ភ្នំពេញ៖ កម្ពុជា តាមរយៈការអំពាវនាវរបស់សម្តេចនាយករដ្ឋមន្ត្រី ហ៊ុន សែន បានប្រមូលថវិការបស់សប្បុរសជនក្នុងស្រុក ដើម្បីបញ្ជាទិញរថយន្តធុនធំ ២៩០គ្រឿងពីចិន សម្រាប់យកមកប្រើប្រាស់ក្នុងវិស័យយោធា។ អ្នកតាមដានស្ថានការណ៍សង្គម យល់ឃើញថា កម្ពុជាមិនគួរទិញរថយន្តយោធានោះទេ ខណៈដែលជំងឺកូវីដ-១៩ កំពុងរាតត្បាត និងគំរាមកំហែងទូទាំងពិភពលោក។
នាយកអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា កម្ពុជា មិនទាន់មានភាពចាំបាច់អ្វី ក្នុងការទិញរថយន្តយោធានៅពេលនេះទេ។ សម្រាប់លោក សន ជ័យ រដ្ឋាភិបាលគួរតែប្រើប្រាស់ថវិកាឱ្យបានត្រឹមត្រូវ ក្នុងអំឡុងពេលនៃការប្រយុទ្ធប្រឆាំងជំងឺកូវីដ-១៩នេះ។
លោក សន ជ័យ បានបញ្ជាក់ដូច្នេះថា៖ «បណ្ដាអង្គការផ្នែកសេដ្ឋកិច្ច ដូចជាធនាគារពិភពលោកជាដើម គេបានព្យាករអំពីហានិភ័យខ្ពសនៃសេដ្ឋកិច្ចកម្ពុជា។ អ៊ីចឹងការទិញដូរ(រថយន្តយោធា)នៅពេលនេះ ដែលខ្ញុំយល់ថា វាមិនទាន់មានភាពចាំបាច់ខ្លាំង ឬក៏អាទិភាពអ្វីនៅក្នុងការប្រើប្រាស់រថយន្តយោធានោះទេ ព្រោះកម្ពុជាមានការអះអាងថា មានប្រាក់បដិភាគគ្រប់គ្រាន់ហើយ ដូច្នេះវាជារឿងមួយគួរតែគិតគូ ការប្រើប្រាស់ថវិកាពីរឿងទប់ស្កាត់ ឬដោះស្រាយបញ្ហាកូវីដ-១៩»។
ការទិញរថយន្តយោធាទាំងនេះ មិនត្រូវបានប្រើប្រាស់ថវិការបស់រដ្ឋឡើយ។ សម្តេចនាយករដ្ឋមន្ត្រី ហ៊ុន សែន បានអំពាវនាវដល់សប្បុរសជនក្នុងស្រុកនានាដើម្បីប្រមូលថវិកាទិញរថយន្តធុនធំ ២៩០គ្រឿងពីចិន សម្រាប់យកមកប្រើប្រាស់ក្នុងវិស័យយោធា។
ថ្លែងប្រាប់សារព័ត៌មានថ្មីៗ អ្នកនាំពាក្យកងទ័ពជើងគោក លោក ម៉ៅ ផល្លា បានបញ្ជាក់ថា៖«ថវិកានេះ គឺជាថវិកាសប្បុរសជនដែលបានផ្តល់ជូនសម្តេច ដើម្បីឧបត្ថម្ភដល់កងយោធពលខេមរភូមិន្ទ និងនគរបាលជាតិ»។
តែយ៉ាងណាលោក ម៉ៅ ផល្លារ មិនអាចបញ្ជាក់ថា កម្ពុជាបានចំណាយទំហំទឹកប្រាក់ប៉ុន្មាននៃមូលនិធិ សម្រាប់ទិញរថយន្តយោធា២៩០គ្រឿងនេះឡើយ។ ប៉ុន្តែអ្នកនាំពាក្យរូបនេះ គ្រាន់តែបញ្ជាក់ថា ការទិញរថយន្តនេះ ដើម្បីយកមកប្រើប្រាស់ក្នុងវិស័យយោធា សម្រាប់ដឹកជញ្ជូនកងកម្លាំង និងពលរដ្ឋពេលមានគ្រោះអាសន្នជាដើម ពោលគឺមិនមែនសម្រាប់យកមកគំរាមកំហែងពលរដ្ឋទេ។
«សម្រាប់រថយន្តនេះ គឺយកមកបម្រើការសម្រាប់ជាតិទាំងអស់ បើមានតម្រូវការដឹកប្រជាជន គឺដឹកជញ្ជូនប្រជាជន ហើយនឹងដឹកចល័តទ័ពផ្សេងៗទៀតជារួមក្នុងយោធពលខេមរភូមិន្ទផង និងអនុវត្តតាមបទបញ្ជារបស់រាជរដ្ឋាភិបាលផង»។ នេះជាការបញ្ជាក់របស់អ្នកនាំពាក្យកងទ័ពជើងគោក។
នៅក្នុងអំឡុងពេលទប់ស្កាត់ជំងឺកូវីដ-១៩នេះ ប្រមុខរដ្ឋាភិបាល បានបង្កើតមូលនិធិមួយ ដោយឱ្យសប្បុរសជនបរិច្ចាគថវិកាតាមសទ្ធា ។ តាមរយៈការអំពាវនាវរបស់សម្ដេច ហ៊ុន សែន នោះ ក៏មានសប្បុរសជនបរិច្ចាគប្រាក់ជាបន្តបន្ទាប់ ដែលមានទឹកប្រាក់ជាង១៤លានដុល្លារ ។ ក្រៅពីនេះ ក៏មានមន្ត្រីរដ្ឋ នៅតាមក្រសួង និងស្ថាប័ន ចំនួន៤១ បានកាត់ប្រាក់បៀវត្សរ៍ ចន្លោះពី១ខែ ដល់៧ខែ ដោយមានទឹកប្រាក់ជាង៩,៣លានដុល្លារទៀតផង។ នេះបើតាមតួលេខថវិកា ដែលក្រសួងសុខាភិបាល បានប្រកាសនៅក្នុងសន្និសីទកាសែត កាលពីថ្ងៃទី៤ ខែឧសភា កន្លងមក៕