាប់ថា ពួកគេបានឃើញលោក Wanchalearm ដើរចេញពីអគារខុនដូមកទិញស្រាបៀរ បារី និងទឹកដោះគោដាក់ស្បោងផ្លាស្ទិកមុននឹងចូលទៅអង្គុយនៅលើគ្រែតូចមួយក្បែរចិញ្ចើមផ្លូវ។ គ្រានោះលោក Wanchalearm ក៏បន្តទិញប្រហិតដែលគេលក់តាមរទេះទៀត ស្រាប់តែមានរថយន្តពណ៌ខ្មៅមួយគ្រឿងមកដល់ ហើយមានបុរស៣នាក់ស្លៀកពាក់ស៊ីវិល ពាក់ម៉ាសបិទមុខចេញពីរថយន្ត បានវាយត្រង់កញ្ចឹងក ហើយក្រៀកក្បាលពីខាងក្រោយ ដោយព្យាយាមអូសសកម្មជននយោបាយថៃរូបនោះចូលរថយន្ត ដែលមិនមានអ្នកណាចាប់ភ្លឹកមើលចាំផ្លាកលេខនោះទេ។ នេះបើតាមការចុះផ្សាយរបស់VOA។
ប្រភពដែលនៅក្បែរកន្លែងជនជាតិថៃនោះ បានប្រាប់ VOA ទៀតថា កាមេរ៉ាសុវត្ថិភាពនៅសាខាធនាគារកាណាឌីយ៉ានិងស្ថានីយចាក់ប្រេង PTT តាមបណ្តោយផ្លូវជាតិលេខ៦អាចបញ្ជាក់ពីទិសរថយន្តនោះ ធ្វើដំណើរពីកន្លែងកើតហេតុ។ ប្រភពឲ្យដឹងថា រថយន្តរបស់ជនមិនស្គាល់មុខបានដឹកជនជាតិថៃនោះចេញមកផ្លូវជាតិលេខ៦ ប៉ុន្តែពួកគេមិនអាចបញ្ជាក់ថា តើរថយន្តនោះឆ្ពោះទៅភ្នំពេញវិញ ឬក៏ឆ្ពោះទៅខេត្តកំពង់ចាម កំពង់ធំ ឬសៀមរាបនោះទេ។
តែយ៉ាងណាលោក ខៀវ សុភ័គ ស្នើឱ្យអ្នកដែលឃើញព្រឹត្តិការណ៍នោះ សហការជាមួយសមត្ថកិច្ច តាមរយៈការផ្ដល់ព័ត៌មានពីរឿងរ៉ាវកើតហេតុទាំងនោះ ដើម្បីងាយស្រួលក្នុងការកំណត់មុខសញ្ញា។ «យើងបានសាកល្បងស្រាវជ្រាវលើបញ្ហា (ករណីបាត់ខ្លួនលោក Wanchalearm )ហ្នឹង ហើយយើងក៏បានអំពាវនាវអ្នកដែលមានព័ត៌មានហ្នឹង ដែលថាមានការចាប់ជំរិតបែបហ្នឹងមែន សូមឱ្យកុំរួញរា យកមកបង្ហាញសមត្ថកិច្ច ដើម្បីជួយស៊ើបអង្កេត»។ នេះជាការលើកឡើងរបស់អ្នកនាំពាក្យក្រសួងមហាផ្ទៃ។
ពាក់ព័ន្ធករណីនេះ លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ដាក់ជាចម្ងល់វិញថា តើអាជ្ញាធរនឹងបើកការស្រាវជ្រាវលើករណីនេះក្នុងកម្រិតណា ដើម្បីឈានទៅដល់ការកំណត់មុខសញ្ញានោះ។ បើតាមលោក ស៊ឹង សែនករុណា សមត្ថភាពស៊ើបអង្កេតរបស់អាជ្ញាធរកម្ពុជាគឺខ្លាំងណាស់ បើសិនជាបើកការស្រាវជ្រាវលើករណីចាប់ជំរិតសកម្មជនថៃលោក Wanchalearm ដោយភាពគត់មត់។
អ្នកនាំពាក្យសមាគមការពារសិទ្ធិមនុស្សអាដហុករូបនេះ បានបញ្ជាក់ដូច្នេះថា៖«ក្នុងរឿងនេះ បើសិនជាសមត្ថកិច្ចកម្ពុជាយើងអះអាងថា រកអត់ឃើញ តើសមត្ថកិច្ចកម្ពុជាយើងបានធ្វើយ៉ាងម៉េចខ្លះ? បានទៅស្រាវជ្រាវដោយវិធីណាខ្លះ? ដើម្បីបង្ហាញដល់សាធារណជនថា ខ្លួនបានធ្វើការងារហ្នឹង ដោយយកចិត្តទុកដាក់ ហើយបានស្វះស្វែងរកអ្នកបាត់ខ្លួនហ្នឹងទៅតាមតួនាទី និងនីតិវិធីរបស់ខ្លួន ហើយមិនគួរណាឆាប់ឆ្លើយភ្លាមនៅពេលហ្នឹងទេ ព្រោះករណីបាត់ខ្លួនជាធម្មតា ក្នុងប្រទេសណាក៏ពិបាកស្រាវជ្រាវដែរ ដោយត្រូវប្រើពេលវេលា និងរៀបចំតាមនីតិវិធីច្បាប់…។
លោក ស៊ឹង សែនកុរណា ជឿជាក់ថា អាជ្ញាធរនឹងអាចស្វែងរក និងដោះស្រាយករណីបាត់ខ្លួនសកម្មជនថៃនេះបាន បើសិនជាសមត្ថកិច្ចកម្ពុជានិងថៃ ប្រតិបត្តិការរួមគ្នានោះ។
កាលពីដើមសប្ដាហ៍ ស្ដានទូតថៃប្រចាំកម្ពុជា បានផ្ញើកំណត់ទូតមួយមកក្រសួងការបរទេស និងសហប្រតិបត្តិការអន្តរជាតិ ពាក់ព័ន្ធនឹងករណីចាប់ជំរិតលោក Wanchalearm Satsaksit សកម្មជននយោបាយថៃម្នាក់ ដែលប្រឆាំងរបបដឹកនាំរបស់លោក ប្រាយុទ្ធ ចាន់អូចារ នាយករដ្ឋមន្ត្រីថៃ កាលពីថ្ងៃទី៤ មិថុនាកន្លងមកនេះ។ កំណត់ទូតថៃ គឺសុំឱ្យភាគីកម្ពុជា ពិនិត្យ និងផ្ទៀងផ្ទាត់មើលករណីចាប់ជំរិតសកម្មជនថៃនេះ ដើម្បីចង់ដឹងថា វាពិតជាមានករណីបែបនេះ ដូចជាការចុះផ្សាយដែរទេ?
មុនមានករណីចាប់ខ្លួននេះ លោក Wanchalearm មិនដែលមកបំពេញឯកសារច្បាប់ សុំសិទ្ធិស្នាក់នៅកម្ពុជា ឱ្យបានត្រឹមត្រូវតាមច្បាប់ឡើយ ចាប់តាំងពីឆ្នាំ២០១៧មក។ នេះបើតាមលោក ខៀវ សុភ័គ អ្នកនាំពាក្យក្រសួងមហាផ្ទៃ។
លោក Wanchalearm គឺជាសកម្មជននយោបាយថៃម្នាក់ ដែលតែងតែចេញមុខរិះគន់របបដឹកនាំរបស់លោក ប្រាយុទ្ធ ចាន់អូចារ នាយករដ្ឋមន្ត្រីថៃ។ លោក Wanchalearm ត្រូវបានគេស្គាល់ថា ជាសកម្មជននយោបាយក្រុមអាវក្រហម ដែលគាំទ្រអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាតត្រា។ លោក Wanchalearm បានរត់គេចខ្លួនមកសម្ងំរស់នៅកម្ពុជា កាលពីឆ្នាំ២០១៤ ក្រោយពីយោធាថៃ តាមចាប់ខ្លួន។ ដោយឡែកអាជ្ញាធរថៃ ក៏ធ្លាប់បានប្រកាសកាលពីឆ្នាំ២០១៨ថា ពួកគេនឹងតាមចាប់ខ្លួនលោក Wanchalearm ត្រឡប់យកទៅប្រទេសថៃវិញផងដែរ៕