ទូត​ចិន ហៅ​អាមេរិក​ជា​មេ​បង្កបញ្ហា​ក្នុង​ទំនាក់ទំនង​ចិន​-​កាណាដា​
COVID-19
អន្តរជាតិ
ទូត​ចិន ហៅ​អាមេរិក​ជា​មេ​បង្កបញ្ហា​ក្នុង​ទំនាក់ទំនង​ចិន​-​កាណាដា​
12, Jun 2020 , 9:19 pm        
រូបភាព
អគ្គរដ្ឋទូតចិនប្រចាំកាណាដា លោក Cong Peiwu (AFP)
អគ្គរដ្ឋទូតចិនប្រចាំកាណាដា លោក Cong Peiwu (AFP)
​សហរដ្ឋអាមេរិក កំពុង​ប្រើប្រាស់​ករណី​មន្ត្រីជាន់ខ្ពស់​នៃ​ក្រុមហ៊ុន​ទូរគមនាគមន៍​ចិន​ម្នាក់​ដែល​ត្រូវបាន​ចាប់​ឃាត់ខ្លួន​ក្នុង​ទីក្រុង Vancouver តាម​ដីកា​អាមេរិក​កាលពី​១៨​ខែ​មុន ដើម្បី​បង្កើត​ភាពល្អក់​កករ​ក្នុង​ទំនាក់ទំនង​រវាង​ចិន​និង​កាណាដា​។ ប្រេសិត​ចិន​ប្រចាំ​កាណាដា និយាយ​បែបនេះ នៅ​ថ្ងៃទី​១១​ខែមិថុនា​។

 
«​សហរដ្ឋអាមេរិក កំពុង​កេងចំណេញ​ពី​កាណាដា ហើយ​សហរដ្ឋអាមេរិក គឺជា មេ​បង្ករឿង​ក្នុង​ទំនាក់ទំនង​ចិន​-​កាណាដា​»​។ អគ្គរដ្ឋទូត​ចិន​ប្រចាំ​ក្រុង អូ​តា​វ៉ា លោក Cong Peiwu ប្រាប់​ទីភ្នាក់ងារ​ព័ត៌មាន Reuters ក្នុង​បទ​សម្ភាស​តាម​ទូរ​សព្ទ​បែបនេះ ។​
 
​អ្នកគ្រប់គ្រង​ហិរញ្ញវត្ថុ​របស់​ក្រុមហ៊ុន​ចិន Huawei Technologies Co អ្នកស្រី Meng Wanzhou ត្រូវបាន​ចាប់​ឃាត់ខ្លួន​ក្រោម​ដីកា​បោកប្រាស់​ធនាគារ ដែល​ចេញ​ដោយ​អាជ្ញាធរ​អាមេរិក​។ ជា​ជន​ជាតិចិន និង​កូនស្រី​របស់លោក Ren Zhengfei ស្ថាបនិក​ក្រុមហ៊ុន Huawei អ្នកស្រី Meng អះអាងថា អ្នកស្រី​ស្អាតស្អំ​។ 
 
​ក្រោយ​សាកសួរ​ពាក់ព័ន្ធ​ឯករាជ្យភាព​នៃ​ប្រព័ន្ធតុលាការ​កាណាដា លោក​អគ្គរដ្ឋទូត Cong បានលើកឡើង​ពីស​ម្តី​លោក ដូ​ណា​ល់ ត្រាំ កាលពី​ខែធ្នូ ឆ្នាំ​២០១៨ ដែល​លោក​បាន​និយាយថា ករណី​ចាប់ខ្លួន​អ្នកស្រី Meng គឺជា​ឧបទ្ទវហេតុ​នយោបាយ​ច្រើនជាង​ករណី​តុលាការ​ធម្មតា​។ កាលនោះ លោក ត្រាំ ធ្លាប់​អះអាងថា លោក​នឹង​លូកដៃ​ចូល​ក្រសួងយុត្តិធម៌​អាមេរិក​ក្នុងករណី Meng បើ​វា​នឹង​ជួយ​ឲ្យ​ក្រុង​វ៉ាស៊ីនតោន​សម្រេច​កិច្ចព្រមព្រៀង​ជាមួយ​ប៉េកាំង​។ 
 
«​យើង​ជឿជាក់ថា នេះ​គឺ​ពិតជា​ឧបទ្ទវហេតុ​នយោបាយ​ធ្ងន់ធ្ងរ​មួយ ដែល​រៀបចំឡើង​ដោយ​សហរដ្ឋអាមេរិក​ដើម្បី​ផ្តួលរំលំ​ក្រុមហ៊ុន​បច្ចេកវិទ្យា​លំដាប់​ខ្ពស់​ចិន​»​។ អគ្គរដ្ឋទូត​ចិន​ប្រចាំ​កាណាដា លើកឡើង​បែបនេះ​។ ទោះជា​បែបនេះ​ក្តី លោក Cong ពុំ​បញ្ជាក់ថា តើ​ចិន​នឹង​វាយបក​ប្រឆាំង​ការសម្រេច​របស់​តុលាការ​កាណាដា​កាលពី​ខែ​មុន ឬ​យ៉ាងណា ដែល​នឹង​អូសបន្លាយ​សវនាការ​រ​បស់​អ្នកស្រី Meng ។ 
 
 
​ភ្លាមៗ​ក្រោយ​ការចាប់​ឃាត់ខ្លួន​របស់​អ្នកស្រី Meng ក្រុង​ប៉េកាំង​បានសម្រេច​ចាប់ឃុំខ្លួន​ជនជាតិ​កាណាដា​២​នាក់​លើ​បទ​ចោទ​សន្តិសុខ​ជាតិ ហើយ​ថែមទាំង​ផ្អាក​ការនាំចេញ​ផលិតផល​កសិកម្ម​កាណាដា​ផងដែរ​។ 
 
​កន្លងទៅ នៅពេល​សាកសួរ​ពាក់ព័ន្ធ​ករណី​អ្នកស្រី Meng នាយករដ្ឋមន្ត្រី​កាណាដា លោក Justin Trudeau បាន​សង្កត់ធ្ងន់ថា ប្រព័ន្ធតុលាការ​ប្រទេស​លោក គឺមាន​ភាព​ឯករាជ្យ ហើយ​លោក​ក៏បាន​ទទូច​ឲ្យ​មានការ​ដោះលែង​ជនជាតិ​កាណាដា​ពីរ​នាក់​ដែល​ចិន​ចាប់​ឃុំឃាំង​រួមមាន អ្នកជំនួញ Michael Spavor និង​អតីតមន្ត្រី​ទូត Michael Kovrig ។​
 
​ជាការ​ឆ្លើយតប ប្រេសិត​ចិន បាន​អះអាងថា ជនជាតិ​កាណាដា​២​នាក់​នេះ មាន​សុខ​ភាពល្អ តែ​ការ​សុំចូល​សួរសុខទុក្ខ​ពី​ស្ថាន​កុងស៊ុល នៅតែ​ត្រូវ​ផ្អាក ព្រោះ​ការ​រឹតត្បិត COVID-19 ហើយនឹង​ដំណើរការ​ឡង​វិញ​នាពេល​ឆាប់ៗ​៕ 
 
 

Tag:
 ចិន​
  កាណាដា​
  សហរដ្ឋអាមេរិក
© រក្សាសិទ្ធិដោយ thmeythmey.com