COVID-19
អន្តរជាតិ
វេជ្ជបណ្ឌិតបែលហ្ស៊ិកវ័យ១០៣ឆ្នាំ ដើរម៉ារ៉ាតុនរកថវិកាសម្រាប់ការស្រាវជ្រាវវ៉ាក់សាំង COVID-19
× លោកតា Alfons Leempoels វេជ្ជបណ្ឌិតបែលហ្ស៊ិកអាយុ១០៣ឆ្នាំ បានសម្រេចយកគំរូតាមអតីតយុទ្ធជនសង្គ្រាមលោកលើកទី២អង់គ្លេសវ័យ១០០ម្នាក់ ដោយដើរម៉ារ៉ាតុននៅជុំវិញសួនច្បាររបស់ខ្លួន ដើម្បីរៃអង្គាសថវិកាសប្បុរសធម៌ ជួយដល់ការស្រាវជ្រាវវ៉ាក់សាំង COVID-19។ នេះបើតាមការផ្សាយរបស់ទីភ្នាក់ងារព័ត៌មានរ៉យទ័រ។
លោក Leempoels ជាវេជ្ជបណ្ឌិតចូលនិវត្តន៍ម្នាក់ ដែលបានចាប់ផ្តើមយុទ្ធនាការដើរឲ្យបានចម្ងាយ៤២.២គីឡូម៉ែត្រ នៅក្នុងសួនច្បាររបស់ខ្លួនក្នុងទីក្រុង Rotselaar ភាគឦសាននៃក្រុងព្រុចសែល ។ បុរសបែលហ្ស៊ិកវ័យដល់ទៅ១០៣ឆ្នាំរូបនេះ ផ្តើមដើរពីថ្ងៃទី១ ខែមិថុនា ហើយគ្រោងបញ្ចប់នៅថ្ងៃទី៣០ ខែមិថុនា។
ជារៀងរាល់ថ្ងៃ គាត់ដើរ១០ជុំក្នុងចម្ងាយ១៤៥ម៉ែត្រ ដោយ៣ជុំនៅពេលព្រឹក ៣ជុំនៅពេលរសៀល និង៤ជុំនៅពេលល្ងាច។ ដើម្បីកុំឲ្យភ្លេច គាត់តែងតែដាក់ដុំឈើចំណាំ នៅពេលដែលសម្រេចបានក្នុងជុំនីមួយៗ។
លោកតា Leempoels បញ្ជាក់ថា គាត់បានយកតាមគំរូរបស់លោក Tom Moore អាយុ១០០ឆ្នាំ អតីតយុទ្ធជនសង្គ្រាមលោកលើកទីពីរអង់គ្លេស ដែលបានរៃអង្គាសថវិកាបានដល់ទៅជាង៤០លានដុល្លារអាមេរិក ជួយដល់សេវាកម្មសុខាភិបាលរបស់ខ្លួនក្នុងយុទ្ធនាការប្រយុទ្ធប្រឆាំងកូវីដ-១៩។
«កូនៗរបស់ខ្ញុំ បានលើកឡើងថា ខ្ញុំអាចដើរបានដូចលោក Tom Moore ហើយកាន់តែពិសេសនោះ គឺខ្ញុំមានអាយុ១០៣ឆ្នាំ។ ពួកគេបានស្នើឲ្យខ្ញុំធ្វើអ្វីមួយ ហើយខ្ញុំនិយាយលេងសើចទៅចៅស្រីខ្ញុំថា ខ្ញុំអាចរត់ម៉ារ៉ាតុនបាន»។ លោកតា Leempoels បានរៀបរាប់យ៉ាងដូច្នេះប្រាប់រ៉យទ័រ។
គោលបំណងរបស់បុរសបែលហ្ស៊ិកវ័យ១០៣ឆ្នាំរូបនេះ គឺរៃអង្គាសថវិកាសម្រាប់សាកលវិទ្យាល័យវេជ្ជសាស្ត្រ Leuven ដែលកំពុងសិក្សាស្រាវជ្រាវរកវ៉ាក់សាំងការពារ COVID-19។ គិតត្រឹមចុងសប្តាហ៍នេះ គាត់រកបានថវិកាជាង១ម៉ឺនដុល្លារអាមេរិករួចទៅហើយ។
គាត់បានអះអាងថា៖ «ក្នុងនាមជាវេជ្ជបណ្ឌិតម្នាក់ អ្នកតែងតែមានអារម្មណ៍ឈឺឆ្អាលចំពោះស្ថានការណ៍រាលដាលជំងឺឆ្លង ដូច្នេះខ្ញុំពិតជារីករាយក្នុងការធ្វើសកម្មភាពដើម្បីរួមចំណែកប្រយុទ្ធប្រឆាំងកូរ៉ូណាវីរុស»៕
© រក្សាសិទ្ធិដោយ thmeythmey.com